深圳美食】周末北上深圳一日遊,已經成為不少香港人的指定動作。近年興起嘅打邊爐,都係唔可以缺少的一環。除咗早前同大家介紹過嘅特色火鍋,今次編輯部就搵齊5間最近人氣又抵食火鍋店,無論是話題度定抵食程度都值得推薦,大部份仲喺深圳地鐵沿線,以後上深圳,就有更多選擇了!

文:Cynthia|圖片:Day|編輯:J

深圳美食人氣火鍋篇:推介1|超清甜椰子雞 潤園四季

比起辣雞煲,近年深圳更加流行椰子雞,而網友一致首推潤園四季椰子雞,在港人常去的華僑城創意園、卓越Intown、歡樂海岸等都有分店。如果想打埋卡,在靚景的包圍下用餐的話,可以去卓越Intown店,3樓是一般室內的餐廳,而4樓的戶外區被布置得很有熱帶風情,很有情調。

深圳美食
戶外的環境不錯,很有情調。

清甜椰青作湯底

潤園四季椰子雞以清甜的椰青作為湯底,再加入椰青肉,煮滾之後,店員會親自倒入原隻雞,毋須自己動手,服務不錯。開始煮之後,只要靜待桌上的沙漏流到另外一邊,就可以開始食用,唔怕煮得太老!原以為湯底可能會太清淡,想不到反而能突出雞肉的新鮮,就算沒有加入額外的味精及調味料,雞肉本身的鮮嫩、鮮味已好食到停唔到口!

深圳美食
淡淡的湯底,反而可以突出雞的鮮味。

幸好湯底料分量夠多,兩個人食完都已經有7、8成飽。覺得唔夠飽仲可以加竹笙、冬瓜片等食物,與椰青湯底的清甜非常合拍,再加上即開椰青,食完火鍋,一點都不會熱氣!

深圳美食
即開椰青十分消暑。

另一個必點招牌菜是熱辣辣的煲仔飯,可以share畀2-4人食,入面的配料有臘腸、芋頭等,店員在食之前會先加入蔥花,增加香氣。喜歡吃飯焦可以再焗耐一點,挖到又厚又香的飯焦慢慢食!食完之後,每一桌都會附贈一份水果,相當貼心。

深圳美食
另一個必食的是煲仔飯。

深圳美食
飯後還有一份水果送,十分貼心。

潤園四季椰子雞(卓越Intown店)
地點:深圳福華三路與金田路交匯處卓越Intown 3樓
電話:+86-755-8366-5088
營業時間:10:30am-10:00pm

深圳美食人氣火鍋篇:推介2|手切牛全宴 大目牛肉火鍋城

香港人食火鍋必點肥牛,但很多都是急凍的肥牛。手切的肥牛不但價錢更貴,選擇也不多。好牛之人去到深圳 ,就可以食到新鮮而划算的牛火鍋。

深圳美食
想食到全牛宴,一定要去大目!

來自汕頭的潮汕大目火鍋城是擁有37年歷史的老字號,目前在深圳最方便香港人的,自然是皇崗及羅湖口岸的兩間。

深圳美食
每日未到6點,就已經開始爆場。

深圳美食
在皇崗及羅湖都有分店的大目,選址方便。

大目採用的是溫體牛,每日由屠宰場新鮮送抵,店員在玻璃房後即場切牛,夠衛生新鮮,食得放心。

深圳美食
每一碟的分量都超多,食得過癮。

深圳美食
睇住師傅切肉,更加安心。

湯底是用牛骨熬製而成,絕不是一般的味精湯,打邊爐之前記得要先飲碗湯,品嘗一下濃郁的鮮味。

深圳美食
說起深圳美食必不少得火鍋,說起手切牛肉就必嘗此店!

深圳美食
用牛骨熬製的湯底,牛味濃郁。

牛肉的劃分細緻,最瘦的嫩肉、半肥瘦的脖頸肉、肥膏最多的黃肥牛,另外還有霜降雪花肥牛、牛舌、黑牛柏葉、尾龍骨等等,絕對是名副其實的全牛宴!

深圳美食
一大盤牛肉,肥瘦、厚薄恰到好處。

深圳美食
牛舌切得較薄,不用淥太久就食得。

比起一般的冰鮮牛肉,更能保留鮮味,而店員更提醒只淥8秒就可以,口感更加嫩滑,值得一試。

深圳美食
千萬唔好淥得太耐,以免牛味盡失。

除了牛肉拼盤外,另一個招牌菜手打生牛肉丸亦不可錯過,每日新鮮現打,食落非常彈牙多肉汁,而且加入了牛筋更有口感。

深圳美食
生牛肉丸內加入了牛筋,更有口感!

而店內的即食牛腩、牛雜等調味都十分惹味,可以食勻牛的不同部位及料理方法!店內也有麻辣湯底供選擇,不算太辣到會搶走牛的鮮味,重口味者可以叫鴛鴦湯底,一次過試晒兩個招牌湯底!

