Do姐再Shopping》去到第二集,繼尋晚高鈣Do姐攀石vs農夫做拱橋後,今晚繼續放笑料!4人一連去咗東京好幾間「專注做好一件事」的店舖,體現日本匠人精神!

文:Cynthia|圖:TVB、眾星Ig、新傳媒資料室

《Do姐再Shopping》 運動過後再掃貨

第一集《Do姐再Shopping》笑位就夠多啦,但購物位就唔夠多,不停做運動。練開高鈣舞嘅Do姐大展身手,無懼農夫笑佢唔夠鈣,展示彭丹拱橋進化版,做出《驅魔人》式拱橋,化身蜘蛛俠攀石,「生命力強過小強」,仲KO翠如BB!今集Do姐做番老本行,帶大家掃靚貨!

01|翠如媾「正藍」 農夫拒收絕交書

Do姐一向鍾意收集文具、行文具店,今晚就特別為佢加入了KAKIMORI文具店,最特別的地方是可以自製不同顏色的墨水筆,一共有14種顏色可以自行溝色,再留record用完可以重配。

咁啱翠如BB溝咗隻藍色,農夫就問呢隻係咪「楠色」,語意雙關串翠如媾蕭正楠!而Do姐就溝咗隻酒紅色,農夫笑話唔想收到Do姐嘅「絕交書」。

2,000円 自製筆記簿

除了自製墨水筆,仲可以製作個性化的notebook,從材質、用紙、橫線的粗幼都可以自行決定。每本簿的定價是2,000円起,以簿來說都幾貴,但可以全程自行DIY,都好有收藏價值!有唔少文青去到日本,都會特登一訪KAKIMORI!

Do姐取笑陸永做的是「土豪簿」,因為淺色皮面好易污糟,係土豪好有錢先會唔怕!

KAKIMORI
地址:台東區蔵前4-20-12
網址:kakimori.com

02|農夫寧棄日本車 要14萬円筷子

日本的匠人精神向來令人佩服,今集拜訪嘅筷子專門店「銀座夏野」,最貴一對索價14萬円,由老師傅一手一腳製造,要上一百多層的食用漆,最後才完成。

但慳家的翠如BB見到價錢大叫肉赤唔會買,果然係好女人!

呢對筷子同部日本車一樣貴,Do 姐就問農夫會揀收車定筷子?農夫神回:「梗係收筷子啦!收車有咩用啫!又唔可以夾嘢食,收筷子就實用好多!」果然好有大志!

銀座夏野
地址:東京都中央區銀座6-7-4 1/F
網址:www.ginza.jp/zh/shop/978

03|和紙價錢問答大賽

去到和紙專門店,Do姐就搞咗場「和紙價錢問答比賽」,由「畫畫世家」出身嘅翠如BB激戰「業餘」農夫,原本以為翠如BB會大勝,點知……

04|精選高檔三文魚

除咗睇文青嘢,今集Do姐仲帶路去三文魚專門店,煙三文魚、鹽醃三文魚、鹽漬三文魚子等等,詳細講解三文魚知識!

05|備長炭專門店 齊齊長嘆

4人再去了一間專賣備長炭的店舖,有各種炭製品,包括看起來很靚的頸鏈,再試飲加了炭的水,Do姐大讚水有水味,果然夠高深!