近年去日本,總會有一種莫名的失落感,眼前的好山好水好風光,因為過度的觀光開發,令人覺得傳統味道正在一點一點的消失。A君今次為了出發找尋原汁原味的日本原風景,出發去鹿兒島玩跳島,決定去與論島見見傳說中期間限定的純白沙洲「 百合之濱 」!日日凌晨4點起身坐貨船、搭內陸機,究竟值唔值得?百合之濱又係唔係好似網上熱傳咁靚?即刻睇睇啦!

採訪:Alex @ A君的泡菜日誌 | 圖片:Scott

Q1| 百合之濱喺邊?

百合之濱位於與論島大金久海岸對出約1.5公里,要坐艇仔才能搶灘,但每個月只會在潮退時快閃現身,標誌性的波浪紋純白沙洲,即使查好日子出發,都要靠運氣才有機會看到。由於網上熱傳,帶挈來回百合之濱的觀光船航班已大大增加,可惜連經驗豐富的船家都未能準確預測沙洲露出探頭時段,個個只敢保證玻璃水任睇,所以要親眼見到天堂秘境真的可遇不可求,難怪愈難愈愛,人人慕名而來。

Q2| 搶灘辛苦嗎?

其實唔算,不過要好早起身,因為要追趕黃金2小時退潮時間!首先去大金久海岸,轉乘當地船家的小艇,當日記者就坐「幸福丸」出發,沿途湛藍海水碧波蕩漾,海天一色靚景已令人期待天堂國度的夢幻畫面。短短10分鐘,突然看到海底有一層薄薄白沙,我就知「到埗了」!落船時水位只及膝,走兩步話咁易上岸,完全唔辛苦!

Q3| 島上有咩玩?

由於是淺灘,所以冇得玩浮潛,不過見到腳下閃到反光的玻璃水,當然不能錯過影閃卡機會,沙洲上隨處可見情侶放閃、小孩戲水,甚至有人玩香蕉船!而且百合之濱有個傳說,因為沙洲中藏有獨特的星沙,雖然是孔蟲的外殼化石,但形狀夢幻人人想要,而傳說話只要找到與歲數相當的星沙,就可以獲得幸福!難怪沙洲上人人都「烏低身」尋寶啦!

Q4| 百合之濱幾時先會浮面?

想睇百合之濱,除咗要留意潮漲潮退時間,原來月份季節都有影響!雖然是日本南部的亞熱帶地區,長期氣溫都大概維持喺20度,不過踏入冬季,百合之濱依然會消失一段時間,最快要到下年5月先有得睇。暫時想立即出發搶灘,可能就要先去沖繩的外島喇!

 

2017官網預測現身時間:

5月10-14日、25-31日

6月9-14日、24-29日

7月9-14日、23-28日

8月7-12日、21-25日

9月9-18日、21-24日

百合之濱

地點:大島郡與論町東海上

交通:於與論島大金久海岸前往百合之濱,船程約10分鐘

費用:2,000円 / HK$146(來回)

電話:+81-(0)997-97-5151

備註:出發前須打電話與船家確認

網址:www.yorontou.info

下一頁:年度限定「移動沙灘」|日本鹿兒島 百合之濱 QnA

最新的日本入境要求詳情?

在入境日本前,建議先用Visit Japan Web完成一部分檢疫手續,便能更快速地入境日本,即睇使用教學,例如註冊步驟及同行家人如何填寫等,以及買定日本電話卡