【日本闇鍋】天氣凍,無論係香港人定係日本人,都非常鍾意打邊爐。日本有一種打邊爐玩法名為「闇鍋」(黑暗火鍋),即係每一個人負責帶至少一種食材入漆黑嘅房間,喺唔清楚大家帶咗咩食材嘅情況下,將所有嘢食倒入鍋,煮好之後,先會知有咩食。不過無論裡面有啲幾奇怪嘅食材都好,都一定要食晒。

撰文:C|圖片:Twitter

日本「闇鍋」

近日Twitter網友上載咗一張圖,話同4個朋友一齊開「闇鍋party」,結果一開鍋蓋,先發現原來所有人都係帶咗肉⋯⋯推主表示非常崩潰⋯⋯

成個鍋都係肉⋯⋯望下都覺得滯⋯⋯

網友爭貼「作品」

真正嘅地獄「闇鍋」係咁先啱。

材料:蜜瓜包、樂天熊仔餅、火龍果、迷你泡芙

材料:蜜瓜包、樂天熊仔餅、火龍果、迷你泡芙

學生時代嘅「闇鍋」。

個菠蘿⋯⋯至少都切開咗先啦⋯⋯

冇任何一個人帶正常食材嚟嘅,我哋嘅「闇鍋」係咁嘅樣⋯⋯

目測有桔仔⋯⋯

「闇鍋」不得了⋯⋯有一個人食到嘔嘅地獄鍋。

咁大個布甸真係⋯⋯

「闇鍋」完結!放納豆、三文魚、奇異果嘅人真係應該判死刑⋯⋯

奇異果再加納豆⋯⋯不忍看⋯⋯

玩完「闇鍋」問番大家帶咗咩之後,

有布甸、乳酪、番茄、魚鰭、炸雞、忌廉夾心餅、雞湯即食麵、秋葵、百力滋、草餅、蒜頭、辣椒、牛腸等材料,大概餘生都唔想再玩「闇鍋」⋯⋯

帶餅類嘅,真係諗下都驚!

喺「闇鍋」加墨汁真係⋯⋯不過味道意外地普通,食得到,明明聞落去同臭水渠冇分別⋯⋯

推主勇氣可嘉!

「闇鍋」好好食!!加埋壽司之後變咗魚湯雜炊。

睇番上面嗰啲,呢個簡直係豪華火鍋!

相關文章