今個聖誕,鐵道粉絲最愛的靜岡縣「大井川鐵道」有新搞作,只於夏季營運的Thomas列車將會於聖誕重開,圓滾滾的Thomas更會配戴應節聖誕帽登場,記者到靜岡現場直擊更發現萌爆 聖誕版Thomas火車 攻陷現場少男少女、師奶阿叔歡心,究竟想上車又有咩要注意?等我話你知啦!

Q1 | 邊度搭到 聖誕版Thomas火車 ?車程幾長?

Thomas列車起點位於靜岡縣「新金谷站」,終點站為「千頭站」,車程約1小時15分鐘,從東京乘搭新幹線到靜岡縣約1小時,再轉JR到Thomas列車起點「新金谷站」約45分鐘,因此不少人會以一日遊形式乘坐Thomas列車。

Q2 | 聖誕版Thomas火車 有咩睇?

今次的Thomas蒸氣火車是由c11型227號蒸汽火車改裝,今次更會以聖誕造型登場,最觸目當然是火車頭位置,精靈趣緻的Thomas帶上聖誕帽,可愛度爆燈!終點站「千頭站」更會舉行展覽,佢最好朋友Percy、Hiro及Rusty會在站頭長期駐守,5大巨頭同時出現,影相都影到手軟!此外,場內亦設迷你Thomas小火車及碰碰車遊戲,呃like一流。最令人拍爛手掌是千頭站的掉頭環節,工作人員出盡九牛二苦之力,連車帶軌作180度掉頭回程,現場觀眾除會見到Thomas回眸一笑,佢仲會噴出濃煙及發出震耳欲聾汽笛聲,勁架勢!

Q3 | 除咗Thomas火車,仲有咩值得睇?

大家抵達「新金谷站」記得到車站對面Plaza Loco濕平血拼,商店內還有售Thomas造型的鐵路便當,大家記得買上車食!此外,當然還有一系列Thomas精品,買俾姨甥做手信就冇得輸喇!

 

Q4 | 遊客可以點樣買飛?

今次Thomas列車及James列車都會限定行駛,由於兩款列車每日來回各設一程班次,因此在日本又會掀起搶飛潮,聖誕檔期車飛早於10月售罄!今次搭唔到的朋友,可以等到下年6月的夏季行駛,車票單程約2,720円(成人)、1,360円(小童),不過要買車飛,最少要早3個月網上訂票,仲要有撳爛F5掣的心理準備,因為官方會以抽籤形式售票,每人最多限訂4次,忠粉記得留意官網update喇!

Thomas聖誕期間限定列車

日期:12月17至19日、23至25日
路線:往返新金谷站到千頭站
出發時間:
・James列車:10am從新金谷站開出、11:13am抵達千頭站;1:39pm從千頭站回程、2:53pm抵達新金谷站
・Thomas列車:10:38am從新金谷站開出、11時54am抵達千頭站;2:10pm從千頭站回程、3:27pm抵達新金谷站
費用:¥ 2,720(成人);¥ 1,360(小童)
網址:http://oigawa-railway.co.jp/

相關文章

Thomas 迷必去 | 香港聖誕 Thomas & Friend 火車頭展

最新的日本入境要求詳情?

在入境日本前,建議先用Visit Japan Web完成一部分檢疫手續,便能更快速地入境日本,即睇使用教學,例如註冊步驟及同行家人如何填寫等,以及買定日本電話卡