話說山竹走咗無耐,又多咗個潭美走出嚟,又係超強颱風,今次就殺去日本,今年日本真係多災多難。山竹都破咗好多紀錄,連機場都少有地全日航班取消(平時都係取消半日),而小編呢啲小薯梗係要返工啦!十號波啫!一日世界未末日都要返工。

超強颱風下飛機去晒邊?

話說山竹當日喺 16 號 8 點前已經開始影響機場運作,當日 9 號波下,一隻飛往新加坡嘅飛機飛出後,成個機場就如死城一樣,人影都冇個(係呀,9 號都飛得,都係風向問題)。隻飛機轉口機,香港再飛走,好多機場朋友都食晒花生,見佢飛得走,都拍晒手掌敬個禮畀佢,厲害!

機場一個人都冇,係一個奇景(得番職員),另外難得一見嘅奇景係連飛機都見唔到幾隻。

飛機究竟去晒邊呢?小編就收到風話機管局同天文台都話個風唔係人咁品,驚啲飛機放喺度會吹壞晒,一陣又好似大阪咁樣浸晒上嚟,啲飛機都捱唔住,所以就叫晒啲香港base嘅航空公司飛走晒啲飛機出去避風。

大台有好多長線航班,飛出去十幾個鐘,飛返嚟又十幾粒鐘,返到嚟香港,個風都散咗了。另外幾間就飛咗好多機出去其他城市度擺,擺到個風散咗先飛返嚟開工。甚至乎有啲航空公司迫住要飛隻吉機(冇客嘅,行內叫ferry out)出去啲offline port(即係本身呢間航空公司冇飛開嘅航點)去避風。你諗下,的士都唔想空車出返嚟,其實應該都好重皮,都係為咗避個風。

所以,如果你有留意 16 號航班近 9 成都取消晒,但係 17 號天文台趕住 7 點前落咗個 8 號波,林鄭又叫啲老闆體諒下,但係仲有好多 17 號早上嘅航班被迫延誤同取消,就係因為好多飛機仲喺外地趕緊返嚟,返到嚟先趕到開下午啲機。

以往嘅風,通常都係飛機照擺喺香港,好多飛機都會盡量爭取入油,行內俗稱「砸油」,等隻飛機可以有多啲重量,唔會咁易吹得郁而造成有咩損傷。聽聞有某隻飛機因為壞咗走唔甩,油又入滿都驚唔夠重,搞到要上大量大樽裝礦泉水上去「砸」住架飛機。

其實打風前,真係有好多準備工夫要做,啲高層又有好多會要開,最慘係個風嘅路線間唔中又轉下,啲plans亂晒咁話。

Anyway,都要讚下香港機場喺個咁勁嘅風吹過嚟嘅時候,損傷都唔算話好嚴重,睇番自己同行互傳嘅消息都係有登機橋吹爛咗,相比起市區嘅受損程度,都算係咁。

嚟緊又有颱風去日本,又係超級颱風,預測路徑又係橫掃全日本,去日本嘅朋友真係要多多留意,同埋check下自己旅遊保險嘅事宜了。

另外,順便介紹下機場人好鍾意用嘅兩個apps,一個係Windy.com – 睇天氣用,豐富嘅色彩可以睇到颱風有幾勁。除咗睇風,我自己去睇星睇極光去旅行都好有用,真心推介。

下載:iOSAndroid

另一個係flightradar24 – 可以睇到即時飛機位置,預計到達時間之類,對飛機有興趣嘅,可以睇到好多嘢。