【HKExpress 下地島 宮古群島】夏天就梗係要去陽光與海灘兼備嘅地方玩啦!想近近哋玩嘅話,首選就多為沖繩。若然鍾意沖繩靚海,宮古群島更是必去!以後去宮古群島唔使咁麻煩喇,因為HK Express宣布,正式將宮古群島之一嘅下地島定為新航點!7月暑假檔出發,欣賞超靚嘅自然海洋生態!

撰文:C|圖片:HK Express、Visit Okinawa Japan、Eco Guide Café

HK Express 下地島新航點

香港快運航空HK Express宣布,將於7月19日起開設屬於沖繩縣宮古群島嘅下地島新航點!每周有3班機來回香港至下地島。選用空中巴士A320型客機,一共180/186個客位,逢星期二、五、日運航。

圖片來源:HK Express官方facebook page
圖片來源:HK Express官方facebook page

由香港至下地島所需飛行時間為2小時10分鐘,下地島至香港則為2小時20分鐘至2小時30分鐘。

航班資料:
UO814  香港(08:40)~下地島(11:50)(逢星期二)
UO814  香港(14:10)~下地島(17:20)(逢星期五、日)

UO815  下地島(12:35)~香港(13:55)(逢星期二)
UO815  下地島(18:35)~香港(20:05)(逢星期五)
UO815  下地島(18:50)~香港(20:20)(逢星期日)

詳情按此

下地島景點

下地島四面環海,海底地形複雜,亦係出名嘅「洞穴潛水」勝地!從下地島機場向北面延展至海上嘅「17END」棧橋,更係打卡必到嘅靚景!睇下下地島仲有咩玩:

1|通池

因有兩個大小相連嘅池喺水底下相連,所以稱為「通池」。通池地形罕見,係日本國家名勝及天然紀念物之一,而且同外海相連,潛潛下水,有機會潛到出外海!不過要出外海,需要經過漆黑嘅海底隧道,如果唔係資深嘅高級潛水者,就建議唔好冒險喇!

圖片來源:Visit Okinawa Japan
圖片來源:Visit Okinawa Japan

2|17END旁海灘

「17END」嘅名稱源於機場跑道嘅延伸方位。喺海上建造跑道時,曾進行部分填海工程,導致海潮流向改變,形成沙灘。特別嘅係,呢個沙灘只會喺乾潮時出現,作為「幻影沙灘」而吸引到唔少人注意。但因為沙灘未整頓好,小心注意唔好誤落水中!

圖片來源:Visit Okinawa Japan
圖片來源:Visit Okinawa Japan

3|中之島海灘

位於小島東西外環道路旁嘅中之島海灘(別稱:Kayahhua Beach),係被厚重嘅礁岩環繞,唔太受外海影響嘅海灣形海灘。波浪平穩之餘,海水透明度極高,係多種珊瑚礁同熱帶魚嘅棲息地。但因為冇救生員常駐,所以,如果要去嘅話,要小心注意好個人安全!

圖片來源:Visit Okinawa Japan
圖片來源:Visit Okinawa Japan

4|卡雅法海岸慢潛體驗

當地潛水公司Eco Guide Café相當重視海洋生態保育,潛水活動主要準則為「不在珊瑚礁餵食、不踩踏珊瑚礁、不觸碰珊瑚礁」,所以可以欣賞到最完好嘅珊瑚礁及海洋生態。Eco Guide Café推出嘅「慢潛」,係一種唔使自己揹氧氣樽,而且臉部完全唔會接觸到水,號稱同陸上呼吸一樣簡單嘅潛水體驗。即使唔識游水,8至80歲都可以輕輕鬆鬆近距離欣賞珊瑚礁。

圖片來源:Eco Guide Café
圖片來源:Eco Guide Café

相關文章