Tsum Tsum又嚟喇!今次喺台北有個限定主題派對嘉年華,成個園區總共有5大遊戲攤位、3大影相位同多間自製飾品禮物店。各位可以又買又玩,仲可以同心愛嘅人一起DIY,展期仲會橫跨情人節同新年,無論係情侶定係一家大細,都好適合。

text:Ellissa | photo:資料圖片、Instagram

台北Tsum Tsum嘉年華

今次Tsum Tsum派對嘉年華已經喺昨日1月25日開始舉行,位於台北101水舞廣場。嘉年華有5大遊戲攤位、3大影相打卡位同多間自製飾品禮物店。

N

昨日第一日開展已經有唔少人到場一起開排隊嘉年華,小飛象熱氣球更加首次喺台灣現身。

展覽橫跨情人節,如果預備出遊台北的情侶可以考慮去玩。

園區地圖望落位置幾大,影相位分布全場各區。

5大Tsum Tsum主題遊戲

5個遊戲裡面有不少都係童年回憶,有巨型彈珠檯,係小編細個上電腦堂必定偷玩嘅遊戲。而且仲會有特製地板整成的溜冰場,大家可以好自由咁走嚟走去。

簡直就係彈珠檯巨型版本,同友人一起重拾童年回憶。

呢個遊戲應該係需要朋友一起挑戰,所以記得搵多幾個人一起去玩。

就好似海洋公園揼青蛙嗰個經典遊戲,同一個玩法,但有唔同嘅刺激。

將投籃同bingo二合為一嘅遊戲,又考球技,又考智力。睇嚟要順利過關未必容易。

戶外溜冰或者係全場最刺激嘅遊戲!用特質地板製造溜冰感覺,小編都好想試玩。

3大Tsum Tsum主題拍攝位

話明係Tsum Tsum party,點可以冇得影相呢?主辦單位就好貼心地特登安排3大影相位畀各位盡情取景。除了門口的多個卡通氣球裝置,仲有小飛象熱氣球同埋5米高嘅朱古力Tsum Tsum甜品屋,可愛造型極度吸引!

紅色爆谷盒更添新年喜慶氣氛,期待大家去影相。

巨型5米高的朱古力屋,加上Tsum Tsum 卡通,見到都想影番張相。

多款自製禮物DIY

除咗玩遊戲同影相,當然唔少得DIY禮物啦!適逢新年同情人節,最啱就係整畀屋企人同男/女朋友。自製布袋、頸枕,仲有型格皮革,梗有一款適合你。同場加映多款Tsum Tsum可愛精選紀念品,甚至有專為新年而設嘅揮春同利是封,各位記得去大手入貨喇!

可以自製角色布章,仲有小物收納袋,唔知實物係點呢?

就連頸枕都可以自製,自己揀圖案同柔軟度。

皮革配件今年大熱,諗唔到情人節禮物可以即場DIY。

除咗利是封、揮春,仲可以喺度寄postcard,各位Tsum Tsum迷一定唔可以錯過。

除咗自製禮物,當然係有好多卡通精品同衫買。

Tsum Tsum派對嘉年華
日期:1月25日-3月4日
時間:星期一至四(1:00pm-9:30pm)/星期五及國定假日前夕(1:00pm-10:00pm)/星期六(12:00nn-10:00pm)/星期日(12:00nn-9:30pm)
地點:台北101水舞廣場
入場費:NT500/HK$125
網址:http://www.disney.com.tw/TSUMTSUMCarnival2018/index.php

延伸閱讀:【台北限定】Ig熱爆!色廊展:日常生活+主題顏色 | 藍色富士山澡堂!

相關文章