到澳門短途旅遊鬆一鬆,與其去人潮不斷但名過於實的遊客店被人劏,不如容許我呢位土生土長的澳門小市民帶大家來個本土小店巡禮!今次介紹的幾間 澳門茶記,位置同屬新橋區,裝修雖然冇咩睇頭,但勝在係本地人蒲開,食物亦夠貼地。等我馬上 highlight 番呢幾間店內嘅「冇得輸之選」畀大家,避免發生「去啱地方但嗌錯嘢食」的悲劇!

01 | 星洲炒公配樽仔奶茶 你聽過未?


於1987年開始營業嘅馬慶康南天咖啡室,每日都群情洶湧,可謂包辦咗唔少高士德區居民多年來嘅午餐同下午茶。重記得我啱啱搬到嚟這區生活,餓住咁喺隔籬銀行等到個胃就衰竭,把心一橫攞住銀行派嘅籌第一次入去馬慶康醫肚,結果一食就返唔到轉頭,依家唔每個禮拜準時嚟呢度坐下會周身唔聚財。

Processed with VSCOcam with f2 preset
星洲炒公 MOP35

星洲炒米就話耳熟能詳吖,但星洲炒公真係聞所未聞,孤陋寡聞嘅我幾年前第一次喺馬慶康個餐牌見到星洲炒公仔麵呢個咁邪惡嘅組合真係打咗個凸,但作為一個從來都唔潔身自愛嘅人,梗係要試下嘅。呢個星洲炒公真係好癲,每一啖都充滿撲鼻嘅咖喱香氣,配料有火腿、叉燒、雞蛋、青椒同洋蔥等等,非常豐富,炒過嘅公仔麵鑊氣十足,麵質冇因為炒過而變得乾身難吞,正呀喂!

Processed with VSCOcam with f2 preset
叉燒蛋治 MOP22

蛋夠晒滑溜,叉燒唔算厚身但落得大方。

Processed with VSCOcam with f2 preset
樽仔奶茶與樽仔咖啡 各MOP15

我深信,馬慶康個樽仔奶茶同咖啡係呢度長期坐滿食客嘅原因之一;透心涼嘅樽仔奶茶,係預先調配好嘅黃金比例,茶香豐厚,連樽帶奶茶一齊入雪櫃,一粒冰都唔會加,唔會因為啲冰唔生性溶咗而影響奶茶嘅濃郁度。

IweMG_3136 copy
椒鹽豆仔扒飯MOP36

IMG_3144
煎蛋叉燒飯 MOP30

除此之外,馬慶康亦有提供充滿男人味嘅碟頭飯。呢度個椒鹽豆仔扒飯同重豉油太陽蛋叉燒飯陪我度過咗好多個糧尾嘅下午㗎!

sadasd

馬慶康咖啡室

地址:澳門新橋(三盞燈/白鴿巢)俾利喇街65號A
電話:+853 2859 0161
營業時間:7:30am – 6:30pm
溫馨提示:由港澳碼頭坐12號至高士德培正中學落車再步行約8分鐘

02 | 厚過字典西多士!客人創意配搭 芝士豬扒菠蘿包

新鴻發咖啡美食絕對係我心目中嘅最佳茶餐廳之一,因為餐牌上每件出品都係水準之上,另外佢哋好接受食客們嘅「騎呢新奇」要求,為咗滿足食客而做餐牌上不存在嘅配搭(咁當然唔好去得咁盡啦),食客嘅奇怪要求反而為新鴻發孕育咗多款人氣爆燈嘅美食,漸漸成為咗新鴻發潛在文化。

就好似呢個又鹹又甜嘅芝士豬扒菠蘿包,唔知幾時開始,喺網上瞬間爆紅起來,大概係因為澳門知名食評家老陳先生同網友嘅全力推波助瀾下,令呢個組合成為新鴻發嘅代表性名物之一。菠蘿包外脆內軟。

IMG_3135
芝士豬扒菠蘿包 MOP28

夾住惹味嘅豬扒同芝士,豬扒偏瘦,吃落完全唔油膩但又唔會又乾又硬。除此之外,你大可以運用創意用個菠蘿包嚟襯唔同嘅餡料,好似火腿蛋菠蘿包、太陽蛋餐肉菠蘿包等,都係令網友們心醉嘅組合之一。

IMG_3131
蛋撻 MOP 7

這裡的蛋撻皮酥餡嫩,蛋香濃郁而且一點也不油膩。能在下午和好友相聚於茶餐廳,呷一口冰凍奶茶,吃著剛出爐熱騰騰的酥皮蛋撻,愜意如此,真的是夫復何求呢!

