【紋身可入日本溫泉】日本藝人Ryuchell喺兩邊膊頭紋上咗妻子PECO本名,TETSUKO同兒子LINK個名,並喺Twitter公布紋身事。冇錯!喺傳統嘅日本人社會,一個公眾人物公開講自己紋咗身,自然會惹來各方爭議。但呢件事,亦令日本開始從另一角度審視紋身呢件事,仲檢討緊是否全面開放公眾浴場予紋身者!

撰文:Keii|圖片來源:網絡、日本觀光廳

紋身可入日本溫泉?!

位於千葉縣成田市嘅溫泉設施「大和之湯」,全面准許紋身者使用,日本網友隨即瘋狂轉發大讚「做法英明」!雖然街上嘅部分錢湯,都准許一啲圖案不過分浮誇嘅紋身者使用,但須注意嘅係,日歸溫泉(不提供住宿服務)、高級錢湯等,一般錢湯以外嘅公眾浴場,大部分都謝絕紋身者使用。

成田機場附近嘅日歸溫泉「大和之湯」全面允許紋身者出入兼使用。

自1988年開幕以來,「大和之湯」都允許紋身者使用,素來廣受好評,而且幾乎冇同其他客人發生過衝突,或者收過「點解會有紋身嘅人喺度」嘅投訴。負責人指,因為鄰近成田機場,外籍客人非常多,有紋身嘅外國人絕非少見,而且現今時代,唔少人都認為紋身係潮流,而並非一直以來「紋身=黑社會」嘅問題。

56%住宿設施拒絕紋身者入浴

喺2015年嘅觀光局調查中,全國酒店、旅館,有56%拒絕紋身者使用,允許嘅有31%,條件性使用嘅佔約13%(用布或膠貼遮住紋身)。為咗應付急增嘅外籍遊客,2016年起,觀光局便推行3個對策:1)用膠貼等工具遮蓋紋身部分;2)控制可供入浴時間帶;3)帶到獨立浴場。但對於遮唔住嘅大型紋身,觀光局就未有明確指引,多數交由營運方自行決定。

過半以上嘅公眾浴場設施都唔允許紋身者使用,想浸溫泉嘅,就要事先查詢喇!

改制應付2020東京奧運?!

日本人社會較傳統,唔少人仲覺得有紋身=壞人/黑社會。日本「溫浴振興會」都唔敢全面解禁,但認為可試行逐漸解禁,以緩和發生衝突嘅機會。

2020東京奧運勢必有大量外籍人士來日,而且有紋身嘅外國運動員亦非佔少數,睇嚟一個東京奧運都改變咗唔少日本嘅傳統習慣/做法!紋身者能使用溫泉設施嘅日子,看來不遠矣!

有紋身嘅奧運游泳美國選手Anthony Ervin。

延伸閱讀:紋身者禁止出入日本海灘、泳池、溫泉|背後原這樣意思!

相關文章