香港人去台灣住民宿猶如家常便飯,覺得台灣人心地善良,民宿老闆招待同照顧都非常好,住慣到返唔到轉頭唔想再住酒店!民宿精選網站Dear b&b是由兩位台灣女生開設的網站,佢哋親自走訪並推介台灣民宿,用第一身嘅角度推介大家去體驗。

文:Ellissa | 圖:Dear b&b

裸辭去旅行出靈感

早前記者訪問了Dear b&b兩位創辦人Rae同Minchelle,她們在大學時期就認識,雖然讀不同學科,但機緣巧合下成了好朋友!大學畢業後分別於大公司工作,大學時候主修哲學嘅Minchelle喺Sony Taiwan做了品牌行銷7、8年,每年有台幣過千萬嘅宣傳預算,仲攞埋Sony 全球行銷大獎的殊榮!之後卻毅然放棄高薪厚職去旅行,自己一個人到了歐洲和中東地區,旅行途中居住過好多唔同類型嘅民宿,但覺得都係台灣嘅最好!於是佢不斷諗點樣能夠將台灣嘅好分享畀其他人!

Dear b&b 創辦人 Rae(左) 和 Minchelle(右)。

創辦人Minchelle係個熱愛旅行嘅人,曾經出走5個月去歐洲、中東!

咁啱嗰陣就讀企業管理嘅Rae喺台灣比菲多負責植物の優與純粹喝咖啡,後來仲升職做咗經理,管理一個團隊嘅運作!但升職之後卻覺得有壓力,自己唔想一世奉獻畀公司,咁啱嗰陣Minchelle諗住創業,一直都熱愛美食同旅行嘅Rae就決定同好朋友一起拍住上喇!佢哋兩個喺30歲嘅時候就將所有積蓄投放到Dear b&b的網站上,想把台灣的美分享給其他人。

親身自費入住 精選最有溫度民宿

佢哋覺得:「台灣的民宿明明咁正,點解就冇好嘅網站、好嘅平台畀人哋睇到?」於是五年前就喺台灣創辦咗呢個網站,目的係深入介紹每間佢哋覺得好嘅民宿,用第一身嘅角度、去勻每間民宿做精心挑選!從環境、風景、美學、文化、裝修、設計、乾淨、民宿老闆理念等去評分!每去到一間民宿,佢哋都會自己影相、自己同民宿老闆做訪問、親自住過之後再細心寫文畀意見!

呢句唔單止係佢哋嘅slogan,更加係佢哋嘅夢想!

唔收廣告費真心推介

曾經有啲民宿想搵佢哋合作,希望登上Dear b&b嘅網頁,以為諗住畀啲廣告費佢哋就得啦!點知佢哋唔肯收,講明要自己親自採訪過覺得合格先可以擺入自己嘅網站!眼白白睇住啲錢就咁消失,佢哋都唔介意,因為用心將最好嘅台灣推介出去先係佢哋嘅夢想!而且創辦人靠著三心承諾,感動咗唔少旅人同民宿老闆,「安心」、「貼心」、「歡心」,呢個三心承諾係會因著每間民宿嘅獨特性去描寫,具體咁講得出每一間民宿符合佢哋評選嘅地方!

每間民宿嘅認真項目都唔一樣,讀者可以喺度理解老闆嘅特色!

絕對唔係Airbnb

依家嘅住宿網都係寫幾時有房、喺邊度等嘅資料,希望幫旅客盡快方便搵到住宿!但佢哋覺得咁樣唔能夠畀旅客知道民宿同老闆嘅故事,於是佢哋自己一手一腳去採訪,精挑細選先會加入自己嘅網站!從最初網站只有16間民宿起家,直到依家超過350間,「一步一腳印」就係佢哋形容自己過去幾年嘅事跡!因為每一間民宿都係佢哋自己辛辛苦苦傾返嚟,絕對係真心誠意推介!

每間民宿都細心採訪,認真用文字感動人心!

而且Minchelle仲話:「Airbnb跟Agoda、Booking一樣都是旅宿自己要上架就可以上架,Dear b&b 要通過我們的評鑑才可以上線報道,比較像旅宿界的米芝蓮指南,而且還有寫主人的夢想故事等,嚴選旅宿、深度報道都是 Airbnb 沒有的!」果然佢哋真係好熱愛去做呢件事!

主人故事係佢哋兩個去訪問民宿老闆而寫出嚟嘅!有別於一般訂房平台!

