【Duffy新朋友】突然收到消息,Duffy又多一個新朋友!上個月先多咗個鍾意整餅的朋友「Cookie」,今次係一隻龜!非常……有創意!究竟呢個朋友係點識嘅呢?又有咩賣點呢?

撰文:迪士琪 | 圖片來源:Disney Parks Blog、香港迪士尼樂園

新朋友名字叫「Olu」

Fans應該好清楚,Duffy識每個新朋友都有段古,今次都唔例外!話說米奇同Duffy,因為想搵份完美的生日禮物畀ShellieMay,所以揚帆出海周圍搵。

途中被ukulele的聲音吸引住,引領到一個海灣,原來玩ukulele就係「Olu」!見面之後,Olu仲唱咗首歌畀米奇同Duffy聽!

Duffy聽完之後,覺得歌聲非常漂亮,認為係最好的生日禮物,所以就帶咗Olu去ShellieMay個生日party,唱歌畀ShellieMay聽!

點先見到Olu?

今個月初非常之破天荒,Duffy的新朋友唔喺日本初登場,而係喺香港迪士尼樂園,fans都未係好認識阿Cookie,一個月都唔夠,Duffy又話有新朋友!今次係隻龜,個名叫做Olu,而佢唔會喺任何一個國家的迪士尼樂園登場(至少暫時都唔會)!咁點先可以見到佢呢?原來係要去到……夏威夷!

由今年7月27日起,Olu一系列的商品將會獨家於夏威夷Ko Olina的Aulani Disney Resort & Spa Aulani內登場,Duffy fans要集郵的話,今次要花多啲錢!