撰文：E｜圖片：Scott
澳門VR體驗 Legend Heroes Park
首爾Legend Heroes以運動做主題，提供足球、保齡球、射箭等10項VR遊戲。澳門的Legend Heroes Park則走刺激路線，全場有7個體驗項目，部分有如玩機動遊戲，場內不乏尖叫聲，刺激感更勝首爾。不過，可惜冇得全場任玩，要按項目收費！如果想玩多幾個，購買package會較划算。即刻睇下哪項體驗合你心水！
1｜迴旋360度
360度洗衣機是全場轉動最多、最驚嚇的項目，單睇外形已經夠嚇人，坐上去之後，會有如洗衣機般360度旋轉，真正轉到頭都暈。洗衣機其實是模擬滑雪情景，要左閃右避，刺激感可媲美機動遊戲。
2｜7米高吊臂
想感受一下離心力，就要玩這個機械吊臂。戴上VR鏡後，會化身成高達，穿越冰川、火山。吊臂郁動配合視覺效果，有種從7米高空墜下的感覺，離心力大，每個上去玩都一定會嗌，短短3分鐘已足以令到好多人驚。
7米高吊臂（Robot VR）
3｜飛行體驗
好多人都幻想過自己可以好似超人一樣，在天空自由飛翔。Flying Jet是單人騎行的VR飛行遊戲，有超人和蜜蜂2個主題選擇，玩之前可以2選1。視覺上超人主題的刺激感較大，不過實際上，其實是蜜蜂主題的郁動較大，幾乎整個人趴向地下。
4｜4D韓星演唱會
Legend Heroes 來自韓國，當然要加點韓國特色。場內設有4D韓星演唱會區，有2NE1、BIGBANG、G-Dragon等等，粉絲可以模擬同偶像一齊開演唱會，做近距離接觸，有互動之餘，更可以瘋狂合照。全息影像Hologram音樂會全長約20至30分鐘，粉絲們不可以錯過。
5｜槍戰迷宮
槍戰一樣有得揀主題，可以2選1，分別有射怪獸和兔仔。初時以為兔仔主題會較簡單，怎料戴上VR鏡後，即使明知是平路，也以為自己站在懸崖邊，行錯一步會跌下去，岌岌可危。
6｜激光劍節拍機
原來玩VR節拍機都幾攰，因為要雙手手持激光劍，向不同方向揮動，絕對是減拜拜肉的遊戲。除了郁動雙手，更要走位避開機關，要出動全身之力。每人可以玩2首歌，而且可以揀難度，建議大家可以揀最難，好玩得多！
7｜超逼真賽車
雖然賽車沒有VR配備，但同樣有逼真感。有別於一般機舖的賽車games，座位會隨賽車場景而擺動，彷彿坐上了一架真車上，上落斜、撞壆、剷上沙地，座位都會有不同的震動和擺動。賽車可以連機玩，最多6位玩家，最啱一班friends一齊玩。
Legend Heroes Park收費
是按項目收費，睇中哪個就付費玩。
如果想玩多幾個，買package會比較划算。
買滿MOP 220的話，會送一份3D全息圖框（送完即止），可以用來播放Hologram影片，無論哪個方位都睇到。
傳奇英雄科技城 Legend Heroes Park
地址：澳門氹仔新濠影滙時代廣場1樓
電話：+853-2857-3381
開放時間：11:00am至11:00pm
網址：www.legend-park.com
下一頁：【澳門好去處2019】跟著日本節目《二度目之澳門》 帶你搜羅21個景點與美食！
延伸閱讀：【澳門手信2019】必買「雙重蝦子麵」｜小店全人手製作 日賣800個
