農曆新年大家開開心心四圍去,這段時間,公共交通往往需要加開特別班次、延長服務甚至維持通宵行駛,其實做巴士司機呢份工,都唔係咁易!每逢農曆新年,全世界都有得放假,但佢哋就一樣要返工,車大家去唔同地方拜年!呢篇文要向番佢哋致敬,同埋畀大家知份工嘅心酸, 巴士司機有話兒 !

撰文:《經濟一週》 | 圖片:網上圖片

有苦只得巴士司機知

「好多時脫班都唔係我哋想㗎!有時乘客多、有時遇著塞車,不過啲客有理冇理都打去投訴,仲會一上車就大大聲指住嚟鬧,被人投訴仲會搞到冇年終酬金。開頭都會覺得好嬲,但鬧下鬧下已經冇感覺,唔會再出聲,因為我一開口,佢哋就鬧得愈起勁,全程車不得安寧。」

「有時又會被人指住嚟鬧,就係閂咗門之後追車的乘客,有時我哋唔會再開門畀佢哋上,因為依家啲新車,每次開門前都要拉手掣,閂門之後先鬆手掣,而每次等道門閂埋都要7、8秒。次次有人追車都要開門畀佢嘅話,開得畀一個,又會有第二個跑嚟,分分鐘要等多1分鐘先離到站。」

圖片來源:KMB
圖片來源:KMB

01 | 人有三急都要忍

眾所周知,做巴士司機冇得定時去廁所,一轉車起碼都半個鐘,遇著塞車,急起上嚟真係唔知點算,所以做呢行好容易有腎病。

sksinn20160516217_20160517_L

02 |  OT好少錢!

呢行做到60歲就由全職轉兼職,兼職人工的計法係每人編咗更,嗰幾個鐘就以時酬計算,如果OT就以分鐘計算。但OT啲錢得好少,所以好多師傅都寧願趕收工唔OT,變咗尾嗰程車揸快啲或者飛站。

20150720091452_73049
以前揸開嗰條線就係一直揸嗰條線,依家又派到一日揸幾條線,要熟習幾條線,隨時調嚟調去,好容易就行錯路。

03 | 一星期返6日

雖然招聘廣告上面寫新入職有二萬幾蚊人工,但係只有第一個月有底薪有bonus先有呢個數,其他時候就要日日OT先有呢個人工。巴士司機基本工時係9個鐘,但通常每日都係10個鐘多啲。一星期仲要返6日,得一日放假,過時過節仲一定冇假放,真係好大壓力。

九巴司機招聘廣告。

網友回應:食得鹹魚抵得渴?致敬先啱!

有人聽完司機的苦況,會輕鬆掟出世界key金句話「食得鹹魚抵得渴」,但亦有網友表示諒解: 「職業司機返6日工,要日日精神又要高度集中……」亦有人表示直頭要致敬:「向巴士司機致敬,有啲乘客真係好無理,有次坐嗰架車好多人等,但上咗車後,嗰幾個廢坑一上車就投訴幾班車上唔到,但自己上到車就有位都唔行入啲,司機叫佢哋幫幫手行入啲,佢哋仲鬧番司機轉頭,仲要上車鬧到落車,黐線!」

相關文章