【日本神社】話咁快就嚟到新一年喇!日本稱新年一月為正月,喺呢段期間,即使唔係成日去拜神嘅虔誠信眾,大家都會到神社或佛寺裡參拜,亦即係大家都耳熟能詳嘅「初詣」!呢個一月去咗日本玩嘅你,不妨去下神社參拜,感受下日本嘅正月文化,為新一年祈願!

撰文:Carmen|圖片來源:網絡、相關機構

關東篇

1|赤坂冰川神社

東京三大結緣神社之一嘅「赤坂冰川神社」,係好多日本人選擇舉行神前婚禮嘅熱門神社,聞說喺社殿裡舉行婚禮,婚後生活會美滿幸福。鄰近日本潮流大街嘅六本木,被天然紀念物嘅神木所圍繞,結緣能量喺日本人評價中數一數二!每月均會舉行一次「結緣參拜-良緣祈願祭-」,而且參加人數只限定30名!

<基本資料>
赤坂冰川神社
地址:東京都港區赤坂6-10-12(赤坂駅、六本木駅徒步8分鐘)
網頁:akasakahikawa.or.jp

2|日枝神社

神社東面係國會議事堂、首相官邸、眾議院議員會館,可以話係位於東京正中心嘅神社。喺社殿嘅左右邊配置咗一對夫婦「神猿像」。狛犬、仁王像、石獅等一對嘅對像並不罕見,但用於祭神嘅猿猴,更要係夫婦就非常少有。但作為阿吽像,果然都係一對夫婦比較合適。呢個亦係神社被稱為結緣神社嘅緣由。

<基本資料>
日枝神社
地址:東京都千代田區永田町2丁目10番5號(東京Metro赤坂駅、溜池山王駅等徒步3分鐘)
網頁:hiejinja.net/

3|今戶神社

被稱為招財貓發源地嘅「今戶神社」,係日本知名嘅結緣能量景點,參拜者以年輕女性為主嘅有名戀愛神社。近年更出現唔少中咗高額彩金嘅當選者,以能提升財運嘅開運神社而成為話題。

<基本資料>
今戶神社
地址:東京都台東區今戶1-5-22(地下鐵淺草駅6番出口徒步約15分鐘)

4|東京大神宮

「東京大神宮」係非常有名嘅結緣神社,能有效提高戀愛運嘅「戀愛御神籤」、「願文」、「御守」擁有超高人氣,唔少全國各地嘅參拜者都係為咗呢啲慕名而來。有戀愛之神坐鎮嘅「東京大神宮」,相信能為參拜者們帶來美好良緣!神宮更被稱為「東京嘅伊勢大神」,御祭神包括日本國民嘅總氏神:「天照皇大神」。

<基本資料>
東京大神宮
地址:東京都千代田區富士見2-4-1(JR、東京Metro、都營地下鐵大江戶線飯田橋駅徒步5分鐘)
網頁:okyodaijingu.or.jp/

5|大國魂神社

由京王線府中駅徒步5分鐘,就到達被一片翠綠包圍,洋溢神聖空氣嘅「大國魂神社」。係東京五社之一,芸芸神社當中歷史較長,據稱創立已有111年,係祭祠稱為大國魂大神嘅武藏國守護神嘅神社。此大神同出雲嘅大國主神係同神,係著名嘅福神。

作為結緣神社亦非常有名,喺神社內舉行婚禮嘅情侶也絕非少數。由車站至鳥居為止,總長約500m嘅攀木路稱為「馬場大門櫸並木」,以櫸並木而言,係唯一獲得國家指定嘅天然紀念物。

<基本資料>
大國魂神社
地址:東京都府中市宮町3-1(京王線府中駅徒步5分鐘)
網頁:ookunitamajinja.or.jp/

6|新田神社

從古至今都從未改變嘅古寺「新田神社」,除咗由古時一直延續嘅,為參拜者帶來幸福嘅能力以外,更融合咗新時代嘅結緣能量,成為非常特別嘅結緣能量景點「LOVE神社」,受到日本民眾嘅注目。係一間能祈求良緣成就、戀愛成就、結婚成就、夫婦圓滿嘅新感覺結緣神社,鍾意藝術嘅都推薦前往!

