每次去旅行,都會唔小心買到爆晒行李,超晒重咁返香港,唔單止要畀額外的行李費,自己一個人抬上抬落都非常麻煩。就算係台灣咁近,有時掃多幾盒masks都已經好重!不如試試台灣寄行李服務,去旅行立即方便同輕鬆好多!

台灣寄包裹到香港

想由台灣寄包裹到香港,目前方法有三種,分別係去郵局寄以及去順豐門市處理,近年新方法就係去全家便利店都可以寄到,一齊睇睇三個方法有咩唔同啦!

依家連全家都可以郵寄,真係好方便!

記者實測:全家便利店寄包裹

順豐最近同全家合作,提供24小時的寄件服務(詳情:http://www.famiport.com.tw/shunfong01.asp?page=7),而且保證於4-5個工作天內寄到香港!聽落好方便,為咗測試一下,記者特意到酒店附近的全家郵寄。結果困難重重,最後仲失敗寄唔到!

全家網站寫明可以寄嘢去香港。

困難1:職員唔知可以寄香港

雖然全家行兩步就有一間,但記者行咗三間有Famiport機器的全家,但三間的店員都係唔知道可以用順豐寄國際!其中一間店員直接話:「我們沒有這個服務!」就算記者指住部機器問佢,依然表示:「不好意思,我們不清楚哦!我們不會用!」可能因為係兼職店員,所以唔太清楚啦!

記者行到第3間,終於有店員幫手睇睇有冇得寄!

好多時都唔係冇,而係店員唔知有!

好多網民都在網上表示遇到同類情況,行咗兩、三間全家問,都冇職員知道可以寄國際包裹去香港。但都有網友表示,全家店員唔suppose幫你處理 ,要自己去Famiport終端機搞掂晒,再去counter畀錢,所以唔太推薦遊客試。

但如果你第一次寄,有咩問題又冇人問到,都有會啲麻煩。

困難2:郵寄紙箱自己帶

一般郵局都會提供或售賣紙箱,但全家係冇寄海外的紙箱提供!其中兩間全家店員叫記者自己去外面買,另外一間的店員就比較好,喺倉執咗兩個紙皮箱,但有咗紙箱都仲要搵膠紙、剪刀,真係好難搞!

認住呢部機,有先可以寄到㗎!

困難3:一次限重3kg

喺全家寄件最麻煩的地方,係每個包裹都限重3kg!以記者為例,有8.8kg的手信想帶返香港,就要分3次寄,真係好唔user-friendly!

如果多過3kg,就要分開好多次寄!

困難4:好多嘢都唔寄得

國際包裹有嘢唔寄得,其實都好正常,但全家順豐的限制真係好多!甚至包括書籍,有好多網友都分享包裹被彈回頭的情況,而其中一個店員甚至叫記者唔好喺全家寄。「他非常容易不批你的包裹,就算沒有違禁品,但他覺得不OK,也會退回台灣,所以真的很不推薦!」

估唔到連書都唔寄得!(http://www.famiport.com.tw/shunfong01.asp?page=7)

http://www.famiport.com.tw/shunfong01.asp?page=7

困難5:填表步驟繁複

以為只要自己用機器填form入資料就OK,點知原來表格好難填!要將每一個寄件的產品分類、填名稱、數量及價錢,但分類同產品名都無法直接輸入,一定要揀佢有的選擇。

填表時,先要睇十多頁資料。

例如「食用品項」,就只有糖、餅乾、海苔、泡麵(不含肉)、方塊酥、太陽餅、鳳梨酥、茶葉、牛軋糖供選擇,記者買咗爆谷、朱古力想寄,通通唔知填咩好!唔好以為揀唔到就求其填,如果被佢check到你有冇申報的產品,後果就係彈回頭!

然後仲要一個個標明產品。

但選擇卻非常少!

