夏天來到尾聲，最可以代表夏天的向日葵（太陽花）花期亦都接近完結！單是講韓國，連首爾市內最有名的賞花勝地－－天空公園，都已經冇花可以睇。想趕睇花尾班車，都仲有 濟州向日葵 ！去開當地旅行的，記住把金京淑向日葵農場放入行程之中！
花期到11月！
一落車已經見到太陽花喇！雖然花田面積不算大，約有4個足球場大小，不過免費入場，農場主人仲准許訪客走入花田任影，想影呃like相真心冇難度。問過農場主人，由播種到開花需時逾個半月，開花兩星期後便會剪走。不過她在不同期間、分批於六片花田裁種，所以每年7月至11月都有機會睇到。
扭晒計！千個太陽花的後蕊
出發前港女做足功課，睇準場內最靚打卡位就是天橋前後的花田，計好花期打算由橋位高炒澎湃花海的盛況，不過獨獨計漏花朵扭計，面向太陽搵個背脊「得」住我！唔理照影，影唔到高炒靚相，走入花田影，其實一樣咁震撼！田內食用、觀賞的品種都有，最大的巨無霸太陽花棵棵有人咁高，花朵直徑比手掌更要大！
講番交通方法，睇這個 濟州向日葵 ，我是包車一天前往的，所以由濟州市坐30分鐘車程就到，相當方便！如果沒有包車，建議坐的士去啦，離開時，再請農場主人致電預約的士離開便可。我個人不太建議坐巴士，因為下車之後都要走一大段路。