每隔一陣子,就會有朋友狂呻「帶住 阿媽去旅行 」而嘈交收場。帶得老竇老母同行,就預咗要有無比耐性,邊有咁輕鬆?! 如果想輕鬆,阿珍向來都係建議朋友「跟團一了百了」!遇到導遊/團友失手或出醜,仲可以一家人齊心食花生多個話題!不過呢,如果你真係咁有勇氣,諗住「唔跟團、自由行」,阿珍除了向你致敬,仲會呼籲大家留意下列 14 個「中伏位」。

01. 酒店住宿 ──── 名牌要緊、小眾累事

阿媽真係好唔識欣賞嗰啲好rustic 呀、industrial 呀、artistic 嘅設計,仲會嫌唔夠光猛、啲畫邪邪哋,所以請你盡量揀佢懂得嗌酒店名的地方,例如四季、半島,平啲可以揀Four Points by Sheraton( 因為有「喜來登」三個字), 以曼谷為例, 半島經常做 4K 樓下的四天套票,好抵,好啱帶阿媽去!

阿媽 旅行
就算唔游水都唔緊要,有泳池即刻升格幾倍。

02. 膳食安排 ──── 地道行先、掃街最潮

再以曼谷為例,盡量帶阿媽去街邊檔,因為佢哋真係好鍾意食!濕濕哋嘅河粉、香噴噴嘅串燒,仲有芒果糯米飯,硬係覺得街邊好食啲,因為有風味之餘,亦係唯一可以通知師奶fans「我做過當地人」。

阿媽 旅行
掃過下街,返去先有得晒命自己去過。

03. 食量估算 ──── 多菜少肉、少食多餐

雖然阿媽食得唔多,但通常好為食,好似金魚食極唔飽,同時又不斷話:「我依家食好少㗎!蒸條魚烚條菜就係一餐。」 你由得佢講啦!你話去食喇沙佢就話好㗎喇!另外,阿媽係好喜歡去果園的,即摘即食嗰種!

阿媽 旅行
絕對要有心理準備每晚都要食水果⋯⋯

04. 景點策劃 ──── 超市才是王道!

之前提到寺廟只是到此一遊,真正戲肉係超級市場!有朋友兩年前去沖繩,幾乎去勻全島AEON( 當時仲叫「吉之島」),每晚買生果作宵夜,仲要抬番幾箱返香港,成班阿媽親戚已經好開心,今年過年仲講緊!另外,曼谷Big C就更加係父母逛到唔願走的shopping大觀園⋯⋯

阿媽 旅行
圖片來源:Big C

不過都有父母喜歡行博物館,近年聽都有朋友講帶咗全家去台灣國立故宮博物院。參觀完爸爸仲大讚行程安排得好好。

唔一定要帶父母去超市嘅。

05. 腳骨力評測 ──── 攰都唔出聲

自由行當然冇旅遊車點對點運送,路就自然行得多,但老人家幾時攰真係好難估,最常見就係勁攰都唔出聲,返到酒店對腳痛到第日行程半取消咁滯!心得係: 你自己覺得開始攰時,相信就係阿媽需要坐低休息嘅時間時,將體力同步,先可以齊齊去得更遠嘛!

阿媽 旅行
帶阿媽去旅行最容易有怨言,特別在於成日都問:「跟住點?」

06. 讀心神探 ──── 狂講晦氣說話

阿媽成日去親旅行都狂講晦氣說話,又話食和牛貴,又覺得啲景點西貢都睇到。不過,其實佢哋都只係呻下,實質上睇完、食完返到去就會同身邊師奶嚟個「軍備競賽」,晒命自己去咗邊,所以佢話唔好食、景點冇特別都只係講下,聽完唔使太上心!

阿媽經常口裡說不,但返到香港一定會同姨媽姑姐講睇過靚景。

07. 耐性暴跌 ──── 唔願排隊

去得好味嘅餐廳,排番15分鐘都係基本,有時甚至要等1個鐘。一見到條人龍,佢哋猶如撞鬼,擰晒頭嗌要走,但呢個情況可以理解,特別係去旅行已經要行咁多路,仲要企咁耐去食一餐飯。不妨搵餐廳時,揀比較早嘅用膳時間,避開人流高峰時間,食都食得開心啲。

見到呢條長龍,應該即刻擰晒頭。

08. 最好又要最抵────嫌三嫌四

師奶向來都係慳家專員,又要抵食但又要好食,成日都嫌三嫌四,哪來咁多 CP 值超高嘅餐廳、景點?出發之前同爸媽預告定某啲餐廳、景點會比較貴,畀定相佢哋睇,用多少少錢都值得!戴定頭盔,到時就唔怕有太多怨言。

食貴嘢前同爸媽講定一聲,唔係就會不停嫌貴。

09. 使費預算 ──── 充大頭鬼

有時搵到錢想帶爸媽去旅行,佢哋總會話嗌埋姨媽姑姐去,咁都算,自己應該剩係出父母份錢;點知佢哋會充大頭鬼,要請埋同行親友食呢樣嗰樣,用多咗仲要仔女填番嚿錢。唔想阿爸阿媽充大頭鬼,去之前就講定一齊夾一個「阿公」出嚟,要食飯就喺阿公度攞出嚟,實行家族AA制!

最好當然係夾定一筆錢做「阿公」,唔使口同鼻拗。

10. 誓不低頭 ──── 以為自己乜都識

「唔使問人啦!行呢邊咪啱囉!」明明未去過嘅地方都講到好似當地人咁,呢個情況最常喺老竇身上出現。其實Google Maps咁發達,真係睇下都冇問題,如果遇到呢個情況,就挺身而出講句:「唔使嘈!我去問!」因為佢哋都只係覺得唔識要問人好失禮啫!

睇地圖其實唔難,如果爸媽唔想睇,不如自己出手先!

11. 守舊思想 ──── 唔肯試新嘢

阿珍就有同事講過,佢爸爸去到美國都剩係想食中菜,點都唔肯試下西餐。鍾意食海鮮又瘋狂搵海鮮餐廳,完全冇諗當地出唔出名。老一輩係比較抗拒新事物,但既然帶得佢哋去旅行,證明已經係新嘗試,不妨遊說下父母!

中菜一定是首選,西餐?不了不了。

12. 乜都要管 ──── 阻止買嘢

自己去旅行或者同朋友去,都會有瘋狂 shopping 嘅部分,但同父母去,佢哋就會怕大花筒,不停咁阻止你買嘢!去到外國都唔買,真係對唔住自己㗎嘛!

去旅行唔畀買嘢真係激心到頂點。

13. 慳過頭 ──── 貪小便宜

溫泉旅館浴衣又要攞,以前飛機上面鐵叉都要攞,貪小便宜嘅程度猶如參加咗《慳錢家族》,見到呢啲事真係覺得好瘀,但出聲佢哋又話我哋煩。陣間貪貪下,連香港人個名都整衰埋!

飛機餐上的鐵叉絕對是高危物品。

14|每朝都催你出門口!

一去旅行,父母就會覺得每一分每一秒都係錢!最好有幾早就幾早出門口,體力可以就最好早出晚歸,實行去旅行去到盡,用盡每分每秒!所以佢地一起身,梳洗好後,就會叫你快啲啦,要出門口啦。其實女仔裝身、化妝都要時間,真係唔可以一時三刻就出到門口。就算你已經早咗起身去準備,唔知點解佢地都可以好快手可以出門口。

如果係結衣催你出門口心情會唔會好啲?

下一頁:帶父母旅行5點注意事項|防出事嘈交建議|謹記不是和朋友旅行!

相關文章