做得我老母有餘嘅台籍同事阿蘭,每次見到我都會同我傾感情事。經歷婚姻失敗,仔大女大,佢想搵個男人陪自己過埋下半生,但嫁過極大男人主義的日本男後,對日本男性敬而遠之,居然想搵港男!

文章授權:花旗空姐血淚史|圖片來源:新傳媒資料庫、電視截圖|編輯:MM

港男是最佳男友!

台籍大媽同事 獨愛港男

「你是香港人,一定認識不少香港男生的,可以介紹給我嗎?」

嘩!當正我係果欄中的江湖大嫂兼批發商大把貨咁喎!真係有筍盤,我都私有化咗先啦!

「為甚麼喜歡香港男生呢?」我問。

我非常好奇,宇宙級頑劣港女唔係一向極度不屑港男㗎咩?

論男士風度,唔為女士開車門已輸洋腸成截;

論英語程度,ABC一開口即車尾燈都見唔到;

論家財萬貫,有冇強國富二代三代咁疊水先;

論男子氣概,不及服過兵役嘅台、韓、坡男;

論文化優勢,日男撼贏晒冇內涵扮日系潮男;

論國際視野,仲有幾多個沈旭暉可以咁屈機?

我識得嘅港男,個類型光譜都好闊,(想當年)阿源啲friends至青年才俊都有,都唔會以偏概全。不過我實在聽過唔少港女數臭港男萬宗罪,簡單用三個字概括就係「冇X用」。照計除咗一批睇香港身分證分上嘅北方佳麗,港男市場應該已經窄過深圳河河套㗎喇喎!

係港女太公主病令港男卻步,定係港男真係咁「冇X用」而被港女鄙視?呢種高登大戰she.com惡性循環,似乎爭論多年,仍未分出高下。

電影《原諒他77次》

大數港男優勝之處

阿蘭詳細分析:「經驗之談,日韓男也是不做家務和不尊重女性的大男人;台灣男生即使當過兵,還不怎麼獨立自主、軟弱無力;大陸男生粗魯沒內涵沒文化;新加坡男生自以為是、囂張拔扈……」

日劇《逃避雖可恥但有用》

「其他亞裔,馬來西亞、印尼、越南、泰國、菲律賓、印度等男生老土又不成大器;西方人浪漫有餘忠誠不足。香港男生溫柔、體貼、顧家,有主見之餘,卻懂遷就女性,夠國際化又會兩文三語,打扮新潮又整齊乾淨,務實之中帶點浪漫,是男友首選呢!」

無綫節目《 嫁到這世界邊端 》

閱男無數嘅佢,果真摩擦力很強!當然,佢觀察到嘅,我都觀察到,只係冇乜港男吼我肥矮毒,有又一聲不響飛鳩咗我,所以我鮮有機會感受到港男有幾體貼囉!

「聽你說,港男似乎真不錯耶!可惜我來金山這麼多年,工作以外的地方也沒認識過港男。香港同事不是hehe就是有家室的人夫,我也很難幫到你啊!」

阿蘭聽到我咁講有少少失望,但我堅喺灣區冇識過港男喎!

嫁港男嘅大媽周太:港男好吃香。

有一日,我同另一個嫁港男嘅大媽周太一齊飛,佢好唔鍾意阿蘭,我冇同佢講阿蘭嘅嘢,只係請教佢點樣識到港男。

「三藩市係冇洛杉磯咁多香港人㗎!你搬去San Gabriel、Arcadia、Monterey Park、Pasadena、Temple City,去UCLA、USC讀番一兩個學期,大把優質港男你揀,你轉唔轉base吖?」

(題外話:講起飛去LA,早排飛SFO-LAX,明明只係一個鐘唔使嘅機程,居然喺滑行準備衝上雲霄時剎停,嗰下嚇到我鼻哥窿冇肉,以為要緊急疏散九死一生!結果機件故障,返回閘口、檢查、換機、換閘,搞成四個幾鐘先到!頂!)

「唔係啩?要我落LA?港男有冇咁吃香呀?」

《逃避雖可恥但有用》劇照

喺其他國籍女性心目中,港男係no.1最佳男友!

「阿女,我唔會老點你㗎!SF同LA嘅港男係屬兩個層次嚟㗎!港女唔吼港男啫!但喺其他國籍女性心目中,港男的確係number one最佳男友,只係佢哋內斂,又屬少數

中嘅少數,所以冇乜人發掘到佢哋嘅可愛之處。其他地方嘅男仔係冇香港男仔咁遷就女仔㗎!」

難道係隔籬飯香?而我又咁身在福中不知福?似乎好似只有港男會為女友攞手袋,同埋好哋哋一部格鬥型戰車,會被女友粉紅色邪靈搞到不倫不類!呢鋪灣區港男真係躺著也中槍!羅省港男出來講兩句吖!

佢哋咁講都唔係冇道理,喺敝公司屬少數嘅港男同事,不論性取向、身高、學歷、家底,個個都風趣幽默、打扮整齊、大方得體,極受同事歡迎,為港人爭光!(唔好意思,有我喺度拉低晒條curve……)

另外,一啲媾唔到公主病港女嘅港男,唔好灰心喎!呢個世界真係好大,你哋勢估唔到喺港女心目中一文不值嘅你,喺其他國家女性眼中竟然係極品XO,係極具潛力嘅優質股!有機會不妨多啲同港女以外嘅女性交往,或有意想不到嘅收穫呢!

(編按:有網民也指,香港男生皮膚滑又少毛髮,鬼妹仔最鍾意。)

(編按:也有網民留言表示同意,大讚港男好好仔!)

相關文章