機場行李|香港機場曾多年於全球最佳排名位居前列,不少遊客大讚香港機場好正,於2023年Skytrax世界最佳機場排行榜中,香港國際機場跌至33位。當中有一項投訴連查小欣都表示不滿,它就是行李出得慢!曾有過外國媒體教「拎行李攻略」,例如最遲check-in、貼易碎標籤等,今次就講下啲行李同埋機場其實點處理啲行李啦!

地勤親解香港機場行李出得慢原因 最遲check-in+貼易碎標籤會出得快啲?

早前查小欣從馬拉西亞返港,她在Facebook上載行李認領區的照片並在帖文中寫到:「Can’t believe it!太唔似香港嘅效率,航班21:19到港,現在是21:37還未見到行李,影都冇!#so slow #hongkongairport」,到底香港機場行李點解出得慢?

延伸閱讀:查小欣不滿香港機場攞行李要18分鐘 遭網民炮轟離地

1|最後check-in嘅疑惑

其實啲行李喺counter落咗去地牢,就會開始裝箱,即係有時你喺閘口望落去停機坪,一架拖車拖住一個個銀色鐵箱嗰啲。因為其實點樣裝啲箱上飛機係要分重量平衡,最後你件行李去咗邊隻箱,裝咗去最中間定係近艙門啲嘅,真係冇咩人知。仲要睇你搭咩機種,細飛機嗰啲我哋叫bulkload 機,即係根本冇箱,好似車尾箱一樣,計好重量就放喺邊一格平衡好咁。最後一個check-in件行李,亦唔等於一定放你件行李喺門口,就算係放喺門口,都係落晒啲行李先車走⋯⋯返客運大樓⋯⋯咁其實你幾時check-in,都唔係太大關係。

機場 行李 Check-in先後與行李次序無關。
Check-in先後與行李次序無關。(圖片來源:GOtrip編輯部)

2|貼易碎標籤?

道理上,只係見到個標籤會輕手啲,同快唔快係冇咩關係。不過,如果件件行李係唔係都貼個易碎⋯⋯咁,你明啦!有需要先貼啦!我都明工作人員應該件件行李都如珠如寶咁對待⋯⋯都係,你懂的。不過,認真,同快唔快冇咩關係。

機場 行李 易碎標籤。
易碎標籤。(圖片來源:香港國際機場)

3|你過關太快了

呢個係一個錯覺,你去外國,你係passport,你排非本地人,隊又長啲,檢查又耐啲,你試下去美國,仲要問多你幾句,你出到關,乜行李都到晒了。返香港一過e道,一分鐘就入咗境,去行李帶企得耐就覺得等得耐。

機場 行李 e道過關快,變相感覺行李等得更耐。
e道過關快,變相感覺行李等得更耐。(圖片來源:香港國際機場)

4|人手不足

又話說,呢個係社會問題,人工唔夠高、工作地點遠、工時長、日曬雨淋⋯⋯都係冇人想入嚟做嘅原因。有網友話睇你坐咩航空公司,其實基本上所有外地嘅航空公司喺香港都冇自己職員,其實都係請代理公司做,仲要其實係得幾間⋯⋯即係你坐邊間都好,可能都係同一班人做,同你買邊張機票冇咩關係。不過,唔同航空公司係可能有少少分別嘅,下面再講。

機場 行李 很多外地航空公司都是同一班地勤人員。
很多外地航空公司都是同一班地勤人員。(圖片來源:GOtrip編輯部)

5|硬件問題

機場行李帶不勝負荷,有時黃金時間落機,你會見到三幾隻飛機喺同一條行李帶出,呢隻未出完又到下一隻,根本唔夠用,輸送帶又唔可以放啲行李太密,會jam,到時仲慢。

機場 行李 輸送帶有限,難以應付同時多班飛機的行李量。
輸送帶有限,難以應付同時多班飛機的行李量。(圖片來源:GOtrip編輯部)

6|航空公司分別

上面講過,雖然唔同航空公司,代理公司可能都一樣,呢個係人手問題。不過,如果你坐某啲航空公司,佢哋到港後泊嘅位置都有可能唔一樣,就算依家只淨返T1(T2預計2024年先會開返),運送時間同距離,都可以有唔同。咁當然,你行返去過關嘅時間都唔一樣嘅⋯⋯

機場 行李 視乎飛機降落的停泊位置。
視乎飛機降落的停泊位置。(圖片來源:香港國際機場)

7|有級別嘅會員、頭等、商務會快啲

好似係廢話,不過循例都講下,有級別嘅會員、頭等、商務嘅乘客寄行李,地勤都會掛個標籤上去,地牢嘅同事睇到會分開裝箱,飛機飛咗出去之後,都會通知當地,呢啲行李喺咩位置會優先處理,要講明有級別嘅會員係因為大部分會員卡最基本嘅級別,其實同儲分卡一樣,冇任何特別之處。另外,因應唔同航空公司都有唔同規矩,有啲可能係:最頂級嘅會員(咩鑽石呀、終身白金呀)頭等式處理,中等會員(金卡、銀卡)就當商務客咁處理,快慢都有別。

機場 行李 會員都有分級,普通會員通常只有儲分功能,沒有特別優待。
會員都有分級,普通會員通常只有儲分功能,沒有特別優待。(圖片來源:國泰航空官網圖片)

8|放門口嘅行李呢?

有啲航空公司會放要轉機嘅行李、輪椅、BB車之類喺艙門附近,以最快速度喺閘口畀返個客用,或者即刻送去要轉駁嘅飛機。到港嘅普通行李相比之下,當然冇咁優先了。

機場 行李 轉機的行李會較一般行李快。
轉機的行李會較一般行李快。(圖片來源:GOtrip編輯部)

大致上行李嘅事情就係咁,坦白講,真係好難講有咩方法令行李快啲出,除咗做會員或坐商務⋯⋯希望有政策可以令多啲人肯入機場做啦!另外,其實機管局自家出咗個行李tag叫MyTag(唔係賣廣告),唔係可以令你件行李出得快啲,但係你喺外地返嚟時,check-in件行李之前,登記咗落個app度,返嚟香港佢就會彈個notification畀你,話你知件行李大約幾時會到行李帶⋯⋯起碼唔使齋企呆等囉!有興趣就試下啦!上香港機場官網睇下啦!

機場 行李 大家可以買個MyTag行李通),返嚟香港佢就會彈個notification畀你,話你知件行李大約幾時會到行李帶
大家可以買個MyTag(行李通),返嚟香港佢就會彈個notification畀你,話你知件行李大約幾時會到行李帶(圖片來源:YouTube@hkairportofficial影片截圖)

機場 行李 MyTag行李通)
MyTag(行李通)(圖片來源:YouTube@hkairportofficial)

撰文:地勤夫妻去旅行圖片來源:香港國際機場、GOtrip編輯部、YouTube@hkairportofficial影片截圖