去旅行除咗窮遊、深度遊,最開心梗係吃喝玩樂,所以好多人去完旅行,一定會討論邊個國家shopping最多嘢買。日本服飾雖然貴,但著幾年都唔out;韓國地下街,衫褲made in Korea又平又靚。

每次去完旅行,最想念香港茶餐廳美食


仲有就係自己最啱食咩國家嘅菜式。鍾意食辣嘅就韓國菜泰國菜,鍾意食海鮮魚生梗係去日本最新鮮啦!

鍾意食乜各有喜好。不過,可能小弟真係土生土長嘅香港人,去完十幾日旅行,就會好掛住香港嘅嘢食。

所以返到香港第一餐,我多數都會去吃茶餐廳,食個菠蘿包嘆杯奶茶,當然唔少得阿媽煲嘅靚湯。

茶餐廳

本土特色小食被忽略,外國人當寶

雖然好多人都話,香港只係一個「雜食城市」,幾乎所有國家嘅嘢食都有,左抄右抄,冇乜特色。其實香港都仲有好多特色食物,係其他國家做唔到。

第一樣要講嘅一定係茶樓點心,雖然細細個覺得跟屋企人去飲茶好悶,睇報紙嘆茶成粒鐘先肯走,但大個咗又覺得香港嘅點心其實好好食。

茶餐廳

有好多外國人,嚟到香港旅遊都會特登去飲茶。其次,香港街頭小食都好好食,菠蘿包、蛋撻、魚蛋、燒賣、雞蛋仔、牛雜,喺其他國家都食唔到嗰種味道。

最後要講嘅,就梗係港式奶茶,如果各位同我一樣都係奶茶迷,就知道其他國家所整嘅奶茶,唔及香港又濃又香又滑。

當然,每個人口味唔一樣,以上講嘅只係我個人見解。其實香港好多屬於本土嘅美食都被人忽略,但外國人原來當係寶。

小店只做遊客生意,想念以前掃街的日子

但我發現,如果去到旺角、尖沙咀、銅鑼灣呢類遊客區,想食串魚蛋都幾難。雖然周街都係小食店,但價錢真係畀唔落手,三十蚊一兜魚蛋或燒賣,擺到明做遊客生意,想食只能夠去番住宅區食。

可能你覺得攤販貪錢,但其實佢哋只係為交租,地產商睇中遊客區不斷加租,物價變相不斷加價。好多小店、老店都堅持唔住而結業。

以前攞住一百蚊就掃街食到飽嘅日子,依家只係買到幾兜魚蛋燒賣……
一切,都係土地問題。

茶餐廳

相關文章