撰文：Keii｜圖片來源：《林修の今でしょう！講座3時間SP》
番茄營養價值
番茄中含有兩大營養素，首先係大家都耳熟能詳嘅茄紅素，繼而就係有預防動脈硬化嘅「新營養素X」！
發現呢種新營養素嘅永井龍兒醫生，將為大家解釋番茄內含嘅驚人營養素係啲咩嚟、有咩作用。
人嘅身體布滿粗粗幼幼、長長短短嘅血管，若果將所有血管駁成一條直線，長度將達到10萬km！醫生話呢個長度足足等同圍繞地球2周半！
而一旦某一部分嘅血管受損或有任何傷害，則會令個體全體老化。因此，保護血管健康，應該係任何年齡層都應該注意！唔好等到出事先嚟正視呀！
節目組去到夏季盛產番茄嘅北海道，找來喺自家農園種植，且每日都食番茄嘅人士做採訪。透過專業儀器測試血管年齡，發現每日食2個番茄以上嘅受訪人士，血管年齡都比實際歲數年輕！呢位老伯伯嘅血管年齡甚至比實際年輕咗10歲！
原來呢啲都係茄紅素嘅功勞！茄紅素唔單止有美白效果，更加可以增加血液中嘅高密度脂蛋白膽固醇，令血管保持年輕。
身體內嘅所有血管，會因紫外線同積累嘅壓力而日漸變硬老化。
血管一旦酸化，便會導致機能退化，身體就會開始變得衰弱。
茄紅素中含有防止血管酸化嘅抗酸化成分，延緩身體衰老。
茄紅素能有效抑制活性酸素增生，保持體內血管健康。
而且，茄紅素能夠增加稱為高密度脂蛋白，一種好嘅膽固醇數量，有效防止血管堵塞。
研究指出，連續一個月，每日食300g番茄(1個半)，高密度脂蛋白嘅濃度，相較攝取番茄前高出15％。
咁大個番茄，邊部分含有最多茄紅素呢？答案就係外皮！
醫生表示，色澤愈紅嘅番茄，所含有嘅茄紅素就愈豐富。
而以茄紅素嘅吸收量嚟比較嘅話，相比起夜晚食用，朝早食嘅話，茄紅素嘅吸收濃度高出2倍以上！
咁係因為朝早係處於空腹狀態，呢個狀態可令營養素更容易被吸收，亦提升咗吸收率。
重點來了，要點食先可以提高吸收率呢？醫生指，加熱烹煮番茄可令水分揮發，營養素更加濃縮，繼而提升茄紅素嘅吸收率。
最好嘅食用方法，就係番茄+橄欖油嘅組合！
相比起就咁食番茄，加埋橄欖油一齊食，可以使茄紅素嘅吸收率提高1.6倍！
點解同橄欖油一齊食會吸收得更好呢？咁係因為茄紅素係一種不溶於水，但溶於油嘅營養素。同橄欖油一齊食用，可更容易攝取到茄紅素。
除咗加橄欖油，烹調時加埋蒜頭、洋蔥，可令茄紅素更好地被吸收。
營養師就話，簡單啲嘅做法，番茄炒蛋都可以有好好嘅吸收效果。
因為雞蛋中含有良質油分，所以，可以提升茄紅素吸收率。
茄紅素一日所需嘅攝取量，等同於1杯160ml嘅番茄汁、2個半新鮮番茄、4湯匙茄汁。
即使唔係好鍾意食番茄，每日只食1湯匙嘅茄汁，已經可以攝取到足夠嘅茄紅素！
而另一種非常神秘嘅新營養素，就係七葉甘糖A！
呢種成分係番茄獨有嘅成分。
七葉甘糖A係喺2003年永井醫生同熊本大學進行共同研究先至發現出嚟嘅成分。
呢種成分對於改善動脈硬化非常有用。動脈硬化係因為血管裡堆疊咗脂肪，令血管被堵塞。
而七葉甘糖A可有效減少堵塞喺血管中嘅脂肪，預防動脈硬化。
研究中曾以老鼠做生物實驗，找來3隻同樣有動脈硬化徵狀嘅老鼠，喺同樣嘅飼育環境下，僅給予唔同成分嘅糧食，經監測嚟睇下分別有咩變化。
分別檢驗3隻老鼠嘅血管斷面畫像，發現投以普通糧食嘅A鼠血管中有脂肪積聚，而投以100mg七葉甘糖A嘅C鼠，血管中嘅脂肪則大大減少！
醫生推薦七葉甘糖A嘅1日攝取量，相當於食2～3個車厘茄。
七葉甘糖A現正以減少血管內脂肪嘅高效成分進行醫學研究。
點解會咁遲先發現到呢種營養素呢？醫生解釋因為七葉甘糖A係透明成分，唔似茄紅素般一目了然，於是就睇漏咗，直至2003年先被發現。
七葉甘糖A遍布成個番茄，而外皮係含量最高嘅部分。
之但係！有別於茄紅素不怕受熱，七葉甘糖A一旦受熱，就會被分解！
如果用100℃以上熱力加熱，會令七葉甘糖A減少！
呢個時候，最好就將生番茄切片，再澆上橄欖油咁食用，咁就可以保存七葉甘糖A嘅營養成分。
唔想凍食嘅，可考慮喺已加熱嘅蔬菜中拌入生番茄。呢個做法唔單止可以以最好方式攝取茄紅素，更加可以最大限度一同攝取七葉甘糖A！
另一方面，夏季時，可選擇將冷凍番茄磨成蓉，再加入冷麵汁中，作為伴菜一同享用。因為如果存放於雪櫃，番茄好快就會劣化，但如果攞去冷藏凍結，就能夠保存營養不流失。嘉賓主持試食完，都大讚好味又易入口呀！