圖片來源：網上圖片、新傳媒資料室
地勤想你幫手做的5件事
01｜先做好網上check-in
買咗機票唔等於幫你留好埋位，仲有某啲廉航係要畀附加費去買個位。依家好多航空公司都會於航班出發前 48 小時開放航班在網上開始check-in，亦都係因為咁，若果你係同你不可分離嘅另一半去玩，定係一家大細有老有嫩需要照顧，就早啲上網劃定位，因為人哋都會咁做。不過當時間過得愈耐，啲位就會被人攞到散晒。
即使你冇做到網上check-in，去到機場櫃枱，職員都會盡量幫你安排，但空位會所餘無幾，所以未必可以完全做到你想要嘅嘢。因此穩陣起見，自己揀好咗先最穩陣，亦都可以加快你辦理手續嘅等候時間。
02｜檢查好證件、簽證，早啲到機場
先講證件，有冇過期？仲有某些國家係規定要有至少半年有效期，有啲就三個月，有啲就只要你入境到出境都唔過期就得，個個國家都唔一樣，記得check清楚。好多國家都對呢樣嘢非常非常嚴謹，係差一日都唔得，冇情講。
仲有，有啲國家嘅簽證係有開始生效日期，即係未到生效嗰日，個簽證係未生效嘅，就算攞到個簽證都要睇清楚，唔好大安旨意，小心小心！唔好話職員唔幫你，畀你過去目的地試下，好多國家都要求check-in時，已經要將乘客資料發送去當地入境局驗證，過唔到就係過唔到，亦都出唔到登機證。仲有，送咗一個不符合入境規格嘅乘客去當地，航空公司係會被罰款嘅，所以一律冇得試！得就得，唔得就係唔得。
咁早啲去機場做乜呢？我哋每日，係每日都會見到有老公帶錯老婆證件，阿媽帶咗阿仔證件，返屋企攞或者叫人攞嚟都要時間，除非你檢查清楚，如果唔係就早啲到啦（仲要排隊check-in同過關呢）！
03｜隨時轉閘，留意廣播
閘口隨時轉，尤其喺天氣唔好嘅時候，更加冇可能會轉完再轉，都係因為塞飛機，呢隻走唔到，下一隻冇位泊。同埋留意航班號碼，千祈唔好睇目的地就以為嗰隻係你隻機。例如一個夜晚有幾隻倫敦機又國泰又英航又維珍，成日有人去錯，然後miss咗隻機。
04｜早啲去閘口
當飛機就到起飛時間，但你仲未到閘口時，飛機底嘅職員已經幫你搵定你件行李，若果你太遲都未到（登機證上面有寫最遲登機時間），你件行李會被卸下，然後系統就會將你喺名單上移除，地勤會將登機閘門關閉，去飛機門同空勤人員核對總客數，然後關機艙門，機師會同指揮塔表示準備好出發，等待後推飛機。只要開始咗就唔會停，亦都冇得返轉頭，就算你呢個時間出現，飛機未走，都唔會放番你上去（當年就有段好出名嘅片喺網上熱播）。所以shopping、買咖啡，記得要睇住時間喇！
05｜去到閘口，準備好證件
去到閘口攞定證件出嚟，機口入閘時，要再check一下，方便職員時，亦都方便自己。