每當聽到人講:「你又去旅行呀?咁有錢嘅?」就會好嬲,旅行係平有平去,貴有貴去,睇你點使法嘅啫!如果有得慳嘅地方你唔慳,你咪蠢囉!就好似早排有傳媒教用訂房網站的「安心價格保證」,賺差價慳到盡,就引來極大回響,有人鬧爆記者教唆人明知 book 貴咗都要 book,又話搵人哋公司笨唔值得推廣……不過亦有人支持呢個「扣減雙倍差額」方案係白紙黑字列明的著數,唔用先係蠢。不過講真,你估該網站唔知呢個所謂漏洞咩?想精明消費,不如睇睇以下 3 大網站  訂酒店慳錢 心得!

01 | 雙倍奉還價格保證 | Expedia

網上較大型的酒店網都有價格保證,即係同一入住條件下(如日期、房型、包早餐、取消政策等等),若你搵到其他網站仲平啲,會退還差額,當中 Expedia 講明雙倍奉還,最多退 $800,都算多。

小貼士 :  細則好嚴苛,如價格保證只限交易後 24 小時內,仲要截圖證明,再填表格申請退款,網站顧問仲會電郵跟進數次,才會退回差價,手續繁複。

02 | 電腦 check 完用 app 訂 |  Agoda

記者試過喺 Agoda check 酒店格價,點知同一間酒店竟然愈查愈貴,好似就快被人訂晒咁款,再用手機開 app 再 check,發現仲平過網頁價格!其實好多網頁都有暗中記錄你的查詢,如果房價突然飆升,不妨轉用手機睇睇!

小貼士 : 雖然要裝多個 app 嘥 memory,但 Agoda 個 app 有時會有額外優惠,房價更實惠。

03 | 記得做會員 | Hotels.com

入咗會有勁多優惠!一:會員價比街客平少少,而且訂房次數多可以升級會籍,更早收到優惠。二:會員住 10 晚送 1 晚,免費房間的房值相等於累積 10 晚房價嘅平均數, 9 折左右!

小貼士 : 10 送 1 嗰晚唔係間間酒店適用,但幫人訂房住咗都計,可以幾人合用一齊儲!