撰文：Layne │ 圖片來源：Instagram │編輯：C Lam@Central、東方新地（原文刊於《東方新地》）｜GOtrip編輯：Jessie
香港女星Ig粉絲排行榜Top 20
20｜Janice Man 59.5萬
今年30歲的Janice Man，當年可謂o靚模鼻祖之一，如今當然唔再係嗰個帶點「MK味」的少女，近年愈來愈有女人味，進軍影視界亦有不俗表現。
19｜唐詩詠 61.4萬
唐詩詠喺眾多TVB女藝人當中，人氣之高，無庸置疑，而且亦係出晒名性格好、人緣好、朋友多，所以Ig上除了有大量詩詠靚相，都有唔少佢同其他藝人聚會的合照。
18｜陳敏之 62.3萬
「索腿天后」陳敏之憑一雙美腿，足以走遍「江湖」，雖然已為人母，不過敏之的樣貌、身材都完全冇走樣，難怪網民對佢喜愛有加啦！
17｜陳法拉 65萬
那些年華姐亞軍陳法拉，樣靚身材正毋須多介紹！雖然佢現時已離開大台，但生活多姿多采，早前於美國完成戲劇表演碩士課程，更是首個華人以全A的成績畢業！早前傳聞陳法拉已被金牌經理人Brian Swardstrom看中，簽約美國著名經理人公司United Talent Agency（UTA），為港爭光！
16｜姚子羚 68.6萬
「表哥」姚子羚樣子嬌媚，身材火辣，雖然已經38歲，但依然係不少男性心中的女神！姚子羚除了「表哥」出名，多年來亦被指與日本女優立花里子撞樣，亦被戲稱為「立花子羚」，不過子羚對於所有網民戲言都係大方面對、一笑置之，人靚又EQ高！
15｜李佳芯 71.5萬
有線主持出身Ali自從脫去「邪花」光環，人氣便長期高企，近年在多部劇集擔正都有不俗表現，今年更憑《BB來了》新手媽媽角色大獲好評，成為台慶「最佳女主角」熱門之一。唔知Ali可唔可以一嘗視后滋味呢？
李佳芯Ig突破70萬粉絲 派福利照答謝
加入TVB六年，李佳芯（Ali）由節目主持成功進身為電視劇女主角，今年更加係台慶視后大熱之一，Ali人氣爆燈。近日其Instagram更已擁有超過70萬followers ，為答謝一眾粉絲支持，Ali都好識做咁大派「福利照」，張相有成8萬幾個likes呀！
Ali留言道：「The way to celebrate my 700K Ig followers… fooooot high five！:))」相中見到Ali將頭髮紮起，露出迷人鎖骨，仲伸咗隻腳去鏡頭面前。雖然靚腳失焦，不過都引起唔少網民留言，大讚其腳趾修長，整體非常靚，要噴鼻血咁話喎！
李佳芯笑言冇「買粉絲」
Ali日前出席餐廳開幕活動，提到佢喺Ig發放「福利照」答謝粉絲，Ali表示都唔係咩福利，只不過係前排去浸溫泉影的，大家都知佢唔係走性感唔線。Ali又透露最近Ig突然多了不少followers，但佢對此冇咩追求，亦強調唔係「買粉絲」～
14｜鍾欣潼(阿嬌) 74.1萬
阿嬌鍾欣潼係圈中有名的美女，37歲但依然如青春少艾，今年與圈外男友賴弘國結婚後，人氣有增無減！
13｜佘詩曼 83.6萬
雖然佘詩曼近年已經冇接拍無綫劇，轉而投向大陸市場，不過人氣依然強勁，早前一部《延禧攻略》更令阿佘風頭一時無兩！雖然阿佘今年都四十有三，同現時新一代的花旦有的距離，但保養有道的阿佘依然如少女一般青春，魅力不減當年！
12｜容祖兒 83.6萬
Joey容祖兒多年來都係香港人氣最高的女歌手之一，粉絲眾多，千千萬萬人都係聽佢啲歌長大，佢啲金曲亦係唱K必選！
11｜胡杏兒 84.9萬
1999年港姐季軍胡杏兒，同上面唔少女星一樣已離開TVB，現時專心做人妻人母，而且佢個仔Brendon Lee超級可愛，為近年萌爆星二代之一。可能杏兒Ig有唔少媽媽級粉絲，為了睇Baby Lee而follow！
10｜周秀娜 84.8萬
可算係「o靚模元老」的娜姐周秀娜，雖然早已不再係當初嗰位靠露肉出位的性感少女，近年打扮愈見成熟愈見女人味，而且專做演技派演員路線，但反而令人更喜歡佢！
9｜岑麗香 93.6萬
香香公主岑麗香長相甜美可愛，性格真摯不造作，加上親切友善的笑容， 為觀眾緣數一數二的女藝人。可惜香香現時已離開大台，雖然短期內未有機會再睇佢拍劇，不過希望佢好快有喜訊公布，由香香公主升呢做香香媽媽啦！
8｜黃翠如 94.9萬
由旅遊節目主持成功轉型成為女演員的翠如BB，現已為無綫一線花旦，愛笑傻大姐一般貼地的性格深受粉絲歡迎，其Ig當中有不少切合佢輕熟女年齡的靚相，亦有佢同眾多藝人朋友的合照，相當精彩～
7｜楊千嬅 103萬
楊千嬅除了在歌唱方面的成就無庸置疑，在電影方面的成績亦是成就佢高人氣的因素！遲啲會喺無綫劇《多功能老婆》睇到佢演出～
6｜蔡卓妍(阿Sa) 104萬
另一位人氣歌手，Twins中的阿Sa蔡卓妍，在Ig上坐擁逾103萬followers。隨著年歲漸長，阿Sa由當初稚嫩的小女孩，變成了一位成熟的女性，渾身散發的女人味更是叫人欲罷不能。
5｜胡定欣 128萬
TVB藝員中，在Ig人氣最高的一定係胡定欣！兩屆視后定欣有幾受歡迎都毋須多講啦！可惜佢近日盛傳約滿後會離開大台，如果冇得睇佢拍劇，真係相當可惜！
4｜薛凱琪 142萬
Fiona薛凱琪最近人氣可能不復當年，不過Ig粉絲有增無減，在網絡上人氣依舊！
3｜應采兒 156萬
采兒本來就係個大美女，網絡上人氣高企是常識吧！加上佢近年與老公陳小春及可愛兒子Jasper參加不同綜藝節目，在各地大受歡迎，可謂母憑子貴？
2｜G.E.M. 鄧紫棋 429萬
16歲就出道的G.E.M.鄧紫棋，歌藝固然出眾，自從登上中國的歌唱節目後，在內地迅速走紅，紅到出太空，Ig四百幾萬粉絲，小兒科啦！
1｜Angelababy 684萬
全Ig最高人氣的香港女藝人、「Ig女王」，就係Angelababy！