<基本資料>
新田神社
地址:東京都大田區矢口1丁目21(東急多摩川線武藏新田駅徒步5分鐘)
網頁:nittajinja.org/

7|九頭龍神社

「九頭龍神社」所祭祠嘅九頭龍大神,本來係一條四出作惡,令人苦不堪言嘅毒龍,經過奈良時代嘅僧侶,萬卷上人為其調伏祈禱,最終懺悔,繼而成為神龍。現時則以結緣神、開運隆盛、守護財運、商賣繁盛之神,獲得大眾信奉。

近年更因結緣效用之巨大,而多次獲日本媒體採訪,喺女性之間極有人氣!每月13日會舉行月次祭嘅特別參拜祈禱,但13日以外去慢慢參拜都係非常推薦嘅方式!

<基本資料>
九頭龍神社
地址:神奈川縣足柄下郡箱根町元箱根80-1(從The Prince箱根蘆之湖沿遊步道走)
網頁:hakonejinja.or.jp/

8|江島神社

「江島神社」位於神奈片縣藤澤市最南面嘅觀光勝地–江之島。江島神社分為三社,放置咗多個弁財天(七福神之一,象徵口才、音樂及財富的女神)嘅能量景點「邊津宮」、一整日中都會有美人聚集嘅「中津宮」,最後則是龍神傳奇發源地,接近岩屋洞窟嘅「奧津宮」。

其中,最有結緣能力嘅係位於「邊津宮」嘅「結緣樹」。御神木邊掛上咗無數「希望能與 那個人結緣」嘅參拜者滿滿的希望。

<基本資料>
江島神社
地址:神奈川縣藤澤市江之島2丁目3番8號(小田急線片瀨江之島駅、江之島電鐵江之島駅、湘南monorail湘南江之島各站徒步約15~23分鐘)
網頁:enoshimajinja.or.jp/

9|葛原岡神社

神社位於鎌倉地標源氏山嘅一角,於明治20年(1887年),為祭祠效力於後醍醐天皇嘅高級官員,日野俊基而建成嘅神社,但最近作為鎌倉嘅戀愛之神而獲得大量女性嘅人氣。原因係只需將心願掛到大石上,簡單的許願方法,但據聞非常之有效果!

成功結緣後,唔好忘記要回禮參拜!神社內有和紙「摺紙之神」授予,成功後,請摺紙鶴感謝大黑神明啊!

<基本資料>
葛原岡神社
地址:神奈川縣鎌倉市梶原5-9-1(JR鎌倉駅 西口下車 錢洗弁財天路線徒步35分鐘)
網頁:kuzuharaoka.jp/

10|玉前神社

處於Ley Line上,東面起點(千葉縣長生郡)嘅「玉前神社」,係關東數一數二嘅能量景點。祭祠神武天皇嘅母親,玉依姫命,對於結緣、懷孕、安產、育先等非常靈驗,喺女性中非常有人氣!據說日本歷史武將人物源頼朝,喺妻子・政子懷孕時,曾到過「玉前神社」祈求妻子能順利產子。

喺風水學角度方面睇,「玉前神社」位於東京最大嘅吉方位,嚟祈求開運、商賣繁盛嘅人好多。

<基本資料>
玉前神社
地址:千葉縣長生郡一宮町一宮3048(JR上總一之宮駅徒步8分鐘)
網頁:tamasaki.org/

11|中之島大橋

日本流傳住一個「紅色橋傳說」,如果年輕男女能夠背著其中一方走完紅橋,2人就能結合。呢條傳說中嘅紅色橋就係千葉縣木更津市嘅「中之島大橋」。跨越木更津海嘅「中之島大橋」,係日本第一高,離地27米嘅行人天橋。日劇《木更津貓眼》令呢個傳說成為話題,現時更成為「戀人聖地」!就算唔相信呢個傳說,都可以喺浪漫嘅紅橋上欣賞東京灣美景!

