咁多年嚟,泰國都係香港人嘅熱門旅遊點之一。鍾意去泰國有好多原因,消費平,豪食豪飲唔需要計住計住,椰汁直頭可以當水咁飲。

不過泰國最吸引之處,就係有不論香港定外國旅客都非常鍾意嘅按摩!

老婆去泰國一定要按摩,但我完全唔識享受

對於全日都要坐喺度對住電腦工作嘅上班族,坐到腰酸背痛,有時我喺香港都會忍唔住搵啲按摩店。可惜相對泰國,環境比較迫,同旁邊嘅客人只有一塊布之隔,雖然肌肉得到紓緩,但精神完全放鬆唔到。

但泰國按摩除咗價錢比香港平,最重要係有獨立房間,做三個鐘頭全身精油按摩,就可以令肉體、精神嘅壓力都完全紓解晒。

平時行街行到攰,亦可以隨意搵間按腳。前排我同老婆去泰國五日四夜,佢好鍾意按摩,但我就相反,好怕被人按腳,覺得又痕又痛,完全感受唔到有咩咁舒服⋯⋯

諗住試下腳底按摩,結果⋯⋯

「你都一齊按啦~行咗全日街,對腳咁酸痛,唔會痛㗎!」仲記得星期六行完翟道翟,夜晚返酒店前,佢不停慫恿我一齊按腳。

好啦!諗住陪佢試多一次,反正我坐喺旁邊都冇嘢做,結果⋯⋯我嗌到成間按摩店嘅客人都望住我!

入到按摩店第一件事就係洗腳,我已經痕到狂縮開,但孔武有力嘅技師一手捉住我隻腳,我完全動彈不得。

正當我想嗌:「唔好!停!」技師對我流露一個不懷好意嘅微笑,就攞個刷出嚟猛咁擦我腳板底!

嗰刻我發出咗第一次嘅慘叫,而坐我旁邊嘅老婆則一臉鬆弛熊咁嘅樣享受緊。

技師唔知係咪同我有仇,我忍住尖叫,佢就愈來愈大力

終於忍受完擦腳之痛,按摩先係戲肉。技師唔知係咪同我有仇,我忍住尖叫,佢就愈來愈大力,我忍唔住叫出嚟,佢就更加用力按落去!仲用佢手上枝木棍戳我腳趾罅!

當我咬住下唇忍痛嘅時候,聽到旁邊有鼻鼾聲傳出,原來老婆瞓到口水都流埋⋯⋯

結果去咗泰國五日,佢按腳按足五日,每日行街好似就係為咗令自己對腳酸痛啲,可以按摩舒服啲咁。有個鍾意按摩嘅身邊人同行,而自己又唔享受按摩,去泰國其實都幾悶⋯⋯