而更悽慘嘅就係，個ex仲要係嗰位serve你嘅空姐。笠番個頭盔先，呢單嘢，真係喺朋友個朋友度聽返嚟。話說佢趁某航空公司大減價，一次過掃咗幾程機，安排咗幾個short trips，諗住同女友sweet sweet。浪漫背後，老天爺卻同佢開咗個最殘酷嘅玩笑。
就喺佢登機一刻，佢發現serve佢嗰行嘅空姐，竟然有啲面善，然後佢努力回想，結果唔諗猶自可，一諗當堂嚇一跳。呢位熟口熟面嘅空中小姐，竟然就係佢好心分手嘅前度。而咁好彩嘅佢，當下就要面對幾個難題：
1星級難題：打唔打番個招呼好先？
唔打招呼，扮我睇你唔到，男人老狗又好似小家咗啲喎！
打咗招呼，尷尬不特止，最慘係唔知佢會喺你現任面前講啲咩喎……
2星級難題： 應唔應該request service？
「佢會唔會以為我特登想同佢講嘢？」
「佢會唔會以為我特登畀嘢佢做？」
成程飛機，我呢位朋友嘅內心都一直喺度人神交戰，最後，落機係連入境紙都唔敢問個ex攞……
3星級難題： 應該即時同現任報備？
講咗，後果難料。
唔講但最後黃咗，後果註定堪虞。
講定唔講，that’s the question。
幾時至講，that’s another question。
終極難題： 急尿點算好？
當你身處喺比樂壇天王黃宗澤的音域還窄嘅飛機上，一離開座位，走去廁所，就註定要跟ex擦身而過，人有三急，忍定唔忍好先？
所以話，呢個世界真係好細，做人真係唔好行差踏錯，因為你永遠唔會知自己幾時會撞番啲你唔想撞見嘅人。
*彩蛋*
講多樣嘢畀你聽，佢又最後真係中六合彩都冇咁好彩地，第二個trip，去唔同嘅地方，都再一次同現任撞番呢個前度，完。