文：Elaine、Rita、Mandy (《新假期》) | 攝：Chi、Mark (《新假期》)
【澳門美食2019】新年過大海掃街 | 10大 澳門平民美食店 推介！
01 | 澳門胡椒餅
用獨家炭烤方法炮製，令烤出來的餅能夠平均受熱，更能鎖住豬肉的肉汁以及胡椒的香辣味。熱呼呼的胡椒餅到手時，仲可以嗅到外皮的芝麻香。餅皮看起來有點硬，但入口出奇地鬆軟，徒手撕開餅皮亦冇難度！
台灣帝鈞炭烤胡椒餅
地址：新馬路大炮台街 1C 地下 (本店)、澳門大堂巷和翠台地下 A 座 12-E (分店)
營業時間：11:00am-9:00pm (新年無休) / 11:00am-10:00pm
電話： +853 2836 2363
02 | 滑滑豆腐花
榮記荳腐憑著真材實料，多年來堅持以黃豆磨製豆腐而不加石膏粉，新鮮磨出的豆腐滑嫩又有豆香，炮製成多款豆腐料理！號稱磨出全澳最滑豆腐的榮記，聞說當年葡萄牙總統到澳時都有食佢呀！
榮記荳腐
地址：新馬路果欄街 4 號地下
營業時間：8:30am-6:30pm (初五啟市)
電話： +853 2892 1152
03 | 意大利手拉雪糕
檸檬車露的雪糕標榜脂肪含量只有 0-8%，比一般雪糕的 13%遠為低，每日新鮮製造，以健康、低脂及創新口味的雪糕為宗旨。招牌檸檬車露口味的雪糕有香濃的檸檬味，感覺似飲檸檬沙冰。
檸檬車露
地址：新馬路大堂巷 11 號地下
營業時間：11:00am-11:00pm (新年無休)
電話： +853 2833 1570
04 | 老字號榴槤雪糕
80 多年老字號的莫義記，其榴槤雪糕早已家喻戶曉，一開蓋隨即飄來榴槤之香。如果不吃榴槤，可以一試木糠布丁，上面鋪滿餅屑，底下的口感則似雪糕，又似奶凍，冰冰涼涼。
莫義記
地址：氹仔舊城區官也街 9 號 A 舖
營業時間：9:00am-11:00pm (新年無休)
電話： +853 6669 5194
05 | 鬆脆軟滑葡撻
長年都好多人排隊，位置方便，撻皮搓得夠薄夠鬆化， 濃郁牛油香和淡淡奶香，再加上微甜蛋黃餡，口感軟滑，入口即溶。$10 一個，超抵食！
安德魯餅店
地址：路環市區戴紳禮街1號地下
營業時間：7:00am-10:00pm(新年無休) 2月6日：7:00am-7:00pm
電話： +853 2888 2534
06 | 百年餅家手信
講起澳門手信，好多人都會諗起杏仁餅，但澳門著名餅家又豈止一間呢？唔識揀的話，米芝蓮已經幫你揀咗！晃記餅家不設試食，推介肉切酥、杏仁餅和金桃酥！
晃記餅家
地址：氹仔舊城區官也街 14 號
營業時間：9:00am-9:00pm，初一至初四11:00am-8:00pm (新年無休)
電話： +853 2882 7142
07 | 心穎BB都食！北海道芝士蛋糕Pastry Snaffle’s
北海道出晒名嘅 Pastry Snaffle’s 輕乳酪蛋糕店，終於開到嚟澳門，連心穎BB都支持！店舖位於官也街附近，十分方便。Catchcakes 全部由日本空運直送，質素絕對有保證！
提提大家，如果心大心細唔知揀咩味好，可以選擇雙拼，價錢一樣，但係可以有兩種口味，都幾friendly。
Pastry Snaffle’s
地址：氹仔舊城區水鴨街15號喜來登廣場地下C座
電話：（+853）2857 6081
營業時間：星期一至日10:00am-10:00pm (初二開市)
08 | 網民推介- 伙兄弟美式越南粉
根據網民推介，原來伙兄弟美式越南粉的湯底係好好，清甜又足料。不過真係好多人去食，如果大家新年去食，真係要早少少同預時間排隊了！
伙兄弟美式越南粉
地址：澳門大街(營地大街) 140-A號 紅窗門大廈地下C座
電話：(+853) 2892 1782
營業時間：星期一至日11:00am-10:00pm (初四開市)
09 | 新增茶市 抵食順德炸鮮奶
之前都聽過呢間太艮堡陳老太順德料理幾出名，但係一直都覺得價錢有少少貴，所以冇去試。大部分主菜單上嘅嘢食茶市都有提供，可以過足口癮。
太艮堡陳老太順德料理
地址：新口岸孫逸仙大馬路澳門漁人碼頭意大利館地下
電話：(+853) 2881 3322
營業時間：星期一至日11:30am-3:00am (全年無休)
茶市時間：11:30am-5:00pm
10 | 澳門名物 世紀咖啡厚蛋多士
香港出名有「厚多士」，澳門都出名有厚蛋多士。世紀咖啡外賣店位於大三巴附近嘅小巷盡頭，記者都差啲 miss咗睇佢唔到。店外長期都排住長龍，無論本地人定遊客都有，有網民話世紀咖啡係大三巴附近少數本地人仲會幫襯嘅食店，質素有番咁上下保證。
今次冇揀到豬扒包，反而揀咗鹹牛肉，鹹牛肉味道啱啱好，唔會太鹹，重點係個厚蛋！真係好好味！好好味！好好味！（重要的事要講3次。）厚蛋煎得啱啱好，咬開入面仲有蛋漿流出嚟，絕對唔會太老，一個字：冇得彈！
除咗多士之外，花生奶油方塊亦係另一推介！雖然近幾年好多地方都有得食類似嘅甜品，但係呢個絕對係我食過最好味嘅奶油方塊，每塊都烘得啱啱好，唔會太腍又唔會太硬，而且花生醬同奶油都十分足料，每啖都會被醬料「漿」住個口，超級邪惡！再加上有花生粒喺表面，口感更加豐富。
叫得世紀咖啡，又點少得咖啡呢？呢度嘅咖啡係用炭燒瓦煲煮成，熱飲炭燒味比較濃，變相有啲苦，不過可以自己加糖；凍飲就反而有啲太甜，記者喺現場都聽到唔少熟客都叫少甜，下次嚟到都會醒目識得叫少甜。