<基本資料>
中之島大橋
前往方法:JR木更津駅西口徒歩20分鐘

12|川越冰川神社

「川越冰川神社」除咗求與戀人嘅姻緣,祈求工作及同朋友嘅緣分都係非常出名嘅能量景點。神社每朝8點,每日會派出限定20個免費「結緣玉」,祈求有心人可以獲取良緣。

結緣玉由巫女手製,經神職人員作法,擁有超高人氣!清晨便會現有排隊人士。雖然平日排隊輪候嘅人較少,但都未必等同一定攞到,所以都係推薦早啲去排!

<基本資料>
川越冰川神社
地址:埼玉縣川越市宮下町2-11-3(川越駅下車,轉乘東武巴士・7號巴士站,到宮下町下車)
網頁:www.kawagoehikawa.jp/

13|川越八幡宮

喺「川越八幡宮」裡,有會令願望實現嘅不可思議力量嘅樹葉!作為結緣嘅能量景點,通常都會想到附近嘅川越冰川神社,但其實「川越八幡宮」係同冰川神社並駕齊驅!「川越八幡宮」境內嘅「多羅葉」同「銀杏木」係最重結緣能量景點。嚟參拜祈求良緣、舉行婚禮嘅人絕非少數。

<基本資料>
川越八幡宮
地址:埼玉縣川越市南通町19-3(川越駅東口徒歩約6分鐘)
網頁:kawagoe-hachimangu.net/

14|出雲大社東京分祠

「出雲大社東京分祠」係祭祠出雲大社嘅御祭神・大國主大神嘅分靈,係都內唯一分祠。大國主大神以結緣神見稱,亦都係深受日本人信奉嘅福神,除咗愛情,亦能祈求生活幸福,同不同人結下良緣。出雲大社位於島根縣,雖然日本唔少信眾依然會不辭勞苦咁去本社參拜,但對於時間並不充裕嘅外國遊客而言,則可以去東京分祠參拜,據說效果同去本社參拜一樣!

<基本資料>
出雲大社東京分祠
地址:東京都港區六本木7丁目18-5(東京Metro日比谷線、都營地下鐵大江戶線六本木駅徒步約3分鐘)
網頁:izumotaisya-tokyobunshi.com/

近畿地區篇

15|貴船神社

以戀愛為生嘅平安時代女流歌人・和泉式部,邊抱持戀愛及人生之苦,邊到「貴船神社」參拜,挽回離她而去嘅丈夫的愛。沿河川走會有3座神社,其中最細間嘅「結社」(ゆいのやしろ)就係靈驗嘅結緣神社。七夕、紅葉季等時節會亮起彩燈,喺色彩鮮艷亮麗嘅新綠及紅葉中若隱若現。

要令心願實現,首先要喺結社前嘅本宮求得「結文」,再寫上你嘅心願。然後再到結社境內稱為「結處」嘅神域,將寫有心願嘅結文綑綁起。

<基本資料>
貴船神社
地址:京都府京都市左京區鞍馬貴船町180(叡山電車貴船口駅下車,轉乘京都巴士到貴船下車)
網頁:kifunejinja.jp/

16|今宮神社

無論點努力,都無法獲取良緣嘅話,喺芸芸結緣神社當中,特別向你推薦位於京都嘅「今宮神社」!雖然都有不同意見,但「今宮神社」就是「玉之輿」嘅語源由來。

將軍・德川家光對出身卑微嘅京都蔬果店店主女兒・阿玉一見鍾情,娶為側室,搖身一變成為大人物。因為係經過阿玉才能復興嘅神社,所以都有被稱作「玉之輿神社」。

<基本資料>
今宮神社
地址:京都府京都市北區紫野今宮町21(乘市營巴士46番,於今宮神社前下車便到達)
網頁:kyoto-jinjacho.or.jp/

17|下鴨神社

「下鴨神社」為京都嘅世界遺產,境內有座小神社名為「相生社」,係現時日本國內非常受注目嘅結緣能量熱點。祭祠被稱為將宇宙嘅生成力神格化嘅「產靈神」,係由古時已經作為結緣神而被民眾所熟知。此外,將值得祝賀嘅事喚作「相生」都係由呢度開始嘅。雖然係座細小嘅神社,但係一處參拜者絡驛不絕嘅人氣結緣熱點。

