執筆之時,又再等人。我必須老實地說,我不算是最準時的人,但通常在約定時間15分鐘之內一定到達地點,有時甚至更早。如果遲到,一定早早通報,以免別人等待。今次,我足足等了40分鐘(如果那位不是客戶,相信我也一早走了)。

如果在約定時間15分鐘之內到達算是準時,那麼我是more than準時了,準時是美德,但絕對不是好事,因為準時代表要等人,無論是工作還是約會朋友,計下計下,每天如果要見四個人,每人遲15分鐘,我每天足足花了1小時在等人。以下幾個情況,我經常遇到,令我有少少無明火起。

1|食住等啦!

「食住等啦」,最憎呢句,X你,未有人到啊!?因為個個都以為有人就可以食先,完全冇人想過準時,結果得一個人在等一枱人,如何食住等呢?每個遲到的人,都會叫人食住等,大佬,唔通等你先至開飯咩,梗係食住等啦!不過食住等,你來到,又要追回進度,如果打邊爐猶自可,如果食正統的西餐,明明已經食到第三道菜,分分鐘要等你食完第一丶二道菜,廚師才會上第三道菜,因為人家有規矩,都想齊人起菜,那可就慘了!你坐落回氣飲啖酒,再和朋友寒暄,再食一兩道菜,嗰度都一個鐘,如果你長氣一點,食嘢唔講嘢,講嘢唔食嘢,分分鐘拖得一個半鐘,我們才可以食第三道菜,朋友食飯慢慢來,都唔係十點才吃主菜吧!況且就算不是吃正統的西餐,普通食中菜,客氣的話「再點過熱的菜吧」,又再等食一輪,無論如何,你都是拖慢進度。下次趕唔切,唔需要講食住先,直接說不來了比較好。

2|遲到半個鐘剛剛好開飯

好過分,我覺得遲半個鐘的人,根本是早有預謀,尤其是工作的飯局,約七點鐘,頭15分鐘要來等人,之後15分鐘用來寒暄,七點半才叫上菜,你七點半到, 7:45剛剛有得食,仲慳了30分鐘等人。嘩! 30分鐘喎!我寫到這篇稿了。太奸,我下次都想遲半個鐘。

3|刻意遲到的人

好了,我承認,有時候我是刻意遲到的,尤其是大圍食飯, 2號情況經常發生,因為覺得個個都遲到,所以自己也遲,以免等太耐,這根本是惡性循環,互相遲到丶互相等待丶互相折磨。不如講一個時間大家都可以的,那不就是清晰明確有效率嗎?

4|遲到一定有原因

有些人慣性遲到的,其實甚麼理由都冇所謂,索性講一句唔好意思,大家心裡還好過一點。但是有些人卻喜歡捏造一些原因遲到,比如有工作啦(誰沒有?)丶塞車啦(為甚麼不早點出門口?)丶出門口找不到鎖匙(again,為甚麼不早點出門口?)丶突然之間有個電話啦(唔可以一路行一路講嘅?),無論如何,遲到就是遲到,任何理由都是藉口。

5|明明未到又話就到

明明在尖沙咀,就話自己在中環行緊上嚟,魚目混珠,拖延時間,志在令到人覺得自己冇咁遲。事實上你話就來到,大家都等你,如果你坦坦白白說未到,大圍開始食飯或活動,大家都冇覺得咁慘,一枱人等你一個鐘,講笑啊?個個都秒秒鐘幾十萬上落啊大佬,得你一個忙?

6|有些人天生就冇時間觀念

一句講完!有些人對5分鐘或半個鐘,都沒有太大概念,無論在香港還是外地、遠定近,他們不能夠預計時間,覺得自己可以半小時,來回尖沙咀中環游水食飯寄信!唔該,買隻錶,望多啲,了解下1分鐘同1秒鐘係幾耐,同埋唔該行快啲。