01| 陸永愛妻號 每日準時越洋報到
陸永結婚五周年再向太太求婚，震驚香港七百萬人，仲令佢成為「愛妻號」！去到英國，係咪一樣咁絕種好男人？監製就力證佢係「超級愛妻號」－－每逢停機準備set up或搭車時，陸永都一定越洋報告同哄哄家中千金，仲要唔係簡單報平安，而係耐心將所有行蹤逐一報告，可以說是「嚴重劇透」，誇張到監製都忍唔住話：「你老婆未睇都已經知道晒所有節目內容喎！」「愛妻號」果然名不虛傳！
陸永結婚五周年再向太太求婚，好浪漫！
經常post晒命一家合照，今次仲不停越洋報告，愛妻號level升級！
認真問：會打算送阿女去外國讀書嗎？
本身陸永堅持唔會畀愛女去外國讀書，但嘩鬼旅程完結後，佢反而有全新感受。
「其實香港同英國教育制度真係各有各好，不過喺外國讀書會有好多不同的經驗，就例如香港小朋友可能呢一世人都唔會爬過樹，但外國老師反而叫小朋友盡量去試，滿足好奇心，我覺得呢個教育方法真係好好！」
陸永囡囡勁得意，難怪佢本身唔捨得送囡囡去外國讀書。
農夫遲到被罰要陪小朋友爬樹，佢哋最surprise係老師完全冇阻止，反而叫小朋友盡情玩！
02| 英鎊跌都冇去shopping？因為要陪Do姐！
拍攝《嘩鬼上學去》正值7月頭英國宣布脫歐，英鎊插水式下滑，咁好機會佢哋有冇去掃貨呢？
監製就話：「拍攝行程超趕，free time只得最尾半日。」不過Do姐現身，兩位瞬間變跟班，當然陪娘娘去Harrods啦，之後情況同《跟住Do姐去Shopping》一樣，農夫當然係有得睇冇得買！Do姐事後叫佢哋去機場Duty Free睇，點知原來陸永想買啲品牌喺機場係冇專櫃的，所以……最後係咩都買唔到！So sad！
Do姐出動，農夫又點會唔去服侍娘娘呢？所以，Do姐有收穫，佢兩個咪陪行街囉！
監製都話拍攝行程超趕，最誇張係4:00am集合去練游水，影到夜晚先收工，難怪佢哋冇心情shopping，一有機會就攤喺地上。
03| 農夫係即場爆肚？定係事前諗gags？
節目咁好笑，監製就話其實70％係roll機前已經傾好，所以拍攝場景其實有set up，不過佢自己就覺得另外30％即場爆肚其實更好笑，就如試校服時，佢哋係預計嬸嬸會突然叫佢哋自我介紹，好彩C君陸永轉數快，即刻答到Andy Lau同Jackie Chan，場面好好笑！監製最多謝佢哋係，有時度咗橋但唔好笑，佢哋即場爆肚都救得番，實在好厲害！
拍攝團隊其實只有5個人，所以諗橋好多時都要農夫幫手，不過監製大讚佢哋兩個投入度高！
即場爆肚話自己係Andy Lau同Jackie Chan，監製話係當日最無厘頭但好好笑的場面。
04| 惡搞老師 真係嬲咗！
不少網民都話第一集，農夫惡搞老師實在冇大冇細！唔知老師有冇嬲？其實9成老師、舍監和同學仔都好鍾意佢哋，不過上堂時，拉丁文老師同美術老師對於佢哋惡搞都畀唔到反應，而且真係有啲嬲。好彩佢哋兩個識做，即刻哄番老師，而且發揮搞笑功力，場面先唔怕太尷尬！其餘時間農夫同朋友仔都相處融洽，臨走時同學仔都好唔捨得！
玩到咁，我係老師都嬲吧！
因為事前有溝通，老師拍攝時其實已經盡量唔黑面，開心講解。
但示範時依然忍唔住有少少黑面。