好多人去旅行都係為咗體驗當地文化，除咗飲食、住宿、購物、交通呢類普通嘢，大家去旅行時，又做過啲乜嘢最黐線嘅無聊嘢呢？
以下係我以及幾位朋友嘅親身體驗，依家寫番出嚟都真係好無聊……
01 | 去印度睇戲
有次同幾個朋友去印度，由於有當地朋友做導遊，我哋除咗一般景點，仲可以體驗到真正嘅印度生活。
我提議不如去睇一套印度最有名嘅Bollywood歌舞片！
朋友問我會唔會後悔，我話真係好想入一次印度戲院睇戲。於是，朋友就帶咗我哋去一間外表光鮮三尖八角嘅戲院。
佢話大多數戲院只得一、兩個放映院，以印度本土電影為主，外國電影只會短期放映。我哋揀咗套印度歌舞片，朋友臨買票前再鄭重講多次：「你哋唔好後悔！」
入到戲院，空間比我想像中寬敞，客人90%以男性為主，朋友話好多印度女性（尤其落後地區）想睇電影，就要靠丈夫帶先有機會，幾個女性朋友睇戲，會被視為懶惰。
印度歌舞片嘅特色就係大部分片長３小時，中段有時間休息畀客人去廁所。最特別嘅係，當電影奏起歌舞時，有觀眾會打拍子，甚至有人起身跳舞。朋友話對印度人嚟講，入戲院只係想聽歌跳舞，電影只係輔助，真係長知識……
02 | 買民族服返香港
某一位女性朋友，每次見佢去旅行，都會著當地嘅民族服，我試過同呢位朋友去旅行，佢買完件衫會歡天喜地咁著住全日行街。
要做到呢個程度，真係需要好大勇氣，但我衷心佩服佢嘅嗜好，因為佢對民族服嘅愛好程度並非影相打卡咁簡單，而係會買一套返香港作為紀念。
03 | 同當地人傾偈
有一位朋友對各國語言好有興趣，所以佢每次去旅行，都會撩當地人傾偈，叫人哋教佢點講基本嘅「你好」、「謝謝」、「再見」之類。
根據呢位朋友嘅經驗，有時去到啲不太友善嘅國家，就算去到餐廳問侍應都懶得理你，甚至可能唔識聽英文。想學嘅話，最好就係問Uber或的士司機，佢哋多數比較友善，亦大部分識同遊客溝通。