<基本資料>
下鴨神社
地址:京都市左京區下鴨泉川町59(京都駅~下鴨神社前(或糺之森前)再轉乘市營巴士4番・205番)
網頁:shimogamo-jinja.or.jp/

18|八坂神社

「八坂神社」係從前已同當地人非常親近嘅神社,祇園嘅藝妓都會前往參拜,係祇園具象徵性嘅神社。

可供祈求商賣繁盛、五穀豐穰、消除厄運、學業成就等各種心願,但神社境內,有祭祠結緣神・大國主神嘅「大國主社」,作為結緣熱點一樣超有人氣。「八坂神社」嘅社務所更有「戀愛神籤」提供。

此外,境內嘅攝社,美御前社據說有美容效果,亦有美容水湧出,喺女性參拜者之間非常具有人氣。

<基本資料>
八坂神社
地址:京都府京都市東山區祇園町北側625(京阪祇園四条駅徒歩約5分鐘)
網頁:yasaka-jinja.or.jp/

19|地主神社

位於清水寺境內嘅,京都最古老嘅結緣神「地主神社」,可說是結緣神社中最具代表性嘅神社。

喺本殿前面,有2顆相距10米嘅守護石,稱為「戀愛占卜石」。傳說閉上眼,由第一顆石順利走到第二顆石,你所祈求嘅戀愛就能成就。而呢2顆「戀愛占卜石」並未有記載係由幾時開始存在,但有說由繩文時代便已出現。

<基本資料>
地主神社
地址:京都府京都市東山區清水一丁目317(JR京都駅、近鐵京都駅轉乘市營巴士206・100系統約12分鐘)
網頁:jishujinja.or.jp/

20|安井金比羅宮

有安井金比羅神坐鎮嘅京都東山「安井金比羅宮」,作為能「砍斷惡緣,締結良緣」嘅神社而知名。唔單止住在附近嘅人,全國各地都有慕名而來嘅參拜者,人潮不斷。

而呢座神社最出名嘅係「斷緣結緣碑」,掛有大量心願紙條嘅大石。因為受到各參拜者嘅依賴,寫有心願嘅滿滿紙條將大石完全蓋住,基本上好難睇到大石原態。

<基本資料>
安井金比羅宮
地址:京都府京都市東山區東大路松原上ル下弁天町70(京阪本線祇園四条駅徒歩10分鐘)
網頁:yasui-konpiragu.or.jp/

21|露天神社

以「初天神」之名獲得大阪人親近嘅曾根崎「露天神社」,因著《人形淨瑠璃》嘅作者,近松門左衛門嘅代表作《曾根崎心中》故事舞台,而成為知名戀愛能量熱點!

另外,喺新年初詣等大時節,可同重要嘅人一齊進行「美人祈願」。呢個「美人祈願」係於繪馬上描繪自己嘅容貌,有誠實描繪自己內心之意。去呢度參拜並非只為保持容貌上嘅美麗,更能讓參拜者發現更多自己內心嘅一面。