厚多士去片:

Kitty Liu on Instagram: “? 厚❕多❕士❕? #macau”
法蘭西多士 MOP25 (Photo by egg831)

呢度厚過牛津高階漢英詞典嘅西多士亦係新鴻發嘅名物之一,佢個分量真係震懾整個社區,我望住佢真係連落刀都唔識點落。西多士個外層酥脆金黃,內裡鬆軟,切開中間係一層厚厚嘅花生醬,加埋牛油同糖漿後,就係拋開體重大啖享用嘅時候喇!活在當下咪就係咁解囉!

IMG_3141
凍奶茶  MOP13

嚟到新鴻發,唔叫奶茶嘅話,真係好難同自己交代。呢度嘅凍奶茶係預先跟方程式調配好嘅,每次飲都保持水準,入口濃、香、幼、滑,中晒一杯極品奶茶要具備嘅條件,出色到令人迷戀。

wqeqwewqe
乾炒牛肉通粉加太陽蛋 $43

通粉同牛肉充滿鑊氣,惹味非常,要將通粉炒到咁分明又不怕糊,都真係幾考工夫。另外個太陽蛋煎得好理想,黃蛋呈流心狀態,歡迎篤爆佢令濕潤嘅蛋汁佔滿通粉繼續享用。

新鴻發咖啡美食

營業時間:6:00am – 6:00pm
地址: 澳門賈伯樂提督街55號A
電話:+853 2853 0452

交通:由港澳碼頭坐12號至高士德培正中學落車再步行約6分鐘
溫馨提示:附近另外有間叫「新威廉咖啡美食」嘅,雖然唔同名,都係分店之一,而最新第三分店係叫新鴻發,開咗喺同區嘅嘉野度將軍街13號,總店行過去新鋪大概十幾分鐘,新店冇咁多人,於綠蔭(大東)咖啡室附近。

03 | 人情味濃!大大塊吉列豬扒

舖仔細細嘅綠蔭(大東)咖啡室,以前做街坊生意多,早幾年都重可以直出直入,但依家就坐滿網友,閒時都要花啲耐性等下位。而令網友們蜂擁而至嘅關鍵,就係一塊望落平平無奇,但係食落足以擄獲人心嘅吉列豬扒!

大東
吉列豬扒MOP19

嚟到大東咖啡室嘅指定動作一定係嗌吉列豬扒,人人皆是。大東嘅吉列豬扒即叫即炸,外層炸得金黃香脆,每一啖咬落會有音效。雖然塊豬扒睇落好似好薄,但食落去鬆軟帶汁而且冇絲毫嘅油膩感,加埋奇妙沙律醬一齊食,真係好難停到口。

14193780_10154488107557053_161847360_n
牛雜撈麵 MOP30

除咗吉列豬扒,呢度個咖喱牛雜撈麵都幾出色。牛雜嘅代表包括牛肚同牛膀,兩者都燜得異常軟腍入味;麵就夠爽彈幼細,雲吞就不過不失啦,蝦細粒咗少少,所以可以無視相中嘅雲吞。

WQEBOO
益力多雪碧MOP14

顧名思義即係雪碧溝益力多,老闆會擺低一支玻璃樽裝嘅雪碧加兩小支益力多畀你調出個未來。

IMG_3138
檸檬益力多 MOP14

清新開胃,係食吉列豬扒嘅最佳配搭。

WEQWEQWE
食客多咗,大東冇乜點加價之餘,老闆依然keep住笑臉迎人同充滿人情味,次次咁啱爭一兩蚊想摷散銀之際,老闆都會話:「由佢啦!一兩蚊!」可能你會話一兩蚊之嘛!又小題大做!冇錯,兩蚊真係買唔到乜,最多可以用嚟供樓同供車位,但澳門街真係冇乜邊幾度仲會有「兩蚊算啦!」呢支歌仔唱,重要場內忙極個老闆都能夠同班食客打成一片,唔食下佢個吉列豬扒都應該嚟食下嗰浸人情味,係咪先?

綠蔭(大東)咖啡室

地址:澳門柯利維喇街27號A地下

電話 :+853  2835 8740
交通:由科學館或者回力場總站坐8號至永樂戲院再步行約5分鐘