前幾日,公司1位大肚等待產假來臨嘅同事Joyce,做做下嘢突然爆喊。大家上前慰問,原來佢上星期日去奶奶屋企食飯,發生咗1件不愉快事件,孕婦情緒波動特別大,諗番起就嬲到喊咗出嚟……

難頂奶奶!

大肚見頭暈 仍像工人斟茶遞水

話說,Joyce本身體弱,大肚後成日會頭暈,公司所有粗重工夫已經交由其他同事負責。而當日去到奶奶屋企,奶奶竟然要佢落街買餸煮飯!

以前拍拖時期,奶奶因為喜歡熱鬧,每逢節日就會叫埋鄰居一齊嚟打麻將……Joyce次次去到仲慘過做賓妹,切生果斟茶遞水,差不多天黑就開始煮飯……

為顯示管教有方 硬要新抱買餸煮飯

「嘩!仲有生果食啊,你個新抱真係乖~」奶奶就係想聽到鄰居咁樣讚一句,代表自己管教得好。

Joyce本來當孝順老人家都算數,諗住大咗肚應該會輕鬆啲,唔煮飯咪落街食囉,點知奶奶就死都要佢買餸煮飯。

同老公落到街市,佢已經喊咁口,不過佢老公係1名正宗孝子。「話晒都係我阿媽~咪當氹佢老人家開心囉。」

孝子老公唔體諒 落井下石

煮完餐飯身水身汗,諗起一陣仲要洗碗已經冇晒胃口,奶奶仲問佢:「你唔食?」
「我唔肚餓。」
「你唔食點試到味?」原來奶奶係想話呢樣餸唔夠味,炒菜落唔夠油,嫌三嫌四。

但令到Joyce崩潰嘅,就係老公一句:「哈哈,都係阿媽煮嘢叻!」被奶奶吩咐做賓妹都算數,連陪自己下半世嘅老公都唔諒解,仲要踩多一腳。

嗰一刻,佢忍唔住喊咗出嚟,好大力咁拍枱鬧佢老公:

「你咁鍾意!咪娶你老母做老婆囉!搵埋佢生仔吖笨!」

情孝兩難全 弄得裏外不是人

聽到呢度,女同事當堂拍晒手掌,幾個男同事包括我都面無表情..…因為我哋都好驚,同樣情況發生喺自己身上,正如黎明話:「左手又係肉 ,手背又係肉。」

唔想老婆大肚都發脾氣,有時又控制唔到自己老母落命令……老婆同老母跌落海救邊個先?永遠都係世紀難題。其實撇除前輩後輩,互相尊重,當自己多個女,會唔會就此世界和平?

作為老公,與其讚老母手勢好,更應該抽起手袖,落場幫老婆煮飯,咁樣就算更辛苦,老婆都少啲怨言。

最後,Joyce以一句做總結:「識着個孝子,再加個難頂嘅奶奶真係慘過食屎!」

Tags :