澳門幾乎每年都有新酒店落成,而且間間都是豪華至極的五星酒店。新濠天地旗下的第三期酒店 Morpheus 摩珀斯 終於踏入完工倒數,預計於6月15日開幕。就算只離開幕一個月都未有任何相片流出,酒店方面也沒有提供任何環境相,今次記者有幸做先頭部隊入去參觀,一覽最新酒店內的神秘面紗!

撰文:Kassidy|圖片來源:Day、官方圖片

摩珀斯 . 中空設計  已故建築師遺作

興建多時,每次經過都只見到酒店外形,連裡面的餐廳、酒店房型,甚至酒店大堂都冇相片流出。全球第一間用「自由形態外骨骼結構」的摩天大廈,剩係 lobby 都有 35 米高,由已故建築師 Zaha Hadid 設計,全間酒店提供 770 間客房(冇得睇),仲有聽落非常勁的水療中心(都冇得睇),應該要到正式開幕時,先會有更多酒店內部相片!

摩珀斯 Morpheus|澳門最新酒店|15/6 開幕!率先睇:法國甜品、Sky Pool
門口就有埋酒店中英文名。

摩珀斯 Morpheus|澳門最新酒店|15/6 開幕!率先睇:法國甜品、Sky Pool
樓底高,空間感超足夠,一入門口就能看到 check-in 位置。

摩珀斯 Morpheus|澳門最新酒店|15/6 開幕!率先睇:法國甜品、Sky Pool
要影到酒店全棟外表,只可以走到 Grand Hyatt 的 Mezza9 出面泳池位置影。

摩珀斯 Morpheus|澳門最新酒店|15/6 開幕!率先睇:法國甜品、Sky Pool
大堂的電腦相,對比之下,側邊裝飾都造得幾足,不過電梯的紅色玻璃就比較暗淡了。

甜品界畢加索  Pierre Hermé 統領酒店甜品

第一次去法國時,已經被 Pierre Hermé 的馬卡龍吸引,甜品界畢卡索的稱號絕非浪得虛名。今次團隊進駐摩珀斯,統領全棟酒店的甜品項目,食材大部分由法國進口,而且食譜皆來自法國總部,定必教人眼前一亮,只食甜品都夠晒滿足。不過價錢方面就⋯⋯未知,香港間 Pierre Hermé 都賣緊 20 蚊一粒馬卡龍,今次呢間應該跟隔壁 MGM 的 Janice Wong 不相伯仲。

大堂的其中一邊就是 Pierre Hermé 的餐廳位置。

主廚講到明,食譜都來自法國總部,可以吃到法國 Pierre Hermé 的味道。

離地 130 米  倒轉睇sky pool!

泳池基本上都是澳門酒店的重點項目,今次呢間就將泳池設於40樓高空之上,本來滿心歡喜以為咁堅,澳門終於有個 40 樓高 的infinity pool,原來只是一個 sky pool,水深 1.2 米,兩邊都有落地大玻璃欣賞路氹景色,亦未有設置按摩池。想打卡的話,呢度都有個天空之鏡,勢必成為澳門新泳池打卡熱點。

泳池會有埋太陽傘同櫈,可以慢慢嘆。

泳池內有塊天空之鏡,加埋背後的建築,影相一流!

泳池的另一邊可以睇到一望無際的景色。

1秒1層 12部子彈升降機

酒店話有另一個賣點,就係 12 部子彈全景升降機,1秒上到1層咁話。不過因為用觸控板面,好容易撳錯樓層。快就幾快嘅,不過只得42層,要咁快趕住去邊?

電梯未算大部,最多可企12個人左右,如果加上行李就非常小空間了。

上升速度也有一秒一層的感覺。

房價、套票:未有定案

最令人驚艷的房型一定是「 Pool Villa」,因為非常神秘,所以記者手上都只得兩張官方相,幾錢就梗係冇公布,連房型都未能入去參觀,只知房內應該有個泳池,同埋每間客房都會配備 Dyson 風筒同 Hermés 浴室用品。酒店定位五星級,不過離開幕就只剩下一個月,記者入場所見都尚有不少地方未完善,電掣都仍然走晒出嚟,房價、套票又未有資料,所以會唔會準時開幕,仍是未知之數。

電腦相就話會有 「Pool Villa」 房型,實質出嚟感覺如何,就有待確認。

相關文章