上星期東京羽田機場擺大烏龍，行李輸送帶出事，搞到全日空等航空公司一共 34 班機，等唔切載行李就要起飛。大嗱嗱 6,600個乘客，去到目的地先知行李未上機，阿珍聽到都覺得牙煙！雖然 ANA 已經即日送遞行李到相關機場，但都冇理由要旅客喺機場白等幾個鐘㗎嘛！如不幸遇上蝦碌航班都唔使騰雞嘅，等阿珍過你幾招尋篋啟事，咁就算 行李延誤 都唔使咁驚啦！
01 | 保管好行李條碼，追蹤行李喺邊就靠佢！
航空公司職員會透過行李條碼定位番件行李，盡快送回府上。千祈咪學似「送禮勤」咁，貼到成個篋都係 bar code，想幫你都無能為力啦！
02 | 去程有得賠，回程得個桔！？
假若好似阿珍朋友咁，隔咗一日先收到行李，就可以向航空公司索討「必需品」的賠償，如內衣費、梳洗用品等，記住保留單據！不過換轉回港嗰程唔見行李，就冇呢支歌仔唱喇！
03 | 行李牌＋特別記認幫到手！
前排奧運完咗，英國一班運動員回國嘅時候就遇到一啲煩惱，因為佢哋啲背包全部一式一樣，要搵番都唔容易！所以話掛行李牌雖然係老生常談，但仍然有唔少人偏向低調，黑色篋身毫無掛飾，要萬中尋一都幾難！尤其是當你要託上託 long d 搵行李，描述得仔細準確，自然加快尋篋程序！
體操運動員 Becky Downie 就拍咗段片放上Twitter，仲苦中作樂咁話好好玩！唔想自己都要咁，就記得用番啲特別記認喇！
OMGSHHHH ?? pic.twitter.com/PofNEM3RXj
— Becky Downie (@Bdownie) August 23, 2016
04 | 咪嫌麻煩，立雜日用品宜跟身！
銀包、外幣、平板電腦等貴重品固然要跟身，就連充電線、基本保濕及護膚品、外套等都不妨放進隨身行李，因為冇人知幾時會中頭獎唔見行李！
05 | 買旅遊保險前，留意行李延誤細則
未必每份旅遊保險都有包「行李延誤」此項，否則就只可靠航空公司索償。不過坐廉航的話，香港快運嘅現金賠償每日上限只有150蚊，樂桃直情冇得賠，而虎航則按情況而定。