有條毛都唔入選

記者訪問創辦人挑選合作民宿嘅時候,佢哋話曾經有一次採訪,無論係老闆理念、環境、裝修、設計同美學都好適合網站嘅風格。可惜當佢哋走入廁所,發現浴缸裡面居然有霉菌,於是佢哋就冇辦法將呢間民宿加入自己個名單裡面喇!好明顯佢哋真係會用心注意每一個細節,仔細觀察之後再客觀評審!

兩位創辦人認真去為每一個讀者締造更完美嘅民宿推介!

雖然佢哋話Rae比較重視舒適度,而Minchelle比較重視漂亮風格,但佢哋話:「最終都會跳離自己的偏好,客觀來看是不是有一定的美學和真的有用心、有自己的特色。」呢個就係佢哋嘅堅持!堅持唔用主觀嘅態度評鑑民宿,而係為讀者選擇更加客觀咁報道!

住後點評 細心小貼士

另外網站裡面都有特登為讀者而設嘅「小叮嚀」!呢個位置其實就係提醒大家喺選擇民宿時候需要注意嘅地方,每間民宿嘅位置、裝修、設計都唔一樣,所以每個小貼士都會按照個別差異而訂立嘅,希望可以幫助讀者選擇心水民宿!

就每間民宿嘅差異而設嘅「小叮嚀」,可以幫助讀者注意入住需要!

每年再去check真啲

而且喺名單上面每一間民宿,佢哋除咗初次採訪之外,仲會每年重複走訪,檢驗品質,確保民宿嘅質素冇變差到!今時今日為咗推廣好嘅民宿,原來有人做緊啲咁高成本嘅嘢!所以佢哋嘅初衷真係好寶貴!佢哋仲話:「我們每年大概會重訪約500間旅宿,平均一天 4 間,大概需要 125 天!500間也包含台灣的離島,像澎湖、金門、馬祖、小琉球、蘭嶼等等。」今時今日咁樣認真用心去做,就係為咗單單分享台灣嘅好畀其他人!

佢哋仲會每年走訪複檢民宿嘅質素!

佢哋仲真係試過將民宿喺自己嗰list度剔除!可能有啲係因為換咗老闆,新老闆接手冇辦法維持一樣嘅用心同風格,就會冇辦法繼續合作!或者有啲民宿啱啱開幕好新好豪華,但時間耐咗,老闆可能捨不得花錢翻新維修,也會被淘汰!所以佢哋嘅list絕對係會不定期更新嘅!

Dear b&b

網站:https://dearbnb.com/

【台北住宿精選推介】

想去台北瘋狂食,又想體驗慢活嘅滋味,可以選擇入住大稻埕嘅民宿。大稻埕位於台北迪化街一帶的舊城區,保留著當地文化,Rae 同 Minchelle 就有兩間心水推介,分別係「OrigInn Space」同「門草行旅」,兩間民宿都各具特色!

台北市區:OrigInn Space | 通往昔日大稻埕的慢時空

01|OrigInn Space 黑膠之家

OrigInn Space行復古風格路線,而且最特別嘅地方係每間房都有黑膠唱片,加上舊式大宅的設計,畀人一種舒適嘅感覺。經典的六片木門設計、大堂遍布唔同種類嘅藝術品,加上民宿老闆煮的咖啡香氣,叫你身心頓時放鬆落嚟!

台北市區:OrigInn Space | 遍布大宅的藝術品擺設

OrigInn Space 民宿老闆仲會親自沖咖啡畀你飲!

每一間房都會擺放黑膠唱片機,啱晒鍾意音樂嘅你。

OrigInn Space

網站:dearbnb.com/bnb/originn-space/

02| 門草行旅

門草行旅都係位於台北市區大稻埕,係舊城區嘅文青之選!裝修、擺設、設計、用色都係十分之配合,完全係睇相就會有入住嘅衝動!估你唔到台北都可以有安靜嘅地方,呢間民宿喺寂靜嘅巷仔裡面,點咗幾盞好光嘅燈,簡直係影風格照嘅好地方!

台北市區:草門行旅 | 夢裡微光呼吸的優雅

台北市區:草門行旅 | 民宿內有好多唔同嘅小裝飾!

台北市區:草門行旅 | 房內嘅布置同擺設整潔清新,適合鍾意簡單嘅你!

