澳門早前有食店推出麻糬雞蛋仔，瘋狂洗版！最近香港都有小食店推出綠茶麻糬雞蛋仔，每粒雞蛋仔都有麻糬粒，煙韌香甜。愛鹹香的，則可試試紫菜肉鬆雞蛋仔和鹹蛋黃梳乎厘班戟，5間分店都有得食，即睇地址詳情！
記者：Joan｜ 攝影：Meck（原文刊於《新假期》網站）
連鎖小食店Bove 綠茶麻糬新口味
這間小食店主打雞蛋仔和梳乎厘班戟，最新出的綠茶麻糬口味，一推出即大受歡迎，試過一日便賣出超過一百底！蛋漿加入宇治抹茶粉製作，每粒雞蛋仔內都會加粒原味麻糬，非常足料！麻糬加熱後會發脹，一口咬下非常煙韌，甚至有拉絲效果，煙韌控必試！不過麻糬的甜味太霸道，有點蓋過了抹茶的甘香，吃多有點膩，記住搵friend share食！
同場新品：紫菜肉鬆雞蛋仔
如果你偏好鹹食的，不妨試試同樣新出的紫菜肉鬆口味，原味蛋漿上會鋪上滿滿的肉鬆和原塊紫菜，分量滿瀉，非常慷慨！還未夠喉的，也可試試店內的另一主打梳乎厘班戟，即叫即製，非繁忙時間都要等十分鐘，有鹹蛋黃、花生醬、朱古力等鹹、甜口味，選擇都算多！