當親戚朋友得知我新年飛日本後,第一時間搭單要買福袋!今年大型百貨公司如伊勢丹,仍然要等到1月3日先會開賣福袋,不過大家買開的 Laforet、MYLORD等,仍會依照傳統在元旦日開賣。N年前,年少無知的我在CA4LA帽子專門店花了10,000円購買福袋 ,當我滿心歡喜以為執到筍貨時,一打開福袋,入面的確有8頂帽,但當中有一半係金光閃閃的印度帽、蛇紋頭帶,仲有橙色冷帽⋯⋯唔中過伏,又點知揀福袋要審慎呢?

text:遊日職人 | photo:網上圖片、官方網站、Twitter、Instagram

記者教路揀福袋全攻略

中過伏,方知買福袋其實好易瀨嘢!跟日本友人討論過,大家原來會做足功課先去搶(好奸),減低中伏的機會。

同時大家都會在百貨公司即開福袋 ,揀了自己想要的商品出來,其他唔啱心水的東西,一係即場跟其他人以物易物,一係就會放上網賣,務求可以散貨。

圖片來源︰digishibu

東京福袋開售日期

店舖 福袋出售日期
伊勢丹 1月3日(10:00am)
0101 1月2日
松屋銀座 1月2日(9:30am)
新宿MYLORD 1月2日(10:00am)
西武池袋本店 1月1-3日(10:00am)
東武百貨店 池袋店 1月2日(9:30am)
Laforet 1月1-3日(9:00am)

01 | 睇往績

日本妹買福袋成癮,即使年年中伏,但為了攞意頭(其實都係以小博大,貪小便宜),依然年年幫襯。

你精我都唔笨,好心網友就造福人群,整理了不同牌子福袋的往績,睇下有邊幾個牌子的福袋係買得過。

所以想買到正的福袋,要學識關鍵字:「福袋の中身」(即係裝住咩),想執到筍貨係要認真做資料搜集!

以下係我刨足咁多日,綜合得出值得買的心水選擇!

4大抵買福袋推介

推介1 | 「三秒完售」的驚人紀錄-AIGLE

AIGLE的福袋出名難搶,每年元旦甫一開售,瞬間就會被搶購一空;網站更誇張,AIGLE OFFICIAL SITE曾創下了「三秒完售」的紀錄!

冇計啦!平日買件橫間衫都成萬円,依家可以買到兩件外套+T-shirt+布袋,直程係抵到爛啦!

看看過往AIGLE福袋的內容吧!

福袋價格:10,800円

福袋內總額:40,000-70,000円

推介2 | CP值之王-HAGLOFS

來自瑞典的山系名牌,平時一件外套動輒三、四千,而福袋竟然只售21,600円(約HK$1,525)!絕對可以當選福袋CP值之王!

這位網友更幸運,福袋價值竟高達133,000円!這根本是中大獎了吧?

福袋價格:21,600円

福袋內總額:80,000円

推介3 | 少女夢幻睡衣-GELATO PIQUE

夢幻睡衣品牌,軟綿綿又粉嫩嫩的,啱晒少女心爆滿嘅你!

先看看網上預購的豪華福袋吧!內有兩套完整的睡衣,省去配搭的工夫!

福袋價格:(普通)8,640円;(Premium)16,200円

福袋內總額:20,000-30,000円

推介4 | 至少10件物品以上-earth music & ecology

earth music & ecology的福袋誠意十足,每個福袋入面至少有10件物品,總值超過40,000円!而且還有四款任君選擇,滿足你不同的需要!

還有一款「超值特別款」,除了以上三款福袋有的上衣及下著外,還包含兩件外套等,共有18件物品,總值超過80,000円,而且只售15,000円!這款福袋太受歡迎,所以會被瞬間秒殺。

福袋價格:10,800円

福袋內總額:50,000円

推介5 | 最抵買之選-モンベル mont-bell

說到抵買福袋,mont-bell當之無愧!福袋裡的全是高質品,價值是福袋價錢的兩倍以上!

雖然mont-bell的福袋也能網上預購,但只限mont-bell club的會員。不過mont-bell在這兩年並沒有出售福袋,惟有以2016年的福袋內容作標準。

福袋分別有男性用及女性用,兩種均設有S、M、L及XL四個尺寸。

福袋價格:10,000円、30,000円

福袋內總額:30,000-60,000円

02 | 主攻小物

真心講,衫我好少買福袋,成袋入面又唔係件件啱口味,送畀人都未必有人要。 寧願等到月中Laforet/伊勢丹減價,逐件睇中先去買,至少買到的衫我係會著,唔會浪費地球資源。

綜合我多年中伏經驗,福袋「唔好買衫,改攻小物」就有著數!例如去靴下屋買襪的福袋、中川政七的雜貨福袋、Laduree的化妝品福袋等等,通常都正正常常,值回票價!

4大抵買福袋推介

推介1 | 高質生活雜貨-中川政七

以手工紡織的麻織品起家,至今已經有三百年歷史的奈良老店,近年引入更多文創生活雜貨,貨品高質,福袋更不能錯過!

福袋價格:3,000円、5,000円、10,000円(不含稅)

福袋內總額:5,000-20,000円

推介2 | 身體護理用品-SABON

SABON這個品牌主打全年齡向的身體護理用品,小朋友也適用,放在家裡準沒錯!

福袋價格:12,000円

福袋內總額:20,000円

推介3 | 受香港人的青睞-john masters organics

不止日本妹,這個牌子的護髮產品亦廣受台灣及香港人的青睞!而john masters organics的福袋裡,除了有頭髮護理產品外,還有Sinn及erbaviva等護膚產品!一個字,抵!

福袋價格:10,800円

福袋內總額:26,000円

推介4 | 日本妹熱捧-Laduree

化妝品的百年老店!Laduree的福袋向來廣受好評,品質絕對有保證,不過Laduree的福袋只能到店舖排隊購買。

加上在日本的店舖為數不多,年年都爭崩頭,難怪被日本妹奉為必搶的神級福袋!

 

福袋價格:3,000円、5,000円、10,000円

福袋內總額:15,000-20,000円

03 | 網上預購

湧去搶,好易失去理智,買埋一堆唔等使的身外物。依家好多日本人買福袋都唔會等到元旦去搶,而係會網上先行預約。

對冇時間去日本現場搶福袋的朋友,一樣可以用轉運方式來買福袋,部分福袋更是網上限定!網店仲有圖給大家作參考,今次唔使擔心中伏啦!

4大網上預訂福袋推介

推介1 | 集合14個時尚品牌-RUNWAY channel

有齊MURUA、EMODA、Ungrid、Dazzlin、MERCURYDUO等 14個品牌,最正係福袋部分商品有齊相,仲可以揀埋顏色先買!

網址: runway-webstore.com

推介2 | 少女潮牌-FASHION WALKER

冇買機票都唔驚,此網站可使用 tenso轉運服務,個福袋直頭可以送到去你屋企!少女夢幻品牌 snidel、GELATO PIQUE、Salon de Balcony的福袋都有得買。

網址: fashionwalker.com

推介3 | 適合不同年齡層-MAGASEEK

集合了 79個男女老少人氣品牌: earth music & ecology、coen、SEVENDAYS SUNDAY、miki House、MERCURYDUO,好多都係訂價 10,800円,不過要訂福袋,得先成為會員。

網址:www.magaseek.com

推介4 | 最大的網購平台-Rakuten BRAND AVENUE

日本最大的網上購物平台,說明圖片包括福袋部分的商品,中伏極都有幾件啱心水。品牌包括siffler、Merry Jenny、nano-universe等等。