早前有一個Facebook Page,貼出一位在日港人因為隔離做咗 Airbnb 而受到噪音騷擾嘅 post,即刻引嚟好大迴響。有唔少人指其實唔少香港人根本唔知住民宿有咩要注意,諗住住 日本Airbnb 同住酒店一樣?其實可能犯晒規,搞到人哋嬲嬲豬都唔知自己衰啲乜。唔想影衰香港人嘅話,記住入住之前睇清楚下面嘅規則喇!


載圖:在日香港人

1/ 入門口請除鞋

日本人慣咗喺門口玄關位置除鞋,咁樣就唔會整污糟間屋。好多日本民宿都會提供拖鞋,加上大部分日本人都好講衛生,大家唔使擔心會整污糟對腳。

2/ 夜深時分請將音量收細

基本上晚上 9 點後都盡量細聲啲啦!我知大家玩完買完一日一定好興奮,夜晚仲想開P添,但住日本民宿就千祈唔好!記住呢度唔係酒店,係人哋屋企。日本屋啲牆身又薄,真係大聲少少都聽到晒你講乜。除咗講嘢唔好咁大聲,收細電視、電話音量之外,總之會發出噪音嘅嘢都唔好用唔好做,好似半夜用洗衣機、風筒、拖喼、拉枱拉凳呢啲簡直係死罪。你第二日唔洗返工啫,人哋要返㗎!

3/ 垃圾記住要洗淨、分類

通常屋主會準備幾個垃圾袋﹕可燃,可回收(汽水罐、膠樽、玻璃樽),不可燃垃圾,丟垃圾時要分返類,仲要洗乾淨先好丟呀。當年編輯都試過夜晚食完杯麵都要乖乖洗乾淨個杯麵碗先可以掉,係麻煩啲,但住得民宿就一定要守規矩。

4/ 保持房間清潔

咁當然唔係話用完之後要一塵不染,但都唔好搞到人哋間屋烏煙瘴氣啊。唔好亂咁移動啲傢俬,完完整整咁還返間屋俾人。如果房間有損毁係需要額外賠償嘅。

5/ 做嘢要有手尾

出門口時記得閂燈閂冷氣,同埋唔用嘅電氣都要熄咗去。雖然話房租包晒水電,但都唔好咁唔環保啊!

6/ 唔好貪小便宜

唔想變蝗蟲,就記得唔好拎走人哋成卷廁紙,成枝沐浴露、洗頭水果啲,俾人知道真係好核突!覺得好用想買可以問下屋主,相信屋主唔會拒絕回答嘅。

7/ 唔好帶入住者以外嘅人入屋

其實唔止 日本Airbnb ,日本酒店一般都係按人頭收費,所以唔好諗住屈蛇,仲有除入住者以外嘅人都係唔應該入屋嘅,除非你事先問咗屋主,有佢嘅許可先可以。

8/ 唔好喺屋入面吸煙

除非間 Airbnb 寫到明話可以吸煙,如果唔係一律係禁煙嘅。點香,點蠟燭呢啲當然都唔好啦!特別係住京都嘅町家民宿,因為係用木製,完全唔妨火,一陣燒咗人間屋就…

9/ 唔好喺屋入面做犯法嘢

唔好喺屋入面啪藥做嗰啲犯法嘢,呢啲唔使多講啦。

10/ 唔好影響鄰居

唔好放啲嘢出走廊阻住人行,或者八卦偷望鄰居屋內,你住嘅係民宿,但鄰居住緊嘅係自己屋企,你偷望人啫係侵擾人哋私隱,俾著係你都唔鐘意隔離屋咁樣啦!有時可能係鄰居八卦望你,始終佢哋未習慣有咁多外國人出現,呢個時候不妨笑一笑表示自己冇惡意就得啦。

記住你唔係住緊酒店,係住緊人哋間屋!

記住你唔係住緊酒店,係住緊人哋間屋!

記住你唔係住緊酒店,係住緊人哋間屋!

因為好重要,所以要講三次。

只要記住上面呢點,同埋事前睇清楚入住規則,咁就萬無一失啦!

下一頁:Airbnb訂房必知三件事!

延伸閱讀:

不再中伏!Airbnb 訂房 5個冷知識

大阪 Airbnb |一定要住一次的10間特色推介

東京Airbnb |山手線10 大住宿推介