唔講你唔知,credit card 其實除咗可以用來儲分賺里數之外,仲有好多用途!例如有 免費旅遊保險 、延長1年保養同埋購物保障等等。雖然有呢啲嘢送嘅信用卡一般都唔係儲分最多嗰張卡來,但蝕少少分換多個保障返來我都覺得幾抵!特別係 CX AE 卡嘅旅遊延誤保障,delay 4 個鐘已經有錢畀你喺機場食嘢,同埋用佢來買嘢又可以延長1年保養;Citi 同渣打 Priority Banking 信用卡嘅旅遊保更加係保埋你honey同仔女添!

01 | CX AE 及 AE白金(旅遊意外/延誤保障45日購物保障賠償退貨保證1年延長保養服務)


用 CX 嗰 2 張AE卡同AE白金買機票的話,就可以有一個旅遊意外/延誤保障。佢個旅遊意外保障大家都唔係好使睇,因為只係喺你搭飛機或者來回機場出事先包,其他地方都唔包。反而個延誤保障幾有用!只要delay 4個鐘,就已經有高達$4,000畀你買嘢食。其他保險大部分都要6個鐘以上先有錢賠。當然延誤保障亦都包埋行李延誤,有堆錢畀你用來買日用品啦!但注意呢個保障只係包你自己,唔包埋屋企人嘅。

img-global-card-elite
圖片來源:americanexpress.com/hk

另外CX嗰2張AE卡仲有45日購物保障賠償,用來喺外國買嘢幾啱,拎返來爛咗都有得賠。個退貨保證仲好用,因為可以確保買到最平嘅嘢!至於最有用嘅,當然就係1年延長保養服務啦!只要你用CX AE買嗰樣嘢,然後本身佢係包1至3年保養,CX AE就可以幫你延長1年保養服務,當然包嘅範圍就係跟番你原本個保養!但要係你咁多年都keep住有張CX AE先得喎!所以呢個服務用來買電腦手機相機就啱晒!

cx_ae1

旅遊意外/延誤保險:CX_Travel_Insurance_TC / Claim Form (要用來畀晒全數機票)

02 | Citi Prestige / Premiermiles  (免費旅行保險,包配偶及1名子女)

佢哋嘅旅遊保險絕對係值得同大家介紹,因為包嘅範圍都幾足!只要你用呢兩張卡碌晒以下4樣嘢嘅其中一項。

– 全數機票 (包括內陸機,所以換嘅機票係唔得嘅)

– 全數酒店

– 全數package

– 全數團費

咁就可以entitle有佢嘅保險。而且唔單止係持卡人本人,仲包埋持卡人嘅合法配偶 同24歲以下未婚未在職子女,都真係幾抵下!

travel-insurance-promotion

不過佢保一個item就最多得$3,000,唔似得恒生咁可以保到成$5,000一件。但其實$3,000都夠嘅,因為我試過整過一次相機都係整咗$2,800左右,同埋依家鏡頭同機身係分開計,所以都幾夠用嘅!

跟住其他items例如個人現金、旅遊證件、旅程延誤等等,我覺得同出面買嘅保險都差唔多,美中不足嘅地方就係唔包唔見手機,但以免費來講,真係好唔錯了!

citi-prestige-card
圖片來源:citibank.com.hk

03 | 銀聯 (免費旅遊保障/旅行保險,包3名同行人士)

只要用銀聯卡購買來回機票或者用來畀是但一晚嘅酒店錢,就可以有免費嘅旅行保險,而且仲有包3名同行人士。不過注意用普通銀聯白金卡,就得個免費旅遊保障,出發前被取消行程的話,銀聯卡支付的旅費可獲全數退回, 包括機票、 酒店及其他相關費用。(此免費優惠只限每月首400名成功註冊的所有銀聯卡持卡人均可享受免費綜合旅遊保險。 先到先得。)

鑽石及商務卡的話,就有個免費綜合旅遊保險,醫療、住院、個人行李、金錢、旅遊證件等都包。(此免費優惠只限每月首300名成功註冊的鑽石/商務卡持卡人均可享受免費綜合旅遊保險。 先到先得。)

 

cards-business
圖片來源:magroup-online.com

04 | 渣打Priority Banking信用卡 (免費旅行保險,包配偶及1名子女)

只要用渣打Priority Banking信用卡畀旅程嘅公共交通工具費用,包括飛機、火車等或所參加旅行團之團費之 50%以上費用,就可以有呢份旅遊保險。渣打亦勁好係除咗你自己之外,仲要包埋你配偶及1名子女。基本上呢份保險包括意外、醫療同delay,但個人現金、旅遊證件等就唔包,所以並唔係一份比較保得足嘅保險。

PriorityBanking _card

想有渣打Priority Banking信用卡,只要去申請Priority Banking出糧戶口,然後再開呢張卡就得。

總結

大家可以見到,用唔同信用卡買嘢,的確可以得到唔少其他着數。但小斯再一次提醒大家,切勿只依賴信用卡送嘅旅遊保!睇過我對於每張卡送嘅旅遊保嘅分析後,其實大家應該都睇到,冇一份保險係完美嘅,通常呢啲送嘅,係叫做用來補助下你原本嗰份旅行保不足嘅地方,所以保險係唔怕多,大家唔好諗住有免費旅遊保就自己唔再另外買呀!一陣真係出咗事就唔夠保喇!

相關文章