草們行旅之所以值得創辦人特別推介,因為民宿整個裝修風格,由植物嘅擺放、壓花、傢俬等等,都係老闆親自設計!用夢想去編織民宿嘅一點一滴,叫創辦人好深刻!

台北市區:草門行旅 | 而且仲有專屬嘅單人房,畀一個人去旅行又想住得舒服嘅你!

草們行旅

網站:https://dearbnb.com/bnb/the-door-inn/

【墾丁精選民宿推介】

除咗台北,墾丁都係港人熱門嘅旅遊地方!所以記者都訪問咗創辦人有咩當地特別推介民宿,而佢哋都好認真咁講解咗兩間,呢兩間同樣係見到相就會想入住嘅類別!唔知各位會唔會想即刻飛番轉墾丁呢?「小屋villa」同「隱。半島」都係佢哋精選裡面嘅精選,極度符合創辦人嘅美學觀點!

墾丁:小屋villa | 擁有完美田景的房,每個房門都對著游泳池!

03|小屋villa

小屋villa主打一望無際嘅星空同山田景色,仲要每一間房門口都會對正大大個純白泳池!咁靚嘅畫面,清幽嘅景色,絕對係香港人可以放鬆嘅地方!而且入住呢度仲可以享受到民宿老闆親手製作嘅早餐,靚景配美食!

墾丁:小屋villa | 大家只要一打開房門,就可以跳入泳池喇!

墾丁:小屋villa | 每日起身都可以望住個靚景食早餐!

墾丁:小屋villa | 而且附近山田景色真係睇到都身心舒暢啊!

小屋villa

網站:https://dearbnb.com/bnb/small-house-villa/

04|隱。半島

除咗小屋villa,隱。半島都係創辦人嘅推介,呢間民宿同樣位於墾丁!創辦人推薦係因為呢間民宿好有特色,例如入房就已經會預備好紅酒,甚至佢會願意幫你布置間房,成為求婚之選等嘅驚喜!好適合情侶一齊入住!

墾丁:隱。半島 | 躲進南國日光裡的浪漫小島。

墾丁:隱。半島 | 有很多特色果汁同咖啡提供!

墾丁:隱。半島 | 仲有好正嘅早餐提供!

墾丁:隱。半島 | 另外仲會有紅酒,啱晒情侶一起享受。

隱。半島

網址:https://dearbnb.com/bnb/peninsula-inn/

05|台南區精選民宿:來了

位於台南市區嘅「來了」,係一間擁有人情味嘅民宿,佢嘅位置好似巴黎嘅巷仔入面!而且民宿老闆係讀室內設計出身,基本上整個民宿都係由佢嚟設計,透過空間去展示佢對生活嘅熱愛!

台南市區:來了 | 親自設計的民宿老闆一家人。

台南市區:來了 | 房間嘅自然採光設計叫客人體驗舒適嘅生活!

台南市區:來了 | 擺設、裝修、設計同用色都走文青風格!

來了

網址:https://dearbnb.com/bnb/laile/

06|台東花蓮精選民宿:沙漠風情

另外仲有位於台東花蓮嘅沙漠風情,都係創辦人嘅重點推介!設計靈感來自於民宿老闆離開台灣去咗27個月嘅旅行之後,返台灣嘅時候想改變自己嘅居住環境!於是搵埋攝影師一齊將自己屋企改變成為撒哈拉沙漠嘅風格,配上裝飾!

台東花蓮:沙漠風情 | 鄰近東海岸嘅一座民宿。

台東花蓮:沙漠風情 | 裝修同擺設都有沙漠嘅風格同味道!

台東花蓮:沙漠風情 | 連用餐嘅碗碟、枱布都充滿著沙漠嘅氣息,配合民宿主題!

沙漠風情

網址:https://dearbnb.com/bnb/desert-house/

07|馬祖精選民宿:55據點

位於馬祖嘅55據點係一座碉堡,屹立喺海中央!以前係台灣嘅軍營碉堡,依家改建成為民宿。最大特色係呢間民宿有間270度海景房,以前就係啲軍人開槍嘅地方,所以原址保留嚟講,係好花心機㗎!

離島馬祖:55據點 | 270度嘅海景房,係一望無際嘅大海啊!

離島馬祖:55據點 | 成個民宿根本就位於海島之上,鍾意海嘅你可以選擇喺天台度睇靚景!

離島馬祖:55據點 | 最特別嘅地方係呢度仲可以睇到世上罕有嘅藍眼淚啊!

相關文章