【香港機場】話說幾日前,有網友覺得香港機場好靚,基本上每日都會去呢度返工嘅我哋,可能因為審美疲勞,冇各位網友每次嚟機場上飛機感覺咁大,睇到呢個話題,又重新令我再一次覺得,其實我哋呢個機場又真係幾勁幾靚嘅。

撰文:地勤夫妻去旅行|圖片來源:香港國際機場

地勤眼中的香港機場-優點

1|好多外國人都讚

喺check-in counter,可能好多客第一次嚟香港一落機就已經搭咗車走,冇上過去departure hall睇過。好多時有客落巴士行過條橋落嚟行過嚟check-in counter都會講句:「WOW!This airport is HUGE!」的確係,當你去過好多外國機場,佢哋嘅機場都冇呢種上而下望落嚟嘅feel,真係好HUGE。我返工遲到要跑去打卡嗰下,都覺得好HUGE⋯⋯

離港大堂天橋位置正好可以從上而下欣賞機場的設計。

2|有in-town check-in

依家可能好多機場都已經有in-town check-in,對於好多外國遊客嚟講,都係好方便,近如台北都係呢兩年先有in-town check-in呢樣嘢,香港其實20年前已經有,仲要廿幾分鐘車就到機場,其實係好方便嘅。不過對於地勤嚟講,就除咗機場返工外,我哋有時仲要返香港/九龍站,要帶住套制服跑嚟跑去就有啲慘,仲要如果返早的話,5點幾就要開工,真係好眼瞓呀⋯⋯係呀!5點幾就已經喺in-town check-in得㗎喇!

香港站和九龍站自從開通後,已提供免費市區預辦登機服務,十分方便。

3|真係好繁忙

好多外國嘅職員嚟到香港機場做嘢,例如過嚟整飛機、過嚟香港training咁,都會話我哋個機場真係好忙,佢哋通常都係望住個天見到啲飛機不停上不停落,有時一分鐘都未到就下一隻嚟,佢哋都會好讚嘆。我哋都覺得返工好忙,點解可以咁多客。

幾乎每隔1分鐘就有一班飛機在香港機場起飛或降落。

可惜呢個機場都有啲缺點⋯⋯

1|長期唔夠人

唔理邊間公司、咩崗位,都係長期唔夠人。好多時候打去唔同部門,都係唔夠人手做嘢,所以見到網友話點解啲行李出得咁慢,都係呢個原因:唔夠人!有時連接機嘅人同車都冇呀,唔好話行李⋯⋯有時連啲空姐上飛機用嘅車都冇呀⋯⋯check-in counter有人病咗就冇人。輪椅服務都冇人,最經典有同事打咗電話去幫個客搵輪椅服務,打咗400次都冇通過呀! 400次呀!難過訂演唱會飛呀!有冇人有興趣入嚟做呀?

無論運貨還是運人的車都經常短缺。

行李經常因冇車等問題而延誤送到機場。

2|T2的設計

T2性質係個大商場,但可惜好多地方都好浪費。話說當初根本就冇諗住係做客運大樓,後期先改方針做客運大樓,先至有一個只可以出境冇得入境嘅奇奇怪怪客運大樓。同埋喺T2開過counter嘅同事都會覺得T1嘅行李磅係好用過T2嘅好多,明明係新嘢,但差過舊嘢真係R晒頭。Anyway,依家又傳T2要拆了。

T2比T1好的地方,可能就是更多如三哥等較廉價的餐廳。

T2還有唐記包點。

3|搞啲令人R晒頭嘅活動

香港機場唔知點解,間唔時就會搞下啲活動,有啲靜態少少嘅係好OK嘅,都開心嘅。但有時唔知點解又唱歌又跳舞,喺櫃枱同個客講嘢,都要叫破喉嚨先聽得到,真係多謝晒。

機場接機大堂不時會舉行展覽、音樂會等活動。

有時會因此而聚集人流,令本身已經很多人的機場變得更擁擠。

Anyway,小編試過喺機場返工,嗰種可以四圍行、地方大、觀景開揚嘅感覺係其他工冇嘅。就算以前有份工係望住維港景,都係唔夠機場嗰種開揚同活動性咁大。同埋喺機場返工有樣嘢唔同,係大部分都係後生仔,感覺好玩啲。同埋每一日都會唔同,因為你每一日都唔知會點樣過⋯⋯

香港機場採用全玻璃窗設計,不論站在哪個位置都可欣賞風景。

在機場工作就是有種自由、好玩的感覺。