【日本潮流衣著】又稱為JK嘅日本女子高中生,一直都係日本潮流嘅領軍群體,只要成功打入佢哋嘅市場,都可以話一定會hit爆日本!平成年號由1989年開始,到明年4月30日就正式畫上句號了。一齊睇睇呢30年來,影響我哋唔小嘅日本衣著文化有咩變化啦!

撰文:C|圖片:ACROSS

日本潮流衣著 回顧平成30年

1|1989年(平成元年)

Sports Mix Fashion

「Baby Boom」世代以街頭風為主流衣著潮流,變得更為casual。而且有氧運動第一次傳入日本並大受歡迎,令大眾衣著走向運動風格。

2|1990年(平成2年)

Shibuya Casual/深藍外套配藍色牛仔褲、白襯衫

由「著咩衫」轉變至「點著衫」嘅時代。襯衫配牛仔褲嘅簡約配搭中,再加上名牌袋或圍巾等提升配搭質感。「時尚=配搭」嘅想法滲透整個社會。

3|1992年(平成4年)

法國休閒風(French Casual)

無論男、女性之間都非常流行。以單色衣物單品進行配搭係時尚重點。牌子則以agnès b.最受歡迎。

因為憧憬巴黎人嘅衣著及生活方式,便開始模仿法國人嘅日常生活打扮,最後誕生出「French Casual」呢種大受歡迎嘅衣著風格潮流。其他流行嘅品牌仲有NICE CLAUP、KOOKAI、SHIPS,貝雷帽及皮繩等穿搭小物亦非常流行。

Para-gal

作為年輕辣妹前身嘅Para-gal,表現出女性化一面,主要以LA風「Resort Casual」為最流行配搭。由潮流雜誌《JJ》所命名嘅「Everyday Paradise」引申而來嘅「Para-gal」誕生。

4|1994年(平成6年)

女性化穿搭(Femin-boy)

受超人氣Club Music嘅影響,70年代風衣著配搭變得非常受歡迎。古著店急速增加,著重鴨舌帽/貝雷帽、大頭鞋、絲巾等配搭小物嘅年輕人亦大規模增加。

東京街頭時尚文化慢慢受到海外地區注目。透過自製時裝、二次加工等表現出強烈個性嘅女性化打扮男生急速增加,作為東京街頭時尚而備受注目。

女子高中生

迷你裙嘅人氣變得大眾化,校園風時尚於街頭流行文化中同樣人氣十足。

5|1995年(平成7年)

裏原宿系

1993年,以涉谷區神宮前4丁目為中心嘅原宿後方住宅街中,「GOODENOUGH」、「A BATHING APE」、「UNDERCOVER」等開設咗名為「NOWHERE」嘅select shop,呢個區域喺一大部分男性群體之中,被稱為「裏原宿」。

6|1996年(平成8年)

Shinora

由合成流行樂團體「電氣Group」成員石野桌球擔任製作人及主流樂壇出道嘅篠原友惠,以pop color及高漲情緒嘅角色特點,於年輕人間人氣爆發。參考追隨安室奈美惠fashion嘅「Amura」而命名為「Shinora」,奇怪又可愛嘅衣著打扮成為咗一款時裝種類。

女子高中生

以超高人氣嘅泡泡襪為契機,「女子高中生」成為時裝、化妝品、零食、服務等嘅商品開發首領。各界企業均主力進行「女子高中生Marketing」。

Amura

年輕辣妹細分至不同風格。「Amura」女生激增。小室哲哉所製作嘅樂曲爆紅,安室奈美惠嘅「迷你裙+厚底靴+長冷衫」嘅穿搭風格大受歡迎。

7|1997年(平成9年)

女子高中生辣妹

步入1997年,啡色頭髮、化妝、迷你裙等「女子高中生style」嘅細節逐漸人氣爆發。弓形幼長嘅眉形妝容係一大重點,襪款亦由泡泡襪轉變為深藍色貼身長襪,呢種由東京涉谷誕生嘅「女子高中生Brand」更向全國各地擴散。

Angeler

以和服及和式花紋為設計概念嘅品牌「卓矢Angel」大受歡迎,穿著該品牌嘅衫(或模仿品牌風格自製)嘅人均自稱為「Angeler」。

保守風

年輕辣妹時代嘅女性長大成人,令保守風時尚女子逐漸增加。90年代慢慢步向結束時,年輕辣妹世代亦大人化,於是街上多咗好多滲入咗辣妹要素嘅保守系女子。

Kawaii女子高中生

女子高中生或「Shinora」等,會將顏色奇特、設計風格古怪嘅小物件等大讚為「Kawaii(可愛)」嘅嘢。Hello Kitty、多啦A夢、發聲公仔、大型花朵等可愛小物,更會融入女生時尚配搭之中。

8|1998年(平成10年)

90年代後半「女子高中生」已完全成為潮流領軍人物。都內高中校服亦有唔少變化,男生由立領校服轉為西裝外套,女生由水手服轉為西裝外套及百褶裙。

9|1999年(平成11年)

小麥色皮膚辣妹

小麥色皮膚辣妹風格由涉谷開始影響至其他都道府縣。辣妹嘅其中一部分進化至小麥色皮膚辣妹,戴上假髮、貼假眼睫毛、曬至小麥色皮膚嘅風格,由涉谷中央街開始流行至全國。

裏原系女子

「裏原系」潮流波及至女性,而最受歡迎嘅風格為「Relax Casual」。以衛衣+貼身牛仔褲+波鞋嘅男性化衣著潮流為主流。

10|2000年(平成12年)

Gal-mix

配搭單品嘅設計師開始嶄露頭角,並成為衣著潮流嘅主角。主推鞋、袋、飾物設計師嘅小物類select shop逐漸增加。充滿個性嘅設計品增多,並成為造型嘅主角,慢慢步向重視配搭嘅時代。

11|2002年(平成14年)

Sport-mix

髮型保持女性化造型,casual又中性嘅衣著係打扮潮流。

12|2005年(平成17年)

母女裝

母女一齊shopping係一種潮流,時尚亦變得「ageless」化。呢個時期嘅涉谷Parco、LUMINE等時裝商場中,不難發現有母女二人一齊行街買衫嘅景況。

13|2006年(平成18年)

名媛系

類型同世代嘅界別消失,潮流逐漸邁向全球化。年輕人同成人之間嘅潮流時差幾乎不復存在,衣著潮流同世界潮流慢慢睇齊。

「我們的世代」冒起

「我們的世代」開始出現,並流行街頭攝影。個性化設計嘅衣服及飾物變得大眾化。進行街頭攝影(街拍)嘅媒體大量出現,「看與被看」嘅關係性變得曖昧。

14|2007年(平成19年)

「Baby Boom」世代大人化

簡單高質嘅服飾備受愛戴,「涉谷casual」世代迎接30歲,多人步入結婚、生仔嘅階段。重視素材及質感嘅「高質簡約」嘅衣著潮流成為大眾主流。

Gal & Gal-boy

外觀比任何嘢都重要嘅「潮妹」全盛期。比起品牌更重視外觀係主流時尚。《小惡魔ageha》嘅大人氣令辣妹文化變得更一般化,同時,《men’s knuckle》亦大受歡迎,大量Gal-boy以涉谷為中心不斷增加。

15|2008年(平成20年)

Fast Fashion系

H&M、TOPSHOP等「Fast Fashion系」開始進軍日本市場,令大眾更容易接觸及買入當季潮流衣飾。街上因此多咗好多驟眼望落已充滿「潮味」嘅人。

16|2009年(平成21年)

森林系

SNS與街拍衍生出嘅嶄新時尚風格。SNS變得大眾化,街拍亦成為community media。充滿個性嘅人能夠快速互相聯繫,嶄新嘅衣著風格以專門學校學生為中心擴散開。

17|2010年(平成22年)

受男性歡迎系

受Tokyo Girls Collection及受男性歡迎系女子大學生時代嘅影響,碎花迷你裙、蕾絲、涼鞋等等,充滿女性化感覺嘅可愛女子大學生為時尚主流。

18|2012年(平成24年)

新人類Junior世代

「新人類Junior世代」嘅潮流帶有cosplay感。街頭文化嘅主角為生於1990年代嘅90後「新人類Junior世代」。除咗衣著打扮之外,髮型及妝容亦偏向「Cosplay系」感覺。

19|2014年(平成26年)

雙子裝

由於將自拍嘅服飾配搭上載到SNS嘅年輕人大量增加,令可以「呃like」嘅潮流配搭變得大受歡迎。複數嘅相同服飾搭配「雙子裝」因而增加。

20|2015年(平成27年)

Super Mix

00年代打後若稱為「混合穿搭」嘅時代,咁10年代則為「進化版混合穿搭」。係一個無法好似以前曾經流行嘅衣著潮流及lifestyle咁,用「XX系」嚟概括嘅時代。

EXILE 系男裝風格

2008年日本文科省(教育局)將舞蹈定為初中嘅必修科,令享受跳舞嘅年輕人增加,開始模仿國內、外舞者衣著潮流嘅男性團體陸續出現。其中dance & vocal group EXILE更推出原創品牌「24karats(GOLD 24karats Diggers)」。之後陸續出現風格近似嘅時裝品牌,形成一種獨特嘅fashion group。呢種潮流嘅特徵為「偏向華麗的兄系」。

21|2016年(平成28年)

Vintage、Classic Style

2000年代出生=Y世代成為街頭潮流文化嘅主角,憧憬vintage復古感嘅昭和年代衣飾及設計嘅年輕人急增。復古配色及花紋成為衣著潮流。

Fashion Elite

Y世代除咗有自己嘅方向性,亦受父母世代嘅衣著潮流及文化背景所影響,潮流觸覺深刻反映出「二世」嘅要素。

Blogger、Model、Instagramer

Instagram變得大眾化,由大公司至中小企、自僱人士至一般用家都可自由發放潮流資訊,網絡上「看、被看」嘅空間變得一般化,posing都成為咗潮流嘅一部分。

22|2018年(平成30年)

混合穿搭風格為主流,色調亦偏向沉色嘅復古色系,主要以單色衣物作配搭。即使是女性,也偏向走「型格」簡約風。

延伸閱讀:【 FlyJapan 】穿搭技巧黃金法則 認識「線條」穿出潮味|日本妹教你時尚的A、I、X、Y

最新的日本入境要求詳情?

在入境日本前,建議先用Visit Japan Web完成一部分檢疫手續,便能更快速地入境日本,即睇使用教學,例如註冊步驟及同行家人如何填寫等,以及買定日本電話卡