唔少人都在聖誕趁機去了一個長途旅行,浪漫的法國更加係好多人的首選。有網友就分享自己經歷,於聖誕節搶咗請3放9的靚假,打算去法國鬆一鬆,結果回程喺法國戴高樂機場中大伏,唔單止趕唔到飛機,更加要畀成超過1萬蚊先買到機位返香港!

圖:新傳媒資料庫、Zenobeebee à Paris、相關機構

法國戴高樂機場 難行過迷宮!

法國戴高樂機場(Aéroport Paris-Charles-de-Gaulle)喺好多旅客心目中,都有極壞印象,「迷宮般的通道」更加係最令人頭痛不已的問題!這個被GoEuro旅遊網評為「歐洲最差10大機場」的第6位,同樣是CNN 11年選出的「全球最令人討厭10大國際機場」的第1位,有唔少網友都分享自己的慘痛經歷,事前對戴高樂機場冇做足功課的話,就好易中招!

法國 戴高樂機場
睇睇戴高樂機場的平面圖,認真複雜!

有唔少網友都分享自己的慘痛經歷,事前對巴黎戴高樂機場冇做足功課的話,就好易中招!

錯過班機 損失過萬

事主一行人於12月31日,乘搭中午的東方航空班機回港,本身已提早約3小時到達機場,但最後就因為法國戴高樂機場巴士的故障、安排不當而錯失班機,最後現場買機票而花費了過萬蚊!其間經歷了法國職員的冷漠、法國機場的麻煩、極差安排等等,勁多中伏位!

戴高樂機場,分分鐘難行過迷宮!

中伏位1:T1去T2要個幾鐘!

由於第一次喺戴高樂機場搭飛機返香港,同時又耳聞法國機場職員動作特別慢,事主強調已特別早約3小時去到機場,以免miss 班機。搭的士到達機場第一航廈之後,發現原來櫃枱設於第二航廈,心諗都只係一段小距離,肯定夠時間啦!

法國 戴高樂機場
未去法國之前,好多人以為T1同T2 就係香港機場步行可到的距離,其實完全唔係!

戴高樂機場有免費的巴士及機場接駁車,可以穿梭不同航廈,但要由T1 去 T2,並唔係一個站就到,職員當時解釋地面巴士唔會直接去到T2,要先搭穿梭巴士去到T3,再轉鐵路電車CDGVAL先可以去T2。

法國 戴高樂機場
去返T2,都要先轉一次車!

事主根據指示去乘搭機場的免費電車CDGVAL,結果等足幾乎半個鐘都未開,過咗好耐有乘客發現,車外的顯示牌上寫了因為故障而停駛的消息,於是大家馬上衝出去。但期間車廂完全冇廣播,亦冇職員提大家,成班法國人同其他旅客,完全喺度呆等!

法國 戴高樂機場
有免費接駁車以為冇有怕,點知壞車都唔通知!

離開CDGVAL上番地面,其間搵唔到任何指示可以去邊度搭咩車去到T2,只能跟著其他旅客行,穿梭巴士應該係臨時調過嚟載客,因此一等就係半個鐘,事主仲話身邊好多客人都係受害者!

法國 戴高樂機場
等車的人勁多,重點是巴士隔好耐先到!

過咗半個鐘終於有車,但並唔係由T3直接去T1,而係要由T3去Parking,返T1,再去Parking,最後先轉到去T2,雖然路面一直好暢通,但法國司機依然係優雅而又緩慢地行駛,開足半個鐘!結果只係由T1去T2,已用足1個半鐘時間!

法國 戴高樂機場
行車路線顯示,由T1去T2,要經過好多個站!

中伏位2:機場的士劏客!

經歷完CDGVAL的壞車之後,事主在T3外的馬路見到有的士,心動打算搭的士會快啲,結果的士司機開天殺價,短短的幾分鐘距離開 EUR35,幾乎是HK$350!唔想被劏到一頸血,就只好搭漫長的免費巴士了。

法國 戴高樂機場
法國的士劏客情況嚴重,就算係市區都會亂開價!

中伏位3:第2航廈有7個客運大樓!

去到第2航廈仲有漫長的路要行,因為T2 裡的客運大樓有成7個,由2A-2G每個相距起碼10分鐘,而且機場內的指示非常不清晰,如果行錯方向,行番轉頭都要成10-20分鐘,事主搵咗好耐路先成功去到2E!

法國 戴高樂機場
去到T2都唔好太開心,因為有好多個counters,相距又超遠。

中伏位4:機場與航空公司零協調

由於事主是因為機場壞車及安排失當而導致錯過班機,本以為機場會同航空公司協調,或作其他安排。 但機場對此故障完全不加以理會,亦沒有任何解釋,更沒有與航空公司作任何協調!法國 戴高樂機場

法國機場對自己的故障完全不加理會,更沒有與航空公司協調!

