你有冇試過,因為一張封面照片而觸動旅遊心癮?多年來逢星期一於報攤發售的《新假期》最近變陣,今個星期四(10月13日)開始,將與《東方新地》、《新Monday》及《More》以「一書三冊」的形式共同出版。作為以旅遊飲食作主題的周刊,《新假期》稱得上最歷史悠久的旅遊雜誌,17年來能夠於報攤上佔一席位,都係一項成就。以下經典封面重溫,你有冇買過,甚或瘋狂儲起一疊,作為 「夢想之旅」的坐標?

十七年前《新假期》創刊

•#001期 •時間:1999年9月 •Cover Face:何嘉莉
全港首度推出以旅遊為專題雜誌,帶你環遊世界試玩試食。創刊號封面人物是誰?當年紅極一時的英皇小花何嘉莉,當年19歲。

ww001
創刊的封面專題,同依家啲網站listicles冇乜分別,都係用數目量化大堆頭介紹--「台北16夜遊點,24小時狂吃地道美食」,依家大家喺fb都主要係share呢啲嘢。

娜姐出道作,燙金邁亞密!

•#356期 •時間:2006年7月 •地點:美國邁亞密
身材驕人的周秀娜當年21歲,於Miami沙灘上食西瓜拍封面,是其中一期賣斷市的經典。有份締造Chrissie迫爆邁亞密的旅遊記者,原來對當時場面不感到太震撼,她表示:「其實Miami真係好大--地方大、海灘大、當地人又高大又喜歡裸曬,我身處如此環境,係唔會覺得特別澎湃囉!又加上太陽熾熱頭昏腦脹,我但求model反應夠快表情活潑,其實已經託賴⋯⋯」

ww356
這封面出版後,Chrissie才獲注意,簽約拍寫真、出攬枕,此後已是大家熟悉的後話。其實這個2006年封面旅程,周秀娜並非首選,記者憶述:「當年模特兒公司係推介另一個女仔,不過又箍牙又冇身材,點帶佢去影水著喎!而且個名都騎呢過人,叫做Angelababy,悲咩bi啫⋯⋯當時我諗⋯⋯」

蔡瀾全裸上陣,浸溫泉!

•#152期 •時間:2002年8月 •地點:日本岡山

蔡生是《新假期》的老朋友,他帶隊出門每每也會預我們一份。02年盛夏,蔡生帶我們到日本岡山摘樹上熟白桃,過後一行幾十人到免費露天風呂(即是男女共浴、無遮無掩的那種)。蔡生去到外地,很多時都堅持尊重當地人的生活文化,到日本浸溫泉也不例外,身先士卒脫下身上衣服就地即浸,又謂:「大家都有嘅嘢,不過穿上的都是父母親生的衣服而已。」最後這張照片也成為了《新假期》早期最震撼的封面。 WW152

英倫專訪Paul Smith工作室

•#759期 •時間:2014年3月 •地點:英國倫敦

普羅對《新假期》印象係,「封面主角多數係水著模特兒,好少係男生上cover」,但其實都有例外,除了蔡生或者泰國通胡慧冲,其實仲有Paul Smith,記者膽粗粗要求與阿sir見面,誰知一口應承,寫信,偶像真的會覆!素聞阿sir以英式幽默和親民作風籠絡世人,當日採訪得見,確是老頑童一名!影相主意多多,突然孭起model都夠膽死,甚至自發度甫士、舞動工作室木棍「哄」攝影師,當然仲有跟記者selfie啦!

騷美腿的模特兒其實係英國留學生。
用色「黑掹掹」的封面,對於銷量而言其實係兵行險著,於是除了Paul sir,你仲會見到當時好紅的金秀賢大頭,介紹佢廣州的見面會;另外一則花邊,騷美腿的模特兒其實係英國留學生,慳張機票,記者要跟她在倫敦會合,接job時表示:「唔知Paul Smith係邊個」!

徐若瑄20分鐘上封面

•#339期 •時間:2006年3月 •地點:香港

06年這個於酒店拍攝的徐若瑄封面,由於徐若瑄當時於香港的行程非常緊密,其實只是於新聞發布會後限時拍攝。

WW229
攝影師憶述徐若瑄的態度超級親切合作,所以20分鐘便完成!

性感側臥墨西哥

•#199期 •時間:2003年6月 •地點:墨西哥

頭幾年跟《新假期》出trip最多的cover girl一定非Tanya莫屬。

ww199
2003年6月出版的封面由終極性感的Tanya演繹,引起坊間極大回響。未有電子版的年代,類似封面經常被scan於網上廣泛流傳。

  係巴黎唔係澳門巴黎人

•#320期 •時間:2005年10月 •地點:法國巴黎

2005年記者跟Ella同遊巴黎,靚人靚景好天氣,成就這個大家叫好的封面。

ww320
這個一點架子也沒有的傻大姐,鏡頭後經常為大家搞氣氛!

俄警追趕走鬼拍攝

•#324期 •時間:2005年11月 •地點:莫斯科紅場
10月入冬,莫斯科時陰時晴,氣溫只得三、四度,model也只得穿雪白背心外衣露大髀,不過是為了影個「靚」封面。俄羅斯脫離共產好幾年,要發財的發了,警察收入卻很少,所以便向遊客埋手。因model需要很招搖地盛裝在紅場影封面相,人人都知我們是來工作,冇得呃。在紅場一個角落,布景是洋蔥頭教堂,model對住鏡頭一秒轉一個pose,攝影師怒閃,我就看著距離廿呎的克里姆林宮士兵呼喚警察,警察一路跑過來趕,大家一仆一碌奔走⋯⋯

ww324
當街飲vodka取暖都算了,最怕是被警察趕,前來問記者要錢。

回到最初--煲劇緊要過去旅行

•#008期 •時間:1999年11月 •Cover Face:郭可盈
回顧雜誌創刊初期,仍然以藝人大頭相作主打,不時以娛樂頭條蓋過旅遊資訊,譬如當年首播的《創世紀》結局周,不惜劇透女主角穎欣下場⋯⋯

ww008

創刊初期,全部都係藝人大頭,迎接2000年的封面故事,叫做「34C世紀波陪你倒數」,封面人物係郭靜純(當年的雞扒妹鄭家純,應該只有6歲)。
創刊初期,全部都係藝人大頭,迎接2000年的封面故事,叫做「34C世紀波陪你倒數」,封面人物係郭靜純(當年的雞扒妹鄭家純,應該只有6歲)。