有沒有試過去旅行花2小時排隊吃一碗拉麵,然後發現中伏了?到底是排人龍店的人都沒有味蕾,還是大家都想割蓆?

旅行要食得好  不一定要去人龍店

老老實實,無論喺香港定外地,阿珍我都好少排隊食飯,去泰國三日兩夜或者歐洲一個星期,無論如何,旅行的時間一定不夠,要好好分輕重,用成兩個鐘排隊食壽司,定係去國立美術館?畀我揀,阿珍一定揀最折衷嘅方法:搵一間好食又唔使排隊,食完開開心心去美術館!

當然,阿珍都有中伏嘅時候,新加坡排雞飯、胡志明市的牛河、巴黎的Bistro、華倫西亞的Paella,最出名嘅都試過,可能因為期望太高,真正吃到就有點失望,反而誤打誤撞進入嘅舖頭,就有時有驚喜!

網民大數所謂伏店:

可能由於阿珍我有食神關照(講完自己都想反白眼),老實講,中伏都唔算太多。近日阿珍個老死畀咗連登一個post我睇,見到網民講嘅嘢,唔好意思,其實我覺得有少少抵死,當中包括:

北京天安門附近的鹽水雪條

大佬,嗰度係世界上最繁忙嘅景點,你喺方圓10里內食嘢,十間有九間半係畀遊客食,內地咩食物都做得出,gimmick居多,北京又唔係咩鹽產區,無啦啦賣鹽水雪條,係咪有點古怪呢?而最古怪係仲有人買!

日本四天王拉麵

連閃令令書都唔寫了,你仲去,實在係自討苦吃。

台北苦瓜檸檬汁

其實台灣有好多小食,香港人都食不慣,例如他們好喜歡食米糕,就不是阿珍杯茶,台南嘅小食太甜,阿珍我都食唔慣,但食唔慣就代表中伏?

築地炸蔬菜物

築地無啦啦食炸物,你自己檢討下。

京都清水寺附近的咖啡糰丸子

京都人最執著、最傳統、最自豪自己嘅日本文化,做咗幾十年嘅糯米糰丸子,唔係醬油味,就是艾草丶抹茶,無啦啦係唔會做咖啡味,但做得咖啡味丸子嘅日本人,佢哋可能只為賣多一點錢,以多啲花款來吸引外地人,如你。

德國酸菜

網民話:「好鍾意食熟菜,去德國出差半個月,食晚飯一見伴碟有碗菜,就一大羹放入口,即刻嘔番出嚟,之後餐餐見到sauerkraut就叫佢哋轉第二款伴碟畀我。」
畀碟菜心炒牛肉你好唔好?

瑞士鹿雜

而你覺得會好吃?不如都係食番十九座啦!

澳洲嗰條唔知乜X嘢嘅黑色嘅糖

係咪甘草?你連食物嘅名稱都不知道便批評,就好似阿珍依家連你個名都唔知,而批評你on9。

結論是,如果覺得伏,首先要檢討一下自己有冇調查清楚,那間係咪專開嚟呃遊客,係咪同當地文化背道而馳,特登為噱頭而做出來嘅食物,通常都唔好食。

識食當然去本地人都排嘅店!

再者,要排就排當地人排嘅店啦!唔一定100%好吃,但起碼連當地人都認同的話,最少是地道,唔好食都算是試過了。最近的經驗是在新加坡,大型的熟食中心像Maxwell,阿珍都去過了,本地人以外,遊客都多。

時間許可,不妨去小型嘅熟食中心,比如Golden Mile Complex,中午時分都是當地嘅上班族,早上就是老人家,當然不是每一檔都那麼出色,排隊的店當中,東風發雞飯只是平凡,釀豆腐確實出色,蝦麵都有驚喜。

下一頁:日本大阪地震 | 香港人的天性表露無遺