深圳美食
麻辣牛腩煲夠惹味,不會太辣而蓋過牛味。

深圳美食
牛雜鍋有齊牛筋、牛肚,煮得十分軟腍。

大目牛肉火鍋城(皇崗店)
地點:深圳皇崗村市場北座1樓
電話:+86-0755-8398-8118
營業時間:11:00am-03:30am

大目牛肉火鍋城(羅湖店)
地點:深圳春風路3068號置地廣場一樓
電話:+86-0755-2783-9889
營業時間:11:00am-03:30am

深圳美食人氣火鍋篇:推介3|抵食海鮮鍋 海極鮮蒸汽美食坊

在深圳食海鮮,不少香港人都會有顧慮,覺得唔新鮮好危險,食完可能會肚屙!於皇崗有分店的海極鮮美食坊,環境相當寬敞,門口處的海鮮區有齊各種生猛海鮮,可以自己觀察新鮮程度再作挑選,加上明碼實價寫清楚,不怕被劏。

深圳美食
海極鮮皇崗口岸有分店,十分方便。

深圳美食
環境乾淨十分寬敞。

二人餐有5款海鮮:基圍蝦、白貝、帶子、青口及鯧魚,外加金針菇及娃娃菜,仲有自助水果、小菜吧任食,幾大食都夠飽!

深圳美食
二人餐的分量好多,實夠飽!

基圍蝦送上枱依然非常生猛會亂跳,證明新鮮程度,而帶子大粒又厚身,加入了蒜蓉同粉絲,更加入味!

深圳美食
蝦送上枱時依然好生猛!

深圳美食
帶子超厚身又大粒!

深圳美食
塞晒成個蒸盤都放唔晒所有海鮮!

食完海鮮後,記得要試埋精華的粥底,所有海鮮的鮮味都留在鍋底,冇加任何調味都可以飲到啖啖鮮味。不過記者點的二人餐海鮮量未算太多,以致粥底味淡,相信多人食會較好。

深圳美食
粥底吸收了海鮮的精華,有淡淡的鮮味。

海極鮮蒸汽美食坊(皇崗分店)
地點:深圳皇崗上圍三村38號一樓
電話:+86-0755-8272-0672
營業時間:11:00am-02:00am

深圳美食人氣火鍋篇:推介4|正宗麻辣火鍋 大龍燚

來自成都的大龍燚喺深圳非常出名,記者平日6點左右到達,門口已經排晒長龍,好彩仲有細枱可以坐!一入到去,就聞到超濃烈的辣椒味!

深圳美食
大龍燚平日6點未到,已有人等位。

店內採微信落單,可以自己用電話揀湯底、食物,落單要鴛鴦鍋微微辣,中間白湯,外圍是布滿辣椒的紅湯,聞到都已經流晒口水!

深圳美食
麻辣鍋成鍋都係辣椒,好過癮!

食材的選擇比海底撈少,主要是少了海鮮。不過每次都會食的肉類、丸類、菜、菇等都有齊!

深圳美食
兩個人叫到成枱食物,都係RMB331/約HK$411!

牛肉肉味濃,而牛黃喉、水魷等打邊爐必食,落紅湯吸辣汁夠過癮!雖然只係微微辣,但已經比海底撈辣好多,重口味者必試!

深圳美食
牛肉水準不錯!

怕辣的話,可以開一罐罐的芝麻油,倒入碗再加蒜、蔥,更加惹味!唔好以為油淋淋好可怕,呢個係四川人的正宗食法,去食的話不妨一試!

深圳美食
一罐罐的芝麻油夠衛生。

深圳美食
即沖花茶可以幫助消化!

大龍燚
地址:深圳南山大道2009號一樓D區
電話:+86-755-8653-3899
營業時間:10:30am-03:00am

深圳美食人氣火鍋篇:推介5|最強服務取勝 海底撈

深圳中最多人食、討論熱度又最高的火鍋店,甚至已成了半個北上深圳美食的代名詞,實非海底撈莫屬。雖然已正式進駐香港,不過很多港人依然會堅持去深圳食,因為無論是價錢,還是服務,深圳都比較優勝,難怪每個場聽得最多的都還是廣東話!

深圳美食
雖然香港已有分店,但好多人都依然會上深圳食。

海底撈每次都會大排長龍,好在等位之際有零食、水果任食,仲可以玩飛行棋、試試修甲等,唔怕等到悶!

深圳美食
有免費小食供選擇。

埋位之後,就可以用桌上的iPad選擇食物,麻辣湯底可以加麻夠過癮,而三鮮湯底更加係強烈推薦,奶白色的湯底本身就非常好喝,加入海鮮、菜、麵等去煮,好味到會忍唔住飲番幾碗。食材的選擇非常多,由肉類、菜類到海鮮幾十種,最正的是可以只叫半份,就算得兩個朋友一齊食,都可以叫好多種食物!推薦必點冇刺巴沙魚片,非常嫩滑且不會腥,另外的牛小排、手切肥牛、滑牛等均水準之上冇雪藏味,值得一選!

深圳美食
鴛鴦及三鮮湯底都一樣好飲。

深圳美食
就算叫到一枱食物,埋單都不會太肉赤。

海底撈最正的是服務態度,提供圍裙、橡筋,以及膠袋入電話等等,非常貼心。店員更會幫你落蝦滑、剝蝦等,仲會有拉麵表演,好玩又好食。

深圳美食
落蝦滑都唔使自己動手!

深圳美食
服務貼心是海底撈的最大特點。

海底撈
地址:深圳羅湖區人民南路2028號金光華廣場L6、L7層
電話:+86-755-8225-0991
營業時間:09:00am-07:00am

下一頁:【深圳好去處】深圳一日遊:少女風IH Café、型格Lingers 鄰間|5間小清新打卡Cafés推介

相關文章