仲記得我細個嗰陣，成日聽見周圍嘅大人都話，一定要1997年之前移民，如果唔係，香港人就慘了！當年我仲讀緊小學，好多同學都話會移民。
「冇錢嘅咪繼續捱囉！有錢就好移民走喇！」
直到近年，開始聽到身邊嘅朋友都話：「唉～冇錢嘅咪繼續捱囉！唔會餓死嘅，辛苦啲啫！有錢就好移民走喇！」
點解要移民？點解要離開自己出世嘅屋企？相信好多人都會答，因為香港已經冇得救喇！離開都係迫不得已！我好鍾意香港㗎，但愛莫能助！
雖然我唔太明白，口裡說討厭被強國入侵搶奪香港人權益，但身體卻很誠實，移民去外國搶奪其他國家權益呢種自相矛盾嘅行為。
好多人都會話自己會做個良好市民，唔會隨地屙，會增加競爭力，所以唔算搶奪！亦有人話香港移民只屬少數，點同強國每日150個人相比呢？所以都唔算搶奪吖！
無論睇法係點都冇所謂啦！決心要離開嘅人，永遠都留唔住。但到底走去邊度好呢？有人話台灣、韓國、日本……有人直頭衝出亞洲，移民到更遠嘅國家。
移民去日韓台係咪真係幸福？係咪全世界得香港人最可憐呢？
台灣
台灣最近選舉一樣有唔公平事件發生，雖然投票率高，但民意都有強烈分歧，同性婚姻合法化都被否決，所以政治環境未必符合香港人嘅「理想」，日漸被強國化了。
另一方面，好多人都話台灣生活消費低，香港人帶少少錢去就可以做皇帝。但移民唔同去旅行！喺當地工作，領台灣薪水，支出同房租一樣係生活負擔之一。
日本
日本可能係好多香港人心目中嘅天堂，但都只限於旅遊。真實一面唔知大家又有冇留意到？日本嘅自殺率高係全國性問題，最高峰2014年平均每日都有70人自殺。而男性自殺比率係70%。
因為日本工作壓力非常大，唔同於香港「魚唔過塘唔肥」，日本人大多數唔會轉工，同一間公司做十幾年先有機會升職，相反跳槽會令公司覺得你表現不佳先會被公司放棄，所以跳槽嘅結果，大多數都係由頭做起。
平時我哋唔鍾意某上司，同同事關係唔太好，一轉工就另一個世界。而日本上班族為咗生活，就算被針對都只能夠困死喺同一間公司，係一個死胡同。
韓國
韓國oppa人人都喜愛～好多香港女仔都話想做韓國人妻，諗住日日都可以上演韓劇入面嘅浪漫時刻。
但其實韓國係一個男尊女卑、階級觀念非常重嘅國家。如果真係嫁咗去韓國，丈夫又生於傳統家庭，可能就要受少少苦了。
首先買樓方面，男方雖然會負責畀錢買樓，但屋入面所有家具都要由女方負責。
家家有本難唸的經，每個國家都有各自嘅優點同缺點。其實細心諗下，香港生活都有唔少優點，點解一定要「隔籬飯香」呢？