<基本資料>
露天神社
地址:大阪府大阪市北區曾根崎2丁目5番4號(JR大阪駅、梅田駅徒歩5~10分鐘)
網頁:tuyutenjin.com/

22|玉造稻荷神社

經過豐臣・德川期,一直作為大阪城嘅鎮守神被崇敬嘅「玉造稻荷神社」境內的「胞衣塚大明神」,係祭祠豐臣秀賴同母親・淀之緣嘅神社。胞衣係指BB出生時一齊出嚟嘅卵膜、胎盤等,而據說秀賴出生時就正是被胞衣包裹住。喺大明神前嘅「緣分掛繩」,係以連繫住真田幸村嘅「真田紐」製成嘅緣分掛繩,參拜者寫好心願後結到掛繩上,就能將男女嘅緣分、工作之緣等心願託付給神明。

<基本資料>
玉造稻荷神社
地址:大阪府大阪市中央區玉造2丁目3番8號(由JR玉造駅向大阪城方面行約500米)
網頁:www.inari.or.jp/

23|生國魂神社(鴫野神社)

有2,700年歷史嘅大阪最古老神社「生國魂神社」,位於天王寺區・上本町歡樂街正中心,神社境內更有11座境內社,祭祠著金物、建築、水產業、藝能等眾多特別嘅神明。

其中,「鴫野神社」作為女性守護神而集合咗眾多信奉者,因而成為戀愛能量熱點。古時,豐臣秀吉嘅側室・淀殿下更是非常信奉呢座神社,令其知名度更廣。除咗祈求結緣,為祈求絕緣嘅「崖緣占」亦極具人氣。

<基本資料>
生國魂神社(鴫野神社)
地址:大阪府大阪市天王寺區生玉町13-9(地下鐵谷町線・千日前線谷町九丁目駅徒歩約4分鐘。近鐵上本町駅徒歩約9分鐘)

24|生田神社

「生田神社」位於兵庫縣神戶市嘅中心地,由三宮徒步15分鐘便能到達,對旅行者嚟講,係相當方便嘅能量景點。「生田神社」作為結緣神相當有名,戰前已經能舉行神前結婚儀式,現時都有好多情侶會喺本殿舉行婚禮。

雖然數量不多,但神社境內都有繪馬、御神籤等,結緣御守都可自己選擇適合自己嘅款式。而其中一種就係「水神籤」,將「水神籤」放進位於本殿後方嘅生田之森中嘅水池,運勢就會慢慢浮出。

<基本資料>
生田神社
地址:兵庫縣神戶市中央區下山手通1丁目2-1(JR三之宮駅.私鐵各線三宮駅往北徒歩10分鐘)
網頁:ikutajinja.or.jp/

25|熊野那智大社

「熊野那智大社」祭祠嘅主神係夫須美神,以保佑農林、水產、漁業嘅守護神,及諸願成就嘅神明見稱。曾經被稱為「結緣之宮」,據說從古到今對結緣嘅祈願都非常靈驗。

<基本資料>
熊野那智大社
地址:和歌山縣東牟婁郡那智勝浦町那智山1番地(從紀伊勝浦駅,轉乘熊野交通路線巴士那智山,車程約30分鐘,在終點巴士站下車,徒歩15分鐘)
網頁:kumanonachitaisha.or.jp/

26|神明神社(石神さん)

石神社係位於鳥羽市大差町中嘅神明神社裡的一座末社,祭神係一名稱為玉依姬命嘅女性神明,以高度約60cm嘅石作為神體。因為大差町嘅海女們會頻繁地向石神祈禱安全大漁,因此流傳「石神必定會為女性實現1個願望」嘅說法。

當講到「有咗呢樣嘢就能提升運氣」,就要數「石神御守」呢樣幸運物。呢個吊飾型嘅御守,係放入咗於三重縣養殖嘅AKOYA珍珠。據聞珍珠帶有提升戀愛運嘅效果!

<基本資料>
神明神社(石神さん)
地址:三重縣鳥羽市相差町1385(從鳥羽駅轉乘「海鷗巴士」(かもめバス)往国崎方面,於相差站下車,由鳥羽駅去約40分鐘)
網頁:toba-osatsu.jp/

27|猿田彦神社

傳說喺日本神話中,天孫降臨時,指引瓊瓊杵尊到高千穗嘅就係猿田彦大神。因此猿田彦大神又有「指引道路的大神」嘅稱號,參拜者從日本全國慕名而來,希望能獲得大神指引人生能向好嘅道路前進。境內更有祭祠藝能、結緣神・天宇受売命嘅「佐瑠女神社」,記得要祈求良緣!

