聯合航空單關公災難在一日內娛樂了不少花生友,內情係咪同「 航班超賣 」有關都好,多得今次事件令廣大市民發現,原來買咗飛都唔代表有得飛!事實上,航空公司「超賣」的情況屬平常事,換句話你同我隨時都會成為苦主,特別是嚟緊的復活節假期,現職地勤話係overbooking高峰期!以下先分享兩位苦主的 deny boarding個案,再由地勤解釋點樣揀乘客和說服乘客轉下一班機,如果唔想飛唔到就要睇落去。

文: B.WAN

甚麼是 航班超賣 (Overbooking)?

簡單來講,就是航空公司賣出超過航機座位數目的機票,假設全機有100個位,只要航空公司接受101個訂位都已經叫超賣,但超賣並不代表全部確定訂位,有可能是訂位後未付款的。至於點解會超賣,好簡單,一定就是同成本有關,根據業內人士話:「就算要賠償給客人,點都好過浪費一個機位,航空公司會因應每個航班之前的紀錄,來評估可以超賣多少個位。」

超賣苦主個案分享:

【案例一】兩人同一booking 都要被夾硬拆散

苦主L原定同朋友搭乘西南航空,由芝加哥直飛去拉斯維加斯,在機場自助check-in時,同行友人成功取得登機證,輪到苦主L之際,卻因為機位已滿所以冇!證!出!

雖然空姐以US$300 coupon利誘自願者讓位,可惜到最後一刻都冇人落疊,苦主L唔想自己一個上路,朋友陪佢選擇航空公司的re-route方案,改坐中途要在西雅圖呆等6小時的轉機航班。不過該航班當時正在登機中,苦主L同朋友要秒速跑到遠在另一走道的閘口,當事人憶述:「去到閘口嗰刻,因為幾乎休克要踎喺度唞大氣,機師見狀問 :『Are you OK?』 我咪答:『No!』點知原來美國的航空條例規定乘客身體有異樣就不能起飛,全機人要等我回氣兼回魂,擾擾攘攘下,最後都連累航班延誤了15分鐘,勁尷尬!」

【案例二】出埋登機證  都一樣冇得飛

話時話,買咗飛冇得飛都未必一定是超賣!話說苦主W某年聖誕由美國麥迪遜機場搭乘聯合航空返香港,(Well,咁啱又係聯合航空囉!)在閘口準備登機之際,被通知冇得飛,理由是因為聖誕節大家瘋狂購物,導致行李太重,要減少載客人數來填補!苦主W控訴:「排在前頭的二、三十人登機後,空姐開始截人龍,之後重新計算可以載多幾多人,先至再讓乘客上機。」冇得飛的苦主W最後在航空公司安排下,在方圓廿里乜都冇的酒店內,一個人度過了難忘的聖誕節!

地勤提醒:愈早check-in 愈小機會冇得走

萬一發生超賣,航空公司就需要有客人讓位,地勤人員V話冇一定準則。「當地勤人員被告知航班好大機會超賣,正常情況會逐一向客人查問,當然首選是經濟艙客,萬一冇人舉手,最遲check-in的人就會成為犧牲者,所以,如果可以早點去check-in就盡早!特別是復活節得短短幾日,大家都堆在同一時間飛,唔似暑假旅客,冇咁集中會攤長來出發,相對情況冇咁嚴重。」對於不幸被選中的人,地勤人員V直言愛莫能助,客人拍枱大罵甚至激動到喊,都只能好言安撫。「強國客人反應特別大,有同事甚至在閘口被客打,所以聯合航空事件唔會在香港發生囉!」

賠錢金額一定好so?

始終乘客都是無辜的,航空公司會向「超賣」受影響的客人作出補償,至於賠償金額,就要視乎各間公司的做法,有的會以兩班航機相距的鐘數計算,若延誤時間少於2小時,就一蚊都冇得賠。但如果被安排隔一日上機,航空公司便會安排酒店住宿。亦有地勤表示,有時航空公司對自願舉手讓座的客人出手更闊綽,例如免費升級、使用lounge服務,甚至提供零用錢,朋友K就試過暑假由香港飛往北海道時,因為貪圖免費upgrade、二千蚊賠償金及來回機場的士費,選擇遲一日出發!旅遊記者B在美國奧蘭多機場等待轉機時,更見識過猶如高價拍賣的場面。「空姐在登機閘口開咪話讓座者可獲US$300,見冇人有反應,之後再將金額逐一百美金咁加上去,要不是有訪問在身,我都想舉手呀!」


參加旅行團  團飛都唔一定飛到!

江湖傳聞有長者或小朋友同行,以及參加旅行團都不會被航空公司選中,地勤人員V話,其實如果散客冇人肯,航空公司必要時都會嘗試向團友埋手。目擊者A剛於新年同家人跟團到伊朗旅行,回程在多哈機場等轉機返港時,就見到隔籬另一個香港團的領隊同團友密斟,八卦打聽下,原來該航班超賣,需要徵召四位志願者,願意多留一晚,就可獲酒店住宿及大約US$160零用錢作賠償。

下一頁:聯合航空 超賣拖走乘客事件簿

延伸閱讀:空姐教路 | 避免jet lag、帶漏保濕 機艙護膚 4大急救妙法