話說最強颱風將於星期日襲港,今次個風真係勁過之前嗰啲好多,你見啲airlines反應幾快就知,先祝願各位旅客同工作人員都能夠平安度過先(我自己都要返工)。循例講句,打風之後,機場都會一片混亂,航班取消咗就最好唔好出機場喇!或者可以留意番我哋之前出過關於天氣不佳嘅文章啦!

始終地勤都係一份客戶服務嘅工作,受氣難免都有,打風起唔到飛,你有壓力,我有壓力,我哋都理解,但有時有啲真係難以捉摸佢哋嘅思路……今日就同大家分享下每日都會遇到嘅呢類客人。
圖片來源 :網上圖片、新傳媒資料室

搲upgrade機位嘅客 創意力滿分!

有時真係好佩服人類嘅創意,只要有著數嘅事,就可以激發創意。都市傳說所傳聞嘅:話自己生日、度蜜月、結婚周年、紅事白事、唔舒服……之類奇形怪狀乜理由都有。通常,我哋聽到今日有冇upgrade呢個問題都會熟練地、禮貌地婉拒你。

創意01|「都賣唔晒㗎啦!點解唔可以free畀我?」

「請問今日有冇upgrade呀?」
「有呀!請問係想用積分定係補錢呢?」 – 畀個signal話你知冇free upgrade喇!

可惜,依然會有人有一顆鍥而不捨嘅決心去追問:

「免費嗰啲冇喇?」
「唔好意思,今日冇呀!」
「咁你哋商務滿唔滿吖?」
「唔滿呀!所以你想用積分或者補錢都可以的。」 – 已經耐心地再暗示。

然後我就聽過最有創意嘅理由出現了:

「你哋啲位擺喺度都冇人買㗎啦!咁都唔幫我upgrade上去!」

我不禁倒抽一口涼氣,日本卡通嘅烏鴉飛過,就連空氣都為佢停止流動,相信佢平時喺唔同場合都會有類似對白:

「你餐廳啲飯都賣唔晒㗎啦!點解唔可以free畀我?

「你舖頭啲衫都賣唔晒㗎啦!點解唔可以free畀我?」

「你超級市場啲嘢都賣唔晒㗎啦!點解唔可以free畀我?」

創意02|「我對腳好長」

另外一個創意理由就係「我對腳好長」。當下我以為佢對腳係喺佢自己都唔知嘅情況下一夜之間長咗,當然了,呢個理由就唔太充分同合理,upgrade嘅願望就事與願違。

然後就退而求其次說:「咁緊急出口位呢?」 – 可惜依家除咗廉航,好多傳統航空公司都會將緊急出口位要加錢嚟賣,最後呢位客人從經濟角度去選擇咗一個普通嘅路口位。

當然啦!其實我哋唔會特登刁難客人,最緊要係你得到你接受到嘅嘢,然後離開櫃枱。

創意03|「我要照顧我小朋友」

仲有就係,有部分一家大細嘅客人,唔知咩情況之下,剩係買咗商務艙嘅飛畀小朋友(可能真係買唔到啦!我唔假設佢動機)。
然後就會話:「我要照顧我小朋友,你免費upgrade我吖!」

呢個情況由於並不罕見,我哋都會避重就輕地提出其他options:
「我哋可以提供 unaccompanied minor service 畀你小朋友,空中服務員會幫你照顧佢,或者可以選擇將小朋友轉番做經濟艙吖!」

然後通常都會有一大輪討價還價嘅拉鋸戰,然後又會有客人提出上到飛機用經濟艙嘅大人同商務艙嘅小朋友對掉座位。當然了,基於票價不一,我哋同空中服務員都唔會容許咁做。然後就係一大堆服務唔好、不近人情、唔flexible、ridiculous嘅意見提出。

當然,專業嘅地勤,憑住每日都儲經驗值升lvl嘅EQ,都會笑住口話:「下次啦!」然後放登機證祝佢哋一路好走。

心入面嗰句就唔寫出來,反正出唔到街,你懂的。但真心,對於嗰種鍥而不捨嘅精神、跳脫嘅創意,以及長城咁厚嘅面皮,我係衷心佩服嘅。關於免費upgrade這種事,有興趣可以睇下之前嘅文章

下一頁:入得貴賓室的5種乘客|會員都未必入得!|地勤教路