自問中了 台南 旅遊毒嘅你，唔知最近有冇毒癮起，想今日遞假紙，聽朝就出發去 台南 呢？毒還毒，我阿佳就想知你除咗奇美博物館、七股鹽山、藍晒圖外，你又有冇去過以下7大必訪景點？佢哋主要喺中西區，可以話係文青必到，集小吃美食與藝術文學於一身，最啱漫步旅行！
1 ｜懷舊新美街
唔講你唔知，原來新美街有台灣第一座武廟「開基武廟」，除咗傳統嘅米舖同舊式旅館，仲有好多年輕藝術家成立嘅藝文空間，相當有文藝氣息。新美街上嘅「泉興榻榻米」有位國寶級老師傅李金水坐鎮，佢製作嘅榻榻米有成70年歷史。帶唔到咁大張榻榻米返閨，可以DIY榻榻米杯墊，帶返屋企留念，想玩就要預先同「妳好南搞工作室」預約！
2 ｜敗家勝地林百貨
2014年重新開幕嘅林百貨喺日治時期係南台灣最大嘅百貨公司，依家就化身成台南文創地標，集中數十家文創商店，大把嘢買，小心敗晒今個月份糧！我阿佳推介專營連身洋裝嘅Kan’s，係台灣唯一以1920至1940年代Art Deco風格為主嘅服飾店，特選華麗細緻嘅布料以手工製作，穿洋裝遊台南，浪漫又懷舊。
3 ｜影迷至愛全美戲院
正所謂文青一定鍾意睇戲，文青亦更鍾意流連戲院，仲要係愈懷舊愈好，咁先可以影多幾張相，呃多啲like。大導演李安細個成日去嘅全美戲院，係咪聽到個名已經想去呢？嗰度保留咗全台唯一嘅人手繪畫電影海報，院內院外都忠實地保留著原貌，係電影迷不可錯過嘅人文風景。
4 ｜國華街與正興街
國華街喺清代係庶民匯聚嘅市集，入面有座250年歷史嘅水仙宮市場，仲有好多由老屋改建成嘅文創店家同小食。正興街喺台南係最知名嘅文創商圈，藏匿著許多隱藏版特色小食。呢度嘅老宅已被年輕人進駐，改裝成一家又一家獨一無二嘅藝文空間、咖啡店、二手商店，一片古早台南嘅繁華景象！
5｜飯後漫步神農街
神農街喺清代係最繁華嘅貿易市集，好多老屋到依家仍然保留住清代同日治初期嘅外觀結構。除咗私人住宅外，百餘公尺嘅街道排滿文創商店、旅店、飲品店，同唔同嘅藝術工作室。每到夜晚，呢度都會亮起昏黃古樸嘅街燈，最啱食完晚飯嚟行個街、散下步。
6｜小南天生活輕旅
小南天生活輕旅由超過百年歷史的老建築改建而成。係一間以傳遞台南嘅美好人情味為宗旨嘅小旅館。不論逛老街、古蹟，都非常方便。
7｜台南晶英酒店
離台南孔廟不遠嘅台南晶英酒店係台南五星級住宿首選，有戶外泳池同多種休閒設施。住客仲可自由使用酒店嘅單車租用服務，可以嚟一次台南單車漫遊，連出去租T-bike嘅時間都慳番，超方便！
網址：https://goo.gl/eOHGMB
仲有睇下台南有咩好酒店、旅館？呢度有340個選擇，即去 https://goo.gl/eCF1x5 睇睇！
以上照片由都市遊魂提供 （https://www.facebook.com/citytraveldreamer/)