今日係情人節,唔少男士都花盡心機為哄女朋友開心,過一個甜蜜又開心嘅節日。不過要營造一個令女朋友100%滿意嘅情人節,都唔係咁簡單,唔少男士都係抱著戰戰兢兢嘅心情去「對付」女朋友,至少⋯⋯希望今日唔好鬧交。你有冇覺得過女朋友/老婆經常「冇嘢搵嘢嘈」?日本腦科學者話你知,呢樣其實係母性本能!

撰文:C|圖片:《林先生が驚く初耳学!》

妻子/女朋友經常「無理取鬧」?

已婚男藝員嘉賓立川志樂話,10年前曾經叫妻子煮一餐懷石料理,但因為懷石料理分量較少,立川夜晚就覺得餓,然後買咗個飯盒返屋企食。

妻子見到之後嬲到震,就話以後都唔再煮!之後兩夫婦一鬧交,妻子就會攞番呢件事出嚟講。立川就話唔明點解十幾年前嘅事要講到依家,女性似乎好鍾意舊事重提。

女嘉賓曾根立即出聲話,男士唔應該自己訂立時規,因為「嬲」呢件事根本就係冇時效性嘅!

咁點解男性角度睇覺得「無理取鬧」嘅事,女性會不斷「重演」呢?原因係「女性腦」!

「妻子的使用說明書」

女性腦科學研究者黑川伊保子嘅best-selling著作《妻子的使用說明書》中指出,因為女性要撫養唔識講嘢嘅BB仔,於是會透過觀察BB仔嘅表情或動作嚟養育,所以對於觀察表情、心情嘅察知能力比男性高出多倍。

對於女性嚟講,「察知心情」等同於「愛的證明」,呢樣係一種母性本能!

但係男性嘅察知能力不足,亦表示住係「唔夠愛」!所以從男性角度睇,會覺得女性係「無理取鬧」!

情景題一:換電燈膽

如果電燈膽燒咗,妻子話「我自己處理就得㗎喇」嘅話,多數男性都會覺得「又係你自己話得嘅,咁你就自己嚟啦」,然後妻子一嬲,就會滿頭問號,覺得佢哋無理取鬧。

女人呢,講就咁講,其實呢個情況下,佢哋嘅內心係想講「快啲閱讀空氣自己過嚟幫手啦」!男性會覺得「想我幫手咪出聲囉」,但係呢樣先至係導致鬧交嘅原因!

男女溝通術黃金規則

男性腦構造較為簡單,只有一條關於事實嘅通訊線。但係女性腦,除此之外,更有一條關於心嘅通訊線。

以十字劃分四格,四面分別為「肯定事實」、「否定事實」、「肯定心情」、「否定心情」。女性之間嘅溝通係屬於1、2兩格,即係建立於「肯定心情」之上,只要產生共鳴、表示認同,即使否定事實都OK!

情景題二:一班女仔去食甜品

店家做緊以芒果為主題嘅季節限定,A就話:「做緊芒果主題甜品喎,芒果好味喎!」,而B、C會附和,認同芒果好味,不會否定A嘅心情/想法。

即使最後B、C都冇order芒果主題甜品,A都唔會覺得嬲。意思即係,心情上會對A表示認同,但對事實進行否定(否定事實→order其他自己鍾意嘅選項,而非一同order芒果甜品)。

同女性好好溝通嘅關鍵在於,要產生共鳴!首先要認同女性嘅心情,之後先再行動,就可以有效減少鬧交嘅次數!各位男士可以試試小心實行!

Tags :