<基本資料>
猿田彦神社
地址:伊勢市宇治浦田2丁目1-10(從JR・近鐵伊勢市駅轉乘內宮前行巴士約15分鐘,在猿田彦神社前下車)
網頁:sarutahikojinja.or.jp/

28|二見興玉神社

三重縣二見浦係一個擁有清幼石沙嘅海岸,古來,前往參拜「伊勢神宮」嘅人均會先到二見浦進行稱為「禊祓」嘅淨化儀式。此習慣稱為「濱參宮」,到「伊勢神宮」參拜時,不忘造訪一下!此外,「二見興玉神社」中亦有好出名嘅「夫婦岩」、「天岩屋」。對於結緣、夫婦和洽、淨化等等,各種各樣嘅願望都有效果。而且神社有多款設計可愛嘅結緣御守,所以前來求姻緣嘅參拜者亦眾多。

<基本資料>
二見興玉神社
地址:三重縣伊勢市二見町江575(JR參宮線二見浦駅徒歩約15分鐘)
網頁:kankomie.or.jp/

29|自凝島神社(おのころ島神社)

如果想行勻日本嘅能量景點,最唔可以錯過嘅就係日本最初嘅神話之地:淡路島。四面環海,樹木眾多嘅淡路島,保留咗好多古人留下嘅,有神明寄居嘅自然崇拜聖地。

有著國土起源傳說嘅「自凝島神社」,必要造訪嘅地點就係綁有紅、白色粗繩嘅「鶺鴒石」。祈求新遇見嘅參拜者請按白、紅順序手握粗繩,然後誠心許願。

<基本資料>
自凝島神社
地址:兵庫縣南淡路市榎列下幡多415番地(自駕:神戶淡路鳴門自動車道,走出西淡三原IC後約12分鐘)
網頁:freedom.ne.jp/onokoro/

30|沼島

作為國土起源傳說候補地嘅「沼島」,位於離淡路島本島約4km,周圍約只有10km嘅小島。

沼島海上立有高度約30m嘅「上立神岩」,傳說日本神話中嘅伊奘諾尊同伊奘冉尊,就係喺呢塊天之御柱前結為夫婦,所以「上立神岩」從古到今都被世人所尊崇。時至今時,因為岩石中央現有一個心形形狀,所以更成為咗祈求夫婦關係融洽、戀愛成就等參拜者及情侶當中甚有人氣嘅能量景點。

<基本資料>
沼島
地址:兵庫縣南淡路市沼島(由淡路島土生港出發10分鐘、淡路島洲本港出發60分鐘(沼島汽船))
網頁:nushima-yoshijin.jp/

延伸閱讀:【日本自由行】福岡5日4夜行程|食盡肥美燒蠔+九州Outlet掃貨攻略+貓島打卡!

延伸閱讀:【日本自由行】和歌山自駕遊5日4夜行程|魚市場活海鮮BBQ+燒肉+拉麵!

最新的日本入境要求詳情?

在入境日本前,建議先用Visit Japan Web完成一部分檢疫手續,便能更快速地入境日本,即睇使用教學,例如註冊步驟及同行家人如何填寫等,以及買定日本電話卡

大阪有什麼好去處及景點推介?

大阪自由行必去這些景點,當中包括USJ大阪環球影城,即睇USJ門票及交通攻略。然而,去旅行怎可忽視美食部分?必到這些人氣美食餐廳,當中更有蟹宴放題平價米芝蓮餐廳之選。另外,不得不到溫泉旅館/按摩店溫泉主題樂園全新門真大型三井Outlet商場臨空城OUTLET。準備到日本賞櫻花的大家,可預先一看日本櫻花花期預測