機艙乾燥、污糟、紫外線強勁，簡直係女生大敵！要知道我地好多時一落機就要去血拼！趕景點！影靚相等！
皮膚出事、感染疾病真係去旅行都去得唔開心? 到底女生們搭飛機時應該如何好好保養同保護自己？問空姐就最清楚? 等我醒幾個實用貼士俾大家?
1. 不停飲水
唔好睇小飲水，飲水唔但只可以令到你無咁口乾，保持喉嚨濕潤亦都係防止呼吸道感染嘅天然方法呀！不過空姐提提你，最好就唔好飲一杯杯果啲飛機水喇，真係好污糟㗎（空姐一定唔會飲），飲支裝水啦，一般餐盤上會有㗎喇，另外亦都可以喺上機之前喺閘口飲水機斟定?
2. 記得閂窗、塗防曬霜
其實喺三千幾呎嘅上空，紫外線係遠比地面高！預防紫外線不嬲係抗氧化第一步，所以我喺飛機起飛後第一件事就係閂窗? 之但係你有冇諗過萬一你坐走廊位，而坐窗口位嘅乘客唔願意閂窗？根據經驗呢種情況係有可能發生㗎，所以記住記住記住要塗防曬霜！
3. 盡量避免用飛機枕頭、被子
飛機除咗乾燥、紫外線極高紫外，細菌都極多? 唔係嚇你，機艙分分鐘污糟過你屋企個廁所！而飛機所提供嘅枕頭、被子，雖然係洗過，但已經有無數嘅乘客用過，我亦唔確定公司會將啲氈洗得有幾乾淨，試過俾乘客投訴張氈聞落有嘔味… 唉總之用私伙嘢就最穩陣啦，如果真係要用，都千祈唔好掂倒塊面呀！
4. 紮起頭髮
因為機艙環境非常乾燥，頭髮係好容易有靜電，甚至出現折斷問題，建議女生最好紮起頭髮，咁就無咁容易有靜電喇，不過記得唔好綁太緊呀！建議先塗上髮尾油，然後鬢一條鬆鬆哋嘅辮，又有造型又可以保護倒頭髮～
5. 去廁所要用自己紙巾
呢個係我私心建議，飛機廁所提供嘅紙巾質素好差，而且廁所空間非常細，一沖廁，馬桶嘅細菌就彈晒去啲紙巾到… 女生們，奉勸你哋去廁所最好用返自己嘅紙巾啦！話晒都係敏感部位嚟架嘛?
女生們下次搭飛機時要記住呢五大貼士喇～ 希望大家都可以靚靚去旅行，影多啲靚相?
照片拍攝於日本沖繩
FB: 兼職空姐姥姥
https://www.facebook.com/parttimelolo/