敗走全家!記者改試郵局寄件

連走三間全家都失敗,記者只好放棄轉戰郵局寄件,雖然相比之下,郵局會難搵啲,亦都唔係24小時服務,但全台都有一千多間門市,部分星期六都會營業,加上有人會教你一步步寄件,非常方便。

「臺北郵局」位於西門町,都算幾方便!

有不少網友都表示會選擇郵局。

去郵局寄嘢,可以花錢買方便!

步驟1:請職員提供紙箱

郵局會免費提供紙箱,只要同職員講係要寄返香港,就會提供專用的紙箱。職員會先幫你的物品大約秤重,再提供相若大小的箱子,十分方便。職員會提醒你肉類、蛋黃、電器、液體等違禁品不能寄以外,其他的一般都沒有問題。

郵局會免費提供紙箱,十分方便!

步驟2:選擇寄送方法

寄送的方法,分別有國際快捷(1-2天)及航空包裹(7-10天)兩種,以記者為例,8.8kg用國際快捷的話要NT1,360/HK$350,而航空包裹則只需NT835/HK$215,相差HK$135,可視乎需要再選擇!郵局的網站上有齊重量表及計算方法,可先參考網站再作選擇。(http://www.post.gov.tw/post/internet/Postal/)

網站上有寫明重量的價錢。

國際快捷的話,要另外計算包裹的大小,比較複雜,但網站上亦有計算器!

步驟3:將物品整理好入箱

拿到箱子之後,就可以在旁邊把自己要寄的東西放進去,如果箱子還有空隙,擔心裡面的東西會在運送的過程中撞爛的話,郵局也有免費的碎紙供應,可以把紙箱填滿。

可以在一旁慢慢pack紙箱,十分方便。

有碎紙畀你塞滿紙箱!

步驟4:填寫表格

入好箱後,要立即填寫商業發票,要填寫的資料包括簡單個人資料、所寄物品的數量、價值等等,再填寫一份EMS的寄件表格,交給職員即可。

一共有兩張表格要填,唔算複雜。

步驟5:秤重付款

填好資料之後,即可秤重付款,由於紙箱的重量都會計算在內,因此一般會比一開始估算的重少少。

重量以半公斤計算。

職員提醒,如果包裹真的不幸被退回的話,郵局會馬上透過e-mail及電話聯絡你,幫你保留一個月,記得一定要在限期之前去取回,或者託朋友幫你攞咗先!過咗一個月之後,就會有職員幫你開箱,處理過期食物,再收入倉庫,到時要攞,就更加麻煩!

如果有咩事彈回頭,都仲會幫你keep一個月!

步驟6:回港成功收件

記者郵寄當晚回港,過咗兩日就收到包裹,好有效率!就算咁啱撞正打8號風球,都冇影響到抵港時間,令人放心!

2日後密密實實地返到香港!

其他方法:順豐上門收件

想寄包裹,仲有第3個方法,就係用順豐郵寄,如果覺得要去搵順豐,又要攞去門市好麻煩,有網友分享係可以打電話要順豐上門取件的,但都係要自己pack好。如果想慳錢,都不失為一個好方法,價格可參考官網:http://www.sf-express.com/tw/tc/

有唔少網友,都推薦順豐上門取件。

好多台灣人都會選擇順豐上門的方法。

順豐上門收件服務,的確十分方便!

記者喺順豐台網官網計算同等重量的國際包裹運費,發現只需NT917(HK$236),相比之下平了一百多,下次都可以試試!

網友對順豐 負評多多

正如全家同順豐合作嘅出口限制勁多,用順豐都同樣有非常多嘢唔寄得!網友對順豐的各種限制,都表示不滿。日後如果真係喺台灣寄嘢,安全起見可以揀郵局,如果要快同平,就可以試試順豐!

相比之下,順豐都好多嘢唔寄得!

食物類的東西,順豐通通不接受!

好多網友用過順豐的反應都一般。

唔少網友去順豐摸門釘,都係用番郵局寄。

 相關閱讀:台北夜市20大小食

 相關閱讀: 2017 台北手信 30大清單

相關文章