去旅行嘅吃喝玩樂係可以講好多年嘅開心回憶，但如果不幸喺旅程撞鬼，呢個恐怖經歷都可以記足一世。
有個朋友唔知係黑仔定好彩，幾乎每次旅行都會撞鬼。於是每次飯敘講起去旅行，最後都會變成講鬼經歷分享，以下就係收集咗各位朋友去唔同國家嘅撞鬼經歷。
01 | 泰國鹹濕鬼
喺酒店被鬼壓可能好多人都試過，泰國亦係個猛鬼地方之一，但被鹹濕鬼騷擾嘅經歷就比較少見，仲要呢位朋友係男性……聽落就更加恐怖！佢話瞓到半夜感覺到有人不斷捉住佢下體，連續幾晚都係咁。大家聽到呢位朋友咁講，都話：「你賺到啦～」
但朋友話之後返到嚟香港，經常聽到屋企傳出嬰兒嘅哭聲，半夜仲有把女人聲唱歌。搵師傅睇過，都未講發生咩事，師傅已經話佢背後有個鬼嬰，原來朋友真係被鬼搞，仲同隻女鬼生咗個BB，跟住佢返嚟香港……
02 | 英國白煙
我成日都好奇，見到著旗袍長髮女鬼就聽得多，到底去到外國會唔會見到金髮女鬼？佢哋又會否講英文？可能真係文化唔同，外國好多見鬼經歷都唔會現真身，或只係見到一堆白煙。
而有朋友去到外國，真係見到團白煙喺酒店房嘅床上懸浮，幾分鐘都唔散。惟有落酒店大堂同職員講番件事，而職員好似知道發生咩事咁，問都冇問就幫朋友換房。
由於文化差別，不同國家所認知嘅靈體都會唔同。可能一個人生於外國，佢哋認知嘅鬼就係白煙，所以死後變成靈體都會係白煙，而唔係貞子……
03 | 大陸麻將枱
有朋友帶埋成班親戚返大陸玩，諗住只係住一晚，第二朝就離開，所以隨便搵咗間殘舊嘅賓館。入到去已經覺得氣氛有啲唔對路，周圍燈光一片昏暗，明顯係舊式大廈改裝而成。由於每一層只係四間房，所以需要分開幾層唔同房瞓。
其中一個親戚住最頂層，佢一打開房門就見到有張麻將枱，仲有三個著古裝嘅人坐咗喺度，望住親戚用京劇腔講：「來，就差你一個。」
親戚即刻衝落大堂要求換房，但職員死都話冇問題，再上番房，張麻將枱已經消失咗。最後親戚只好同其他人瞓同一間房。