中伏位5:法國職員懶得協助

事主立即向法國職員尋求協助,並解釋是機場的接駁巴士故障所致,但職員只是以「No. You are too late. It’s not our fault.」為由,拒絕協助,當追問能否補錢買下一班機的機票時,職員更直接要她去櫃枱即場買張新機票回港。不少朋友都試過在香港、日本、台灣錯過班機時,可補錢買下一班,相比之下,法國職員態度非常冷漠。而事主因為任職教師,一定要準時回到香港,只能現場買機票。

法國 戴高樂機場
相比之下,法國機場職員態度比較冷漠。

中伏位6:現場買機票 索價1萬

去到指定的櫃位詢問機票詳情時,職員表示最平的機票都要1萬,由於要趕著回香港上班,事主只能硬食貴價1萬蚊!不過,如果大家遇到同樣情況,記得先唔好咁慌張,可以上各大航空公司check 下機位,事主捱完貴機票之後,上國泰睇再有HK$5,000機票,好肉赤!

法國 戴高樂機場
T2 可以直接買到機票,但注意係Air France 貴航空,唔想買咁貴,最好自己上網格價!

中伏位7:保險竟然唔包!

出發之前有買保險的網友即問保險公司有冇得賠,結果發現所買的保險只會因罷工、劫機、恐怖襲擊、天災先有得賠,更加心痛。保險公司強調,如果係車輛故障,都一定要延誤足8個鐘,先開始有得賠,就算有機場信證明都冇用!不過坊間每間保險公司的準則都唔同,建議大家遇到故障、停駛等,立即攞咗官方確認信先,話唔定都有得claim。大家買保險之前,都記得要問清楚有咩包、有咩唔包呀!

法國 戴高樂機場
買保險之前,一定要睇清楚包咩唔包咩!

5招教你 對付麻煩機場

唔想好像事主咁中晒伏又損失金錢,編輯部訪問了旅居法國多年的博客Zenobeebee à Paris的意見,以及旅遊記者的心得,整理以下應對戴高樂機場的實用小貼士。

法國 戴高樂機場
想順利上機,就記得做足準備!

Tip 1. 點對點pick up 服務

有時候要預時間去機場,又要搵轉車路線,又要推重重的行李,不如預多少少budget揀點對點pick up 服務。旅居法國多年的博客Zenobeebee à Paris,推薦 Viator 的Shared shuttle,大約一人EUR18-27,雖然有機會同其他乘客同坐,但勝在司機準時,態度又好,就唔使提心吊膽!

法國 戴高樂機場
去機場想節省時間,可以揀點對點的pick up服務。

Tip 2. 一定要提前online check-in

好多旅人出發之前都會做online check-in,但去到回程玩得太開心,就懶到唔記得要提早check-in!其實回程先係做online check-in的最關鍵時間,因為好容易買多咗買爆喼,check-in要排,搞行李又要時間。如果已經提早做好online check-in,就可以排機器攞登機證,行李都可以自助託運,節省好多時間。

法國 戴高樂機場
如果有做online check-in ,到現場可以自動託運行李,條隊快好多。

Tip 3. Check定航廈最重要

正如上述所言,3個航廈之間不是步行可以到達的距離,去錯咗分分鐘要一個鐘以上先去到!唔想重複犯錯,出發前上航空公司check定辦理登機位置就最好,較多飛往香港、上海的航空公司,都是T2登機,大家可以注意一下。另一個情況就係轉機,都要事前確認自己去邊個航廈,有好多時候轉機時間得1個幾鐘,上一班機delay,而下班機唔會因此延遲起飛,時間緊湊,一定要做好準備!

法國 戴高樂機場
轉機時間緊湊,更要check 清楚路線!

Tip 4. 盡早出門為好

經常來往法國的Zenobeebee à Paris,每次都起碼早兩個小時去到機場,她強調法國安檢慢起上來可以非常慢,歐洲人除衫攞嘢更加係超慢動作,bag drop 隊伍往往都是超長,地勤手腳又好慢,有時又會突然封了安檢口,狀況百出,千萬唔好以香港的速度為基準!如果是第一次迎戰戴高樂機場,早3小時就比較穩陣。加上機場內有很多名牌,可以用免稅價買到,辦理完登機,去逛逛也是不錯的選擇!

盡早check 完in,就可以去行行名牌店!

Tip 5. 退稅要做足準備

Zenobeebee à Paris強調,想退稅的話,更加要提早出發,因為要畀海關蓋印,而好多時就算排咗百幾人,都可能只開兩三個櫃枱,隨便一排都要一個鐘以上,有唔少網友都分享,早4個鐘去到都只係時間剛剛好,一啲都唔鬆動,絕對要小心!

法國 戴高樂機場
就算可以自助,都經常出現壞機情況!

延伸閱讀:亞洲國家登首位!2017 年全球最